ސަރުކާރު މުވައްޒަފުންނަށް މުސާރަ ޖަމާވާ ދުވަހު ގައުމީ ޓީމުތަކަށް ކުޅޭ ކުޅުންތެރިންގެ އެލަވަންސް ވެސް މިހާރު ލިބޭނެ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
އެމްއެމްޕީއާރްސީގެ ހިޔާނާތުގެ މައްސަލައިގެ ތަހުގީގުގައި ޕްރޮސިކިއުޓާ ޖެނަރަލްގެ އޮފީހުން ގޮތެއް ނިންމަންދެން ޔޫތު މިނިސްޓަރު މަހުލޫފު މަސައްކަތް ތަކުން އެކަހެރި ކުރުމަށް ރައީސް އިބްރާހިމް މުހައްމަދު ސޯލިހު ވަނީ ނިންމަވައިފަ އެވެ.
މިއަދު މަހުލޫފް ކުރެއްވި ޓްވީޓެއްގައިވަނީ ގައުމީ ޓީމުތަކުގެ ކުޅުންތެރިންގެ އެލަވަންސްތައް ބަރާބަރަށް ގަވާއިދުން ލިބުމުގެ މައްސަލަ އަށް ހައްލު ހޯދާފައިވާ ކަމަށް ވިދާޅުވެފަ އެވެ.
"ގައުމީ ޓީމު ކުޅުންތެރިންގެ ފަރާތުން ލިބުނު އެންމެ ބޮޑު އެއް ޝަކުވާ އަކީ އެލަވަންސް މަހުން މަހަށް ނުލިބި ލަސްވާ މައްސަލަ، 6 މަސް ވެސް ލަސް ވެފަ އެބަހުރި،" މަހުލޫފް ޓްވީޓް ކުރެއްވި އެވެ.
"ނަމަވެސް ސަރުކާރު މުވައްޒަފުންނަށް މުސާރަ ޖަމާވާ ދުވަހު ކުޅުންތެރިންގެ އެލަވަންސް ވެސް އޭޕްރީލް މަހުން ފެށިގެން މިހާރު ޖަމާވާނެ،"
މި ސަރުކާރުން ވަނީ ކުޅިވަރު ކުޅުންތެރިންނަށް މީގެ ކުރިން އެލަވަންސް ދެމުން އައި ގިންތިތައް އުވާލައިފަ އެވެ. އަދި ހުރިހާ ކުޅުންތެރިންނަށް ވެސް އެއްވަރަށް އެލަވަންސް ލިބޭ ގޮތަށް ހަމަޖެއްސި އެވެ. އެއީ މަހެއްގެ މައްޗަށް 5000 ރުފިޔާ އެވެ.
މިދިޔަ އަހަރު މެއި މަހު ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މަހުލޫފް ވިދާޅުވީ މަހެއްގެ މައްޗަށް ގައުމީ ޓީމުތަކުގެ 328 ކުޅުންތެރިންނަށް ގާތްގަނޑަކަށް 1.4 މިލިއަން ރުފިޔާ ހަރަދުކުރާ ކަމަށެވެ.
މީގެ ކުރިން ޔޫތު މިނިސްޓްރީން ކުޅުންތެރިންގެ އެލަވަންސް ޖަމާކުރަމުން އަންނަނީ އެސޯސިއޭޝަންތަކުން ލިސްޓު ފޮނުވުމުންނެވެ. އެކަމަކު އޭރު އެންމެ އެކަށީގެންވާ ސްޕީޑެއްގައި އެކަން ކުރިއަށް ނުދެ އެވެ. މިހާރު އަމަލުކުރަމުން އަންނަ ގޮތަކީ ކޮންމެ މަހެއްގެ 15 ވަނަ ދުވަހުގެ ކުރިން އެސޯސިއޭޝަންތަކުން ޔޫތު މިނިސްޓްރީ އަށް ލިސްޓު ފޮނުވާން ޖެހޭނެ އެވެ. އޭރުން މިނިސްްޓްރީގެ މުވައްޒަފުންގެ މުސާރައާ އެކު ގައުމީ ކުޅުންތެރިންގެ އެލަވަންސް ވެސް ލިބޭނެ އެވެ.
