ތެހްރާން، އިރާން (ޖޫން 19) - އިރާނުގައި އިއްޔެ ކުރިއަށް ދިޔަ ރިޔާސީ އިންތިހާބުން އަލްޓްރާ ކޮންޒަވޭޓިވް ކެންޑިޑޭޓް އިބްރާހިމް ރައިސީ ކުރި ހޯއްދަވައިފި އެވެ.
ރަސްމީ ނަތީޖާ އިއުލާނު ކުރުމުގެ ކުރިން ވެސް ރައިސީ ކުރި ހޯއްދަވާނެ ކަމަށް ބެލެވި އިރާނުގެ ސިޔާސީ އެކި ފަރާތްތަކުން ގެންދެވީ މަރުހަބާގެ މެސެޖުތައް ފޮނުވަމުންނެވެ.
އެގޮތުން މިހާރުގެ ރައީސް ހަސަން ރޫހާނީ ވިދާޅުވީ ރައްޔިތުން ވޯޓުލީ ކޮން ކެންޑިޑޭޓަކަށް ކަން ސާފުވާ ކަމަށާއި އެ ފަރާތަކަށް މަރުހަބާ ދަންނަވާ ކަމަށެވެ.
"ރައްޔިތުންގެ ނިންމުމަށް އަޅުގަނޑު މަރުހަބާ ކިޔަން. ރަސްމީކޮށް އަޅުގަނޑު މަރުހަބާ ކިޔުން އޮންނާނީ ފަހުން، އެކަމަކު އަޅުގަނޑުމެންނަށް ވަރަށް ސާފު ބޭނުންވާ ވަރަށް ވޯޓު ލިބުނީ ކޮން ބޭފުޅަކަށް ކަން އަދި ރައްޔިތުންގެ ވޯޓުން އިންތިހާބުވީ ކޮން ބޭފުޅެއް ކަން،" ރައިސީގެ ނަން ފާހަގަނުކުރައްވާ ރޫހާނީ ވިދާޅުވި އެވެ.
އަލްޓްރާ ކޮންޒަވޭޓިވުންގެ ތެރެއިން ދެން އިންތިހާބުގައޮ ވާދަކުރެއްވި މުހްސިން ރިޒާއީ އާއި އާމިރު ހުސެއިން ގާޒީޒާދޭ ހާޝެމީ ވަނީ ރައިސީ ވަކިން މަރުހަބާގެ މެސެޖުތައް ފޮނުއްވާފަ އެވެ.
އިންތިހާބުގައި ވާދަކުރެއްވި ހަމައެކަނި ރިފޯމިސްޓް ކެންޑިޑޭޓު އަދި ކުރީގެ މަރުކަޒީ ބޭންކުގެ ގަވަރުނަރު އަބްދުލް ނާސިރު ހިއްމަތީ ވެސް ޓްވިޓާ މެދުވެރިކޮށް ރައިސީއަށް މަރުހަބާ ދެންނެވި އެވެ.
އިންތިހާބުގައި ވާދަކުރެއްވި އެހެން ކެންޑިޑޭޓުން ރައިސީއަށް މަރުހަބާ ދެންނެވި ފަހުން އިލެކްޝަން އޮފީހުން ބުނީ މިހާތަނަށް ގުނި ވޯޓުގެ 62 ޕަސެންޓު ލިބިވަޑައިގެންނެވި ރައިސީއަށް ކަމަށެވެ.
އެގޮތުން މިހާތަނަށް ގުނާފައިވާ 28.6 މިލިއަން ވޯޓުގެ ތެރެއިން 17.8 މިލިއަން ވޯޓު ލާފައިވަނީ ރައިސީ އަށެވެ. ދެ ވަނައަށް އުޅުއްވާ މުހްސިން ރިޒާއީއަށް ލިބިވަޑައިގެންފައި ވަނީ 3.3 މިލިއަން ވޯޓު ކަމަށް އިލެކްޝަން އޮފީހުގެ ޗެއާމަން ޖަމާލް އުރްފް ޓީވީ މެދުވެރިކޮށް ވިދާޅުވި އެވެ.
އިރާނުގައި 59 މިލިއަނަށް ވުރެ ގިނަ މީހުންނަށް ވޯޓުލުމުގެ ހައްގު ލިބިގެންވެ އެވެ. ނަމަވެސް ވޯޓުލާން ނުކުތް މީހުންގެ އަދަދު އަދި ސާފެއް ނުވެ އެވެ.
