ހދ. ކުޅުދުއްފުށި ސީޓިގެ އިހްތިސާސްގެ ތެރޭގައި ފަޅު ރަށެއް ހިމެނުމަށް އެ އަތޮޅުގެ އެހެން ރަށްތަކުން ދެކޮޅުހަދައި ކަންބޮޑުވުން ފާޅުކޮށްފި އެވެ.
ރައީސް އިބްރާހިމް މުހައްމަދު ސޯލިހް އެންމެ ފަހުން ކުޅުދުއްފުއްޓަށް ކުރެއްވި ދަތުރުފުޅުގައި ކައުންސިލުން އެދުނީ ހދ. ކޭލަކުނު ނުވަތަ ކުނބުރުދޫ އެ ސިޓީގެ އިހްތިސޯސްގެ ތެރޭގައި ހިމަނައި ދެއްވުމަށެވެ.
މި ހުށަހެޅުމުގައި އެދުނު ދެ ރަށް ދޫކޮށްލަން އަތޮޅުގެ އެހެން ރަށްތަކުން ބޭނުމެއް ނުވެ އެވެ.
ކުޅުދުއްފުށީގެ މޭޔަރު މުހައްމަދު އާތިފް މީގެ ކުރިން މި ނޫހަށް ދެއްވި އިންޓަވިއުއެއްގައި ވިދާޅުވީ ރަށެއް ހިމެނުމަށް ސަރުކާރަށް ހުށަހެޅީ ކުޅުދުއްފުށްޓަށް ބިމުގެ ދަތިކަން ވަރަށް ބޮޑުވެފައިވާތީ ކަމަށެވެ.
ނޭކުރެންދޫ ކައުންސިލުން ދެކޭ ގޮތުގައި ކުޅުދުއްފުށިން ހުށަހެޅި ދެ ރަށް ވެސް އެ ސިޓީގެ އިހްތިސޯސްގެ ތެރޭގައި ނުހިމެނެ އެވެ. އަދި އެ ދެ ރަށަކީ ވެސް ކުޅުދުއްފުއްޓާ ދުރު, އެހެން ރަށްތަކާ ކައިރި ދެ ރަށް ކަމަށް ކައުންސިލްތަކުން ބުނެ އެވެ.
ނޭކުރެންދޫ ކައުންސިލްގެ ރައީސް އަލީ ސިރާޖު ވިދާޅުވީ އެ ރަށް ދިނުމާ މެދު އަމަލު ކުރަން ޖެހޭނީ ގާނޫނުގައި ބުނާ ގޮތަށް ކަމަށެވެ.
"އެ މީހުންގެ އިހުތިސޯސްގެ ދަށުގައި ނުހިމެނޭ ރަށެއް ލިބިގެން ނުވާނެ. އަޅުގަނޑުމެން ތާއީދު ކުރާނީ ގާނޫނުގައި ބުނާ ގޮތަށް," ސިރާޖު ވިދާޅުވި އެވެ.
ހދ. ކުރިނބީ ކައުންސިލްގެ ރައީސް އަބްދުﷲ އަސްލަމް ވިދާޅުވީ ކުނބުރުދޫ ބާއްވަން ޖެހޭނީ އަތޮޅުގެ ހުރިހާ ރަށްތަކެއްގެ އިހްތިސޯސްގެ ތެރޭގައި ކަމަށް ދެކެވަޑައިގަންނަވާ ކަމަށެވެ. އެ ނޫން ބަދަލެއް ގެނެސްފި ނަމަ އެއީ ބޭއިންސާފަކަށް ވާނެ ކަމަށް ވިދާޅުވި އެވެ.
"އަތޮޅުގެ 13 ރަށަށް ވެސް އެ ފުރުސަތު ލިބެން ޖެހޭނެ. ވަކި ރަށަކަށް ވަކި ފަޅު ރަށެއް ދެވިގެން ނުވާނެ." ކަމަށް އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި ކުނބުރުދޫ ވަކި ރަށެއްގެ ބާރުގެ ދަށަށް ދޫކޮށްލަން ކުރިނބީ ރައްޔިތުން ވެސް ދެކޮޅެވެ. ސަބަބަކީ އެއީ އަތޮޅުގެ މެދުގައި އޮންނަ ރަށަކަށް ވެފައި އަދި އެ ރަށް އެންމެ ކައިރީ ވެސް ކުނބުރުދުއާ ކަމަށް ވާތީ އެވެ.
ހދ. އަތޮޅު ކައުންސިލްގެ ރައީސް މުހައްމަދު ސިރާޖު "އަދަދު" އަށް ވިދާޅުވީ ކުޅުދުއްފުށި ސިޓީ ކައުންސިލުގެ އިތުރުން ސަރުކާރުން ވެސް އެކަމާ ގުޅޭ އެއްވެސް މަޝްވަރާއެއް ކޮށްފައި ނުވާ ކަމަށެވެ.
އެހެންކަމުން އަތޮޅު ކައުންސިލުން ވެސް މިކަމުގައި އެއްވެސް ރަށަކާ މިހާތަނަށް ވާހަކަ ދައްކައިފައެއް ނުވެ އެވެ. އެއީ ސަރުކާރުގެ ނިންމުން މިހާތަނަށް ހާމަކޮށްފައި ނެތުމުން ކަމަށް ވެސް އަތޮޅު ކައުންސިލުން ބުންޏެވެ.
ސިރާޖު ވިދާޅުވީ ކުޅުދުއްފުށިން ހުށަހަޅާފައިވާ ދެ ރަށާ މެދު ސަރުކާރުން ނިންމާ ނިންމުމަކަށް އަތޮޅު ކައުންސިލުން ތާއީދުކުރާނެ ކަމަށެވެ.
"ރައީސްގެ އިހުތިޔާރުގައި އޮންނަ ކަމެއް, އެއީ ދިނުމާއި ނުދިނުން. އެކަމަކު ހދ އަތޮޅުގައި ހުންނާނީ ހދ. އަތޮޅު ރައްޔިތުންގެ ފަޅުރަށްތައް. މިހާރު ގާނޫނު އޮތް ގޮތުން މަޝްވަރާ ކުރެވެން ޖެހޭނެ. މިހާތަނަށް އެއްވެސް މަޝްވަރާއެއް ކޮށްފައެއް ނުވޭ," ކަމަށް ސިރާޖު ވިދާޅުވި އެވެ.
އޭނާ ގަބޫލުކުރައްވާ ގޮތުގައި އެފަދަ ނިންމުމެއް ނިންމަން ވާނީ ކައުންސިލްތަކާ އެކު މަޝްވަރާކުރުމަށް ފަހު އެވެ.
ކުޅުދުއްފުއްޓަށް ރަށެއް ދިނުމާ މެދު އަތޮޅުގެ އެހެން ރަށްތަކުން ހިތްހަމަނުޖެހުންފާޅުކުރާ މައްސަލައިގައި އެ ސިޓީގެ މޭޔަރު އާތިފް ކުރިން ވިދާޅުވެފައި ވަނީ ކުޅުދުއްފުށީގެ ބައެއްގެ ގޮތުގައި ކޮންމެ ރަށެއް ހަމަޖައްސައިދިން ނަމަވެސް އެ ރަށެއް ބޭނުންކުރާނީ ހދ. އަތޮޅުގެ ހުރިހާ ރަށެއްގެ ރައްޔިތުންނަށް ވެސް މަންފާ ލިބޭ ގޮތަކަށް ކަމަށެވެ.
