ރާމަﷲ، ފަލަސްތީން (ޖޫން 19) - މުއްދަތު ހަމަވާން ކައިރިވެފައި ހުރި ކޮވިޑް ވެކްސިންގެ އެއް މިލިއަން ޑޯޒް އިޒްރޭލުން ފަލަސްތީނަށް ދޭން އުޅުމުން، އެ ވެކްސިން ބޭނުން ނޫން ކަމަށް ފަލަސްތީނުން ބުނެފި އެވެ.
އިއްޔެ އިޒްރޭލުގެ އޮފިޝަލުން ބުނީ މުއްދަތު ހަމަވާން ކައިރިވެފައިވާ ވެކްސިން ޑޯޒްތަކެއް ފަލަސްތީނަށް ދޭން ނިންމާފައިވާ ކަމަށެވެ. އެކަމާ ގުޅޭ އެއްބަސްވުމެއްގެ ވާހަކަ އިޒްރޭލުން ފާހަގަކުރި އެވެ.
ހުޅަނގު އައްސޭރީގައި ވެރިކަން ކުރާ ފަލަސްތީނުގެ ސަރުކާރުން ކުރިން ބުނީ އިޒްރޭލުން ވެކްސިންގެ އެއް މިލިއަން ޑޯޒް ލިބޭނެ ކަމަށެވެ. ނަމަވެސް އެއްބަސްވުމެއްގެ ވާހަކަ ހާމަކޮށްފައެއް ނުވެ އެވެ.
ފަލަސްތީނުގެ ހެލްތު މިނިސްޓްރީން ކުރިން ނެރުނު ބަޔާނެއްގައި ބުނީ ވެކްސިން ޕްރޮގްރާމުގެ ދުވެލި އަވަސް ކުރަން އިޒްރޭލުން ފޯރުކޮށްދޭނީ ފައިޒާގެ އެއް މިލިއަން ޑޯޒް ކަމަށެވެ.
ނަމަވެސް ރޭ ފަލަސްތީނު ސަރުކާރުގެ ތަރުޖަމާނު އިބްރާހިމް މެލްހެމް ވިދާޅުވީ އިޒްރޭލުން އެންމެ ފުރަތަމަ ފޮނުވަން ނިންމި ފައިޒާގެ 90،000 ޑޯޒަކީ "އެއްބަސްވުމުގައި ކަނޑައެޅި ގޮތާ ހިލާފު" ޑޯޒްތަކެއް ކަމަށެވެ.
އެހެންކަމުން ބޮޑު ވަޒީރު މުހައްމަދު އިޝްތަޔާ ހެލްތު މިނިސްޓްރީއަށް އެންގެވީ އެއްބަސްވުން އުވާލުމަށް ކަމަށް ވެސް މެލްހެމް ވިދާޅުވި އެވެ.
"މުއްދަތު ހަމަވާން ކައިރިވެފައި ހުރި ވެކްސިންތައް ބަލައިގަންނަން ސަރުކާރުން ބޭނުމެއް ނޫން،" ވަފާ ނިއުސް އޭޖެންސީން އާއްމުކުރި ބަޔާނެއްގައި ވެ އެވެ.
އިޒްރޭލުގެ ބޮޑު ވަޒީރު ނަފްތާލީ ބެނެޓްގެ އޮފީހުން ބުނީ ފަލަސްތީނު ސަރުކާރާއެކު އެއްބަސްވުމަކަށް އައިސްފައިވާ ކަމަށާއި ފައިޒާގެ މުއްދަތު ހަމަވާން ކައިރިވެފައިވާ އެއް މިލިއަން ޑޯޒް ފޯރުކޮށްދޭނެ ކަމަށެވެ. ނަމަވެސް ޑޯޒްތައް މުއްދަތު ހަމަވާ ތާރީހް ހާމައެއް ނުކުރެ އެވެ.
"އޭގެ ބަދަލެއްގެ ގޮތުގައި ފަލަސްތީނަށް އަންނަ ސެޕްޓެމްބަރު ނުވަތަ އޮކްޓޯބަރުގައި ލިބެން ހަމަޖެހިފައިވާ ފައިޒާގެ އެއް މިލިއަން ޑޯޒް އިޒްރޭލާ ހަވާލު ކުރާނެ،" ބަޔާނުގައި ބުނެފައި ވެ އެވެ.
މެލްހެމް ވިދާޅުވީ އެއްބަސްވުން އުވާލުމަށް ފަހު ފަލަސްތީނުން ސެޕްޓެމްބަރު މަސް އަންނަން ދެން އެއް މިލިއަން ޑޯޒްގެ ޝިޕްމަންޓަށް މަޑު ކުރާނީ ކަމަށެވެ. އިޒްރޭލުން ދޭން ނިންމި ވެކްސިންތަކުގެ މުއްދަތު ހަމަވާ ތާރީހު އޭނާ ވެސް ހާމައެއް ނުކުރައްވަ އެވެ.
ވައިރަހަކަށް ބޯޑަރެއް ނެތް
ފައިޒާގެ އެތައް މިލިއަން ޑޯޒެއް ހޯދުމަށް ފަހު އިޒްރޭލުން ބޮޑު ވެކްސިން ޕްރޮގްރާމް ފަށައިގެން ވަނީ ކާމިޔާބު ހޯދާފަ އެވެ. އެ ގައުމުގެ އާބާދީގެ 55 ޕަސެންޓު ނުވަތަ 5.1 މިލިއަން މީހުން ވަނީ ދެ ޑޯޒާއެކު ވެކްސިން ފުރިހަމަކޮށްފަ އެވެ.
އެއާ ހިލާފަށް ފަލަސްތީނުގައި ހުޅަނގު އައްސޭރި އާއި ގާޒާގައި ވެކްސިންގެ ދެ ޑޯޒް ފުރިހަމަކޮށްފައި ވަނީ 270،000 މީހުންނެވެ.
އިއްޔެ އިޒްރޭލުގެ އާ ހެލްތު މިނިސްޓަރު ނިޓްޒާން ހޮރޮވިޓްޒް ވިދާޅުވީ "ކޮރޯނާވައިރަހަށް ބޯޑަރެއް ނެތް ކަމަށާއި މީހުންގެ މެދުގައި ތަފާތު ނުކުރާ" ކަމަށެވެ.
"ވެކްސިން ބަދަލު ކުރުމުގެ މި މުހިއްމު އެއްބަސްވުމުން ދެ ފަރާތަށް ވެސް ފައިދާވާނެ،" އޭނާ ވިދާޅުވި އެވެ.
ނަމަވެސް ވެކްސިން މުއްދަތު ހަމަވާ ތާރީހާ މެދު ސުވާލު ކުރުމުން ފަހުން އެއްވެސް ޖަވާބެއް ދެއްވާފައެއް ނުވެ އެވެ.
ވެކްސިންގެ މައްސަލަ ފެންމަތިވިއިރު، އިއްޔެ ވެސް އިޒްރޭލާއި ފަލަސްތީނާ ދެމެދު ހަމަލާ ބަދަލު ކުރުން ކުރިއަށް ދިޔަ އެވެ. ހަމާސް އާއި އިޒްރޭލާ ދެމެދު 11 ދުވަސް ވަންދެން ހަމަލާ ބަދަލު ކުރުމަށް ފަހު ސުލްހަ ގާއިމް ކުރީ މޭ 21 ގަ އެވެ.
ނަމަވެސް ހަމާސްއިން އިޒްރޭލަށް ހަމަލާ ދޭ ކަމަށް ތުހުމަތުކޮށް، އިޒްރޭލުން މިދިޔަ ހަފްތާގައި އަލުން ގާޒާއަށް ވައިގެ ހަމަލާތައް ދިނެވެ. އަނެއްކާ އިއްޔެ ޗެސް ގާޒާގެ ސަރަހައްދަށް ޖެޓުތައް ވަދެ ހަމަލާ ދިނެވެ.
ހަމަލާ ބަދަލު ކުރުމުގެ ސަބަބުން ގާޒާގެ ސިއްހީ ނިޒާމަށް މިހާރު ވެސް ވަރަށް ބޮޑަށް އަސަރުކޮށްފައި ވާއިރު، ތަޖުރިބާކާރު ދެ ޑޮކްޓަރުން ހަމަލާތަކުގައި މަރުވި އެވެ.
ފަލަސްތީނުގައި މިހާތަނަށް 312،000 ކޮވިޑް ކޭސް ފެނިފައި ވާއިރު، މަރުވެފައި ވަނީ 3،540 މީހުންނެވެ. އިޒްރޭލުން 840،000 ކޭސް ފެނިފައި ވާއިރު މަރުވެފައިވަނީ 6،420 މީހުންނެވެ.
