ޖެނީވާ، ސްވިޓްޒަލޭންޑު (ޖޫން 17) - އިއްޔެ ރަޝިއާގެ ރައީސް ލެޑިމިއަ ޕޫޓިން އާއި އެމެރިކާގެ ރައީސް ޖޯ ބައިޑެންގެ ފުރަތަމަ ބައްދަލުވުން ޖެނީވާގައި ކުރިއަށް ދިޔައިރު ފެނުނީ ހަތުރުންގެ ގޮތުގައިވާ ދެ ގައުމެއްގެ ލީޑަރުން އިހްތިރާމާއި މަޝްވަރާގެ ރިވެތި ސިފަ ކުރިއަށް ނެރުއްވި މަންޒަރެވެ.
އެމެރިކާގެ ކުރީގެ ރައީސުންނާ ހިލާފަށް، ރަޝިއާއާ އޮތް ގުޅުން "ރީސެޓް" ކުރަން ވިސްނަވާ ކަމަށް ބައިޑެން ވިދާޅުވެފައެއް ނުވެ އެވެ. ނަމަވެސް ބައްދަލުވުމަށް ވަޑައިގެންނެވުމުގެ ކުރިން ކަންބޮޑުވާ މައްސަލަތަކުގެ ވާހަކަ އެތައް ފަހަރަކު ދެއްކެވި އެވެ.
ޕޫޓިންއަކީ "މީހުން މަރާ މީހެއް" ކަމަށް މީގެ ކުރިން ސިފަކުރެއްވި ބައިޑެން އިއްޔެގެ ބައްދަލުވުމަށް ފަހު ވިދާޅުވީ ޕޫޓިންއަކީ "ނަމޫނާ ވާދަވެރިއެއް" ކަމަށެވެ. އަދި ދެ ގައުމުގެ އެއް ގޮތް ކަންކަން ދެނެގަންނާނެ ކަމަށް ވެސް ނޫސްވެރިންގެ ބައްދަލުވުމެއްގައި ވިދާޅުވި އެވެ.
ބައިޑެންއާ ގުޅޭ ގޮތުން ޕޫޓިން ވިދާޅުވީ އެއީ "ވަރަށް ތަޖުރިބާ ހުރި ސިޔާސީ ބޭފުޅެއް" ކަމަށެވެ. އަދި މަޝްވަރާގައި އިއްޔެ ހޭދަވި ހަތަރު ގަޑިއިރެއް ހާއިރު ފާހަގަވީ "ކުރިއެރުންތައް ހޯދޭ ފަދަ ވާހަކަ ދެކެވުނު" އަދި ތަފްސީލަށް ދާން ބައިޑެން ބޭނުންވެ ވަޑައިގަންނެވި ވަގުތުތަކެއްގެ ގޮތުގައި ކަމަށެވެ.
"ބައިޑެންއަކީ އާއްމު ގޮތެއްގައި ކޮންސްޓްރަކްޓިވް ގުޅުން ބާއްވަން ބޭނުންވެ ވަޑައިގަންނަވާ ލީޑަރެއް. ނަމަވެސް ޕޫޓިންއަކީ އެކުވެރިއެއް ކަމަކަށް ދެކިވަޑައިނުގަންނަވާ،" ޔޫރޭޝިއާ ގްރޫޕުގެ ރައީސް އިއަން ބްރެމާ ވިދާޅުވި އެވެ.
"ބައިޑެން [ޕޫޓިން] އަށް އިތުބާރެއް ނުކުރައްވާ. އެކަމަކު ބައިޑެން ގަބޫލުކުރައްވާ ގޮތުގައި ރަޝިއާއިން އަމަލު ކުރާނީ އެ ގައުމުގެ މަސްލަހަތަށް އެންމެ ރަނގަޅަށް. ދެ ގައުމަށް ވެސް އެއްބަސްވެވޭ ކަންކަން ހުރުމުން އެ ކަންކަމުގައި އެކުގައި މަސައްކަތް ކުރައްވަން ބައިޑެން ބޭނުންވެ ވަޑައިގަންނަވާނެ،" ބްރެމާ ވިދާޅުވި އެވެ.
އިއްޔެގެ ނޫސްވެރިންގެ ބައްދަލުވުމުގައި ޕޫޓިން ވަނީ ރަޝިއާއިން ސައިބަ ހަމަލާ ދޭ ކަމަށް ކުރާ ތުހުމަތުތައް ދޮގުކުރައްވާފަ އެވެ. ނަމަވެސް އެކަމުގައި އިންޒާރެއް ދެއްވާފައިވާކަން ސިގްނަލް ކުރައްވަމުން ބައިޑެން ވިދާޅުވީ "އޭގެ ނަތީޖާއާ ކުރިމަތިލާންޖެހޭނެކަން" ޕޫޓިންއަށް އެނގިވަޑައިގަންނަވާނެ ކަމަށެވެ.
ރަޝިއާ އާއި އެމެރިކާގެ ގުޅުން އެންމެ ހީނަރުވި ދަނޑިވަޅުގައި ދެ ގައުމުގެ ސަފީރުން ވެސް ވަނީ އަނބުރަ ގައުމަށް ގެންގޮސްފަ އެވެ. އިއްޔެ ނިންމާފައިވަނީ އަލުން ސަފީރުންނާއި ޑިޕްލޮމެޓުން ބޭތިއްބުމަށާއި ބަންދުކޮށްފައި ތިބި މީހުން ދޫށްލުމަށެވެ.
ތަޖުރިބާކާރުން ދެކޭ ގޮތުގައި އިއްޔެގެ ބައްދަލުވުމަކީ މާ ބައިވަރު ކަންކަން ހާސިލްވާނެ ބައްދަލުވުމެއްގެ ގޮތުގައި ދެ ލީޑަރުން ވެސް ގަބޫލު ކުރައްވާފައެއް ނުވެ އެވެ. އެއާ ހިލާފަށް އެ ބައްދަލުވުމުގެ ލަނޑުދަނޑިއަކަށްވީ އެކުގައި ދެ ލީޑަރުންނަށް މަސައްކަތް ކުރެވިދާނެތޯ ބެލުމެވެ.
ނަމަވެސް މިއީ އެމެރިކާގެ އިދިކޮޅު ޕާޓީން މާ ހިތްހަމަޖެހުނު ކަމެއް ނޫނެވެ. ރިޕަބްލިކަނުން ބައިޑެންއަށް ފާޑުކިޔަމުން ބުނެފައި ވަނީ ބައްދަލުވުމުގައި ޕޫޓިންއާ މެދު ހަރުކަށިކޮށް ވާހަކަދައްކާފައި ނުވާ ކަމަށާއި ނަތީޖާއެއް ވެސް ނެރެވިފައި ނުވާ ކަމަށެވެ.
