ކޯޕެންހާގެން، ޑެންމާކް (ޖޫން 17) - ޔޫރޯ ފުޓްބޯޅަ މުބާރާތުގައި މިރޭ ފަހަތުން އަރައި ޑެންމާކް އަތުން 2-1 އިން ބެލްޖިއަމް މޮޅުވި ގޯލު ޖެހުމަށް ފަހު އުފާފާޅުނުކުރީ ޑެންމާކްގެ ސަޕޯޓަރުންނަށް އިހުތިރާމް ކުރުމުގެ ގޮތުން ކަމަށް ބެލްޖިއަމްގެ މިޑްފީލްޑަރު ކެވިން ޑި ބްރޭނާ ބުނެފި އެވެ.
ޑެންމާކުން މި ފަހަރުގެ ޔޫރޯގައި ކުޅުނު ފުރަތަަމަ މެޗުގައި ފިންލެންޑާ ދެކޮޅަށް މެޗުގެ 43 ވަަނަ މިނިޓްގައި ހިތް ހުއްޓިގެން ދަނޑު މައްޗަށް ވެއްޓުނު ކްރިސްޓިއަން އެރިކްސަން ހޮސްޕިޓަލްގައި ފަރުވާ ހޯދަމުން އަންނައިރު، މިރޭގެ މެޗުގައި އޭނާގެ ހަނދާނުގައި ގިނަ ކަންތައްތަކެއް ވަނީ ކޮށްފަ އެވެ. އެރިކްސަންގެ ހާލު ރަނގަޅުވަމުން އަންނައިރު، އޭނާ އަށް ތަރުހީބު ދޭން މިރޭގެ މެޗުގެ 10 ވަނަ މިނިޓް ވަނީ އެއް މިނިޓަށް ކުޅުން މެދުކަނޑާލައިފަ އެވެ.
މިރޭގެ މެޗު ބަލަން 23,395 ސަޕޯޓަރުން ޑެންމާކްގެ ޕާކެން ސްޓޭޑިއަމް އަށް ވަންއިރު، ގިނައީ ޑެންމާކުގެ ސަޕޯޓަރުންނެވެ. ޑި ބްރޭނާ ދެ ވަނަ ހާފްގައި ކުޅެންއެރިއިރު، ޑެންމާކް އޮތީ 1-0 އިން ކުރީގަ އެވެ. ޑި ބްރޭނާ ކުޅެން އަރައި 10 މިނިޓް ތެރޭ ބެލްޖިއަމް އިން އެއްވަރުކުރި ގޯލަށް ފުރުސަތު ތަަނަވަސްކޮށްދިނެވެ. އޭގެ 15 މިނިޓް ފަހުން ބެލްޖިއަމް މޮޅުކޮށްދިން ގޯލު ޖެހީ ޑިބްރޭނާ އެވެ. އެ ގޯލު ޖެހުމަށް ފަހު އޭނާ އުފާފާޅެއްނުކުރެ އެވެ.
"ކޯޗު (ރޮބާޓޯ މާޓިނޭޒް) އަހަރެން އެރުވި އެޓޭކިން ހާފުގައި ޖާގަ ހޯދަން. އަހަރެންނަށް އެކަން ކުރެވުނު. އަދި ގޯލެއް ވެސް ޖެހިއްޖެ. އެކަމަކު އަހަންނެއް އެ ގޯލު ޖަހާފައި އުފާފާޅުކުރަން ބޭނުމެއް ނުވި. އަހަރެން ވަރަށް އިހުތިރާމް ކުރަން ޑެންމާކް ސަޕޯޓަރުންނަށް،" މެޗަށް ފަހު ޑި ބްރޭނާ ބުންޏެވެ.
"ހިނގާދިޔަ ކަންތައްތަކަށް ފަހު އަހަރެމެންނަށް އެނގޭ މި ދަނޑުގައި މި ސަޕޯޓަރުން ކުރިމަތީގައި އުނދަގޫ ކަންތައްތަކެއް ހުންނާނެކަން،"
މިރޭގެ މެޗަކީ މި ފަހަރު ޔޫރޯގައި ޑި ބްރޭނާގެ ފުރަތަމަ މެޗެވެ. މިދިޔަ މަހު ފަހުކޮޅު ކުޅުނު ޗެމްޕިއަންސް ލީގުގެ ފައިނަލުގައި ލޯ ކައިރީ ކަށިގަނޑަށް ލިބުނު އަނިޔާއެއްގެ ސަބަބުން އޮޕަރޭޝަނެއް ކުރި ޑި ބްރޭނާ އަށް މި ފަހަރުގެ ޔޫރޯގައި ބެލްޖިއަމް ކުޅުނު ފުރަތަަމަ މެޗު ގެއްލުނެވެ. އޭނާ މިރޭ ވެސް ބަދަލު ކުޅުންތެރިއެއްގެ ގޮތުގައި ކުޅެން އެރީ މުޅިން އެއްކޮށް ފިޓްނުވާތީ އެވެ.
ދުނިޔޭގެ ރޭންކިންގެ އެއް ވަނައިގައި އޮތް ބެލްޖިއަމް އަކީ ފުރަތަމަ ދެ މެޗުން މޮޅުވެގެން މި ފަހަރުގެ ޔޫރޯގެ ދެ ވަނަ ބުރުން ފުރުސަތު ހޯދި ދެ ވަނަ ޓީމެވެ. ބެލްޖިއަމްގެ ކުރިން ދެ ވަނަ ބުރުގެ ޖާގަ ކަށަވަރުކުރި ހަމައެކަނި ޓީމަކީ ބެލްޖިއަމް އެވެ. ބެލްޖިއަމާއި އިޓަލީ އަކީ ކޮލިފައިންގައި ކުޅުނު 10 މެޗުން މޮޅުވެގެން މުބާރާތަށް އައި ހަމައެކަނި ދެ ޓީމެވެ.
ޑި ބްރޭނާ ބުނީ މިރޭ ލަނޑު ޖެހުމަށް ފަހު އެހާ ބޮޑަށް އުފާފާޅު ނުކުރި ނަމަވެސް މެޗުން މޮޅުވެެގެން އަނެއް ބުރުގެ ޖާގަ ކަށަވަރުވުމުން އެ ހިތްހަމަ ޖެހުން އެބައޮތް ކަމަށެވެ.
ޔޫރަޕްގައި މި ވަގުތު ހުރި އެންމެ ހުނަރުވެރި އެއް މިޑްފީލްޑަރު ޑި ބްރޭނާ އަކީ އެންމެ ފަހުންް ހަތަރު ބޮޑު މުބާރާތުގައި ލަނޑެއް ޖަހަން ފުރުސަތު ތަނަވަސްކޮށްދިން ޔޫރަޕްގެ ހަމައެކަނި ކުޅުންތެރިޔާ އެވެ. އޭނާ ވަނީ 2014 ވަނަ އަހަރުގެ ވޯލްޑް ކަޕް، 2016 ވަނަ އަހަރުގެ ޔޫރޯ، 2018 ވަނަ އަހަރުގެ ވޯލްޑް ކަޕް އަދި މި ފަހަރުގެ ޔޫރޯގައި ލަނޑެއް ޖަހަން އެސިސްޓްކޮށްދީފަ އެވެ.
