ބްރިޒްބޭން، އޮސްޓްރޭލިއާ (ޖޫން 15) - އާއްމުންގެ ޕްރެޝަރު ބޮޑުވެ، އޮސްޓްރޭލިއާގައި ބަންދުކޮށްފައި ތިބި ރެފިއުޖީ އާއިލާއެއް މިނިވަން ކުރަން ސަރުކާރަށް މަޖުބޫރުވެއްޖެ އެވެ.
ސްރީ ލަންކާއަށް ޑީޕޯޓް ކުރުމުގެ ބިރާ ކުރިމަތިވެފައިވާ މުރުގައްޕަން އާއިލާގެ ހަތަރު މެމްބަރުން އޯގަސްޓް 2019 އިން ފެށިގެން ތިބީ ކްރިސްމަސް އައިލެންޑުގެ މީހުން ބަންދު ކުރާ މަރުކަޒެއްގަ އެވެ.
އެ އާއިލާ ހައްޔަރު ކުރުމުގެ ކުރިން ދިރިއުޅެމުން އައީ ކުއީންސްލޭންޑުގެ ބިލޮއެލާ އަވަށުގަ އެވެ. އެ އާއިލާ ބަންދު ކުރުމާއެކު އެ މީހުންގެ އަވައްޓެރި އަންނަނީ ސަރުކާރަށް ޕްރެޝަރު ކުރަމުންނެވެ.
ސަރުކާރަށް އިތުރަށް ޕްރެޝަރު ބޮޑުވީ އެ އާއިލާގެ އުމުރުން ހަތަރު އަހަރުގެ ތަރުނިކާ ބަލިވެގެން، ހެލިކޮޕްޓަރުގައި ފަރުވާއަށް ޕާތު ހޮސްޕިޓަލަށް ގެންދަން ޖެހުމުންނެވެ.
ތަރުނިކާއަށް ފަރުވާ ދޭން ޖެހުނީ ހުން އައިސް، ހޮޑުލައި، ބޯ އެނބުރުން ފަދަ ކަންކަން ދިމާވާތީ އެވެ. އޭނާއަށް ސެޕްސިސް އަދި ނިއުމޯނިއާ ޖެހިފައިވާ ކަމަށް ޑޮކްޓަރުން ވަނީ ކަނޑައަޅާފަ އެވެ.
ތަރުނިކާގެ މަންމަ ޕްރިޔާ ބުނީ އެންޓިބަޔޮޓިކް ފަރުވާ ދިނުމަށް ނުވަތަ ހޮސްޕިޓަލަކަށް ގެންގޮސް ދިނުމަށް އެދުނު ނަމަވެސް ރެފިއުޖީން ތިބޭ ސެންޓަރުގެ ޑޮކްޓަރުން ދިނީ ޕެރެސެޓަމޯލް ފަދަ ބޭސްތައް ކަމަށެވެ.
ފަރުވާއަށް ފޮނުވީ ވެސް ބަލިވެ އުޅޭތާ 10 ދުވަސް ފަހުން ކަމަށް ބުނެ އިންސާނީ ހައްގުތަކަށް މަސައްކަތް ކުރާ މީހުންގެ ފާޑުކިޔުން ވެސް ސަރުކާރަށް ވަނީ އަމާޒުވެފަ އެވެ.
ސަރުކާރަށް ޕްރެޝަރު ބޮޑުވެ، އެންމެ ފަހުން ނިންމާފައި ވަނީ ޕްރިޔާ އާއި އޭނާގެ ފިރިމީހާ ނާދޭސް އަދި ދެ ދަރިން، ތަރުނިކާ އާއި ކޮޕީކާއަށް ވަގުތީ ގޮތުން ޕާތުގައި ދިރިއުޅެވޭނެ ގޮތް ހެދުމަށެވެ.
އިމިގްރޭޝަން މިނިސްޓަރު އެލެކްސް ހޯކް ވިދާޅުވީ ގާނޫނީ ގޮތުން މައްސަލަ ކުރިއަށް ދާއިރު ޕާތުގައި އެ އާއިލާއަށް ދިރިއުޅެވޭނެ ކަމަށެވެ.
ހިޖުރަ ކުރީ ރައްކާތެރިކަން ހޯދަން
ލަންކާގެ ތަމަޅަ ރެފިއުޖީންގެ ގޮތުގައި ތަރްނިކާގެ މަންމަ އާއި ބައްޕަ ވަކިވަކިން އޮސްޓްރޭލިއާއަށް ދަތުރު ކުރީ 2012 އައި 2013 ގައި ކަނޑު މަގުންނެވެ.
އެ މީހުން ވަޒަންވެރިވީ ކުއީންސްލޭންޑްގެ ބިލޮއެލާ އަވަށުގަ އެވެ. އެ މީހުންގެ ދެ ދަރިން، ތަރްނިކާ އާއި އުމުރުން ހަ އަހަރުގެ ކޮޕީކާ ވެސް އުފަންވީ އޮސްޓްރޭލިއާ އަށެވެ.
ނަމަވެސް އެ މީހުންނަކީ ގަވާއިދާ ހިލާފަށް އައި ރެފިއުޖީން ކަމަށް ބަލައި، އޮސްޓްރޭލިއާ ސަރުކާރުން ބޭނުންވީ ގައުމުން ބޭރު ކުރުމަށެވެ.
އެކަމަކު 2019 ގައި ކޯޓުން އެންގީ އެ މީހުން ގައުމުން ބޭރު ނުކުރެވޭނެ ކަމަށެވެ. އެއާއެކު އޮސްޓްރޭލިއާގެ ކްރިސްމަސް އައިލެންޑުގައި ރެފިއުޖީން ބަންދު ކުރާ މަރުކަޒަށް އާއިލާ އެއްކޮށް ބަދަލު ކުރީ އެވެ.
ރެފިއުޖީންނާ މެދު އޮސްޓްރޭލިއާއިން ގެންގުޅެނީ ހަރުކަށި ސިޔާސަތެކެވެ. އެގޮތުން ކަނޑުމަގުން ބޯޓުގައި އަންނަ ރެފިއުޖީންނަށް ރައްކާތެރިން ދިނުމަކީ އޮންނަ އުސޫލެއް ނޫނެވެ.
ސަރުކާރުން ބުނަނީ އޭގެ ބޭނުމަކީ އިންސާނުން ޓްރެފިކް ކުރުން ހުއްޓުވުން ކަމަށެވެ. ނަމަވެސް ހައްގުތަކަށް މަސައްކަތް ކުރާ ގްރޫޕުތަކުން ދެކޭ ގޮތުގައި އެއީ ގާނޫނާ ހިލާފު އަދި ރެފިއުޖީންގެ ހައްގުތަކާ ހިލާފު އުސޫލެކެވެ.
އޭގެ އިތުރުން ގަވާއިދާ ހިލާފަށް އެތެރެވާ ފަރާތްތައް ހައްޔަރު ކުރުމުގެ ބާރު އިމިގްރޭޝަނުން ގާނޫނުން އޮވެ އެވެ. އޭގެ ސަބަބުން މި އާއިލާ ފަދަ ގިނަ ބަޔަކު ތިބީ ރެފިއުޖީން ބަންދު ކުރާ މަރުކަޒުތަކުގަ އެވެ.
ވަކި މުއްދަތެއް ނެތް ގޮތަށް އަހަރުތަކެއް ވަންދެން މީހުން ބަންދު ކުރާ ތަންތަނުގައި ރެފިއުޖީން ބައިތިއްބާތީ އދ. އާއި އެހެން ފަރާތްތަކުން ފާޑުކިޔާފައި ވެ އެވެ.
