ރޯމް (ޖޫން 12) - ޔޫރޯ ފުޓްބޯޅަ މުބާރާތުގެ ފުރަތަމަ މެޗުގައި ރޭ ތުރުކީގެ އަތުން 3-0 އިން އިޓަލީ އަށް ލިބުނީ ފުރިހަމަ މޮޅެއް ކަމަށާއި އެކަމަކު އަދި އެ ޓީމު ފުރަތަމަ މެޗުން މާ ބޮޑަށް އުއްމީދުތައް މަތިކުރުމުގެ ބަދަލުގައި އޮތީ ހަމަބިމުގައި ކަމަށް އިޓަލީގެ ކޯޗު ރޮބާޓޯ މަންޗިނީ ބުނެފި އެވެ.
ރޯމްގެ އޮލިމްޕިކް ސްޓޭޑިއަމްގައި ރޭ ކުޅުނު މެޗުގައި އިޓަލީން ތިން ގޯލު ޖެހީ ވެސް ދެ ވަނަ ހާފްގަ އެވެ. ފުރަތަމަ ގޯލަކީ ތުރުކީގެ ޑިފެންޑަރު މެރީހް ޑެމިރާލް އަތުން ބައިކޮޅަށް ވަން ގޯލެކެވެ. އޭގެ ފަހުން ޗީރޯ އިމޯބިލޭ އާާއި ލޮރެންޒޯ އިންސީނިއޭ ވަނީ އިޓަލީގެ އަނެއް ދެ ގޯލު ޖަހައިފަ އެވެ.
މިއީ އިޓަލީން ޔޫރޯ ތާރީހުގައި ކުޅުނު 39 މެޗުގެ ތެެރެއިން އެއް މެޗެއްގައި ތިން ގޯލު ޖެހި ފުރަތަމަ ފަހަރެވެ. އަދި ޖެހިޖެހިގެން ބައިކޮޅަށް ގޯލެއް ނުވަދެ ފުރިހަމަ ކުރި ނުވަ މެޗެވެ. މަންޗިނީ ރޭގެ މެޗަށް ފަހު ބުނީ މި ފިޔަވަޅު މަތީ ކުރިއަށްދާން ބޭނުންވާ ކަމަށެވެ.
"މިއީ ވަރަށް އުފާވެރި ވަގުތެއް. އެކަމަކު އަހަރެމެން މި ތިބީ ހަމަބިމުގައި. އަދި އެބައޮތް ކުރަން ޖެހޭ ބައިވަރު ކަންކަން. އެކަމަކު އަހަރެންގެ ހިތް އެދޭ ކަމެއް އެބައޮތް. މި ފަދަ އުފާވެރި ގޮތަކަށް އިތުރު ހަ މެޗު ނިންމާލުން. އޭރު ތިބޭނީ ބޭނުންވާ މަންޒިލުގައި،" އިޓަލީ ގައުމީ ޓީމަށް ކުރިން ކުޅުނު މަންޗިނީ ބުންޏެވެ.
އޭނާ ބުނީ ތުރުކީން ފުރަތަމަ ހާފުގައި ވަރަށް ރަނގަޅަށް ޑިފެންސްކުރި ކަމަށާއި އިޓަލީ އަށް ފައިދާކުރީ ކެތްތެރިކަމާ އެކު ފުރުސަތު ލިބެންދެން ޓެކްޓިކްސް އަށް ސަމާލުވެގެން ކުރި މަސައްކަތުން ކަމަށެވެ.
"އަހަރެން ދިޔައީ ބުނަމުން ލަނޑެއް ނުޖެހުނަސް ޓީމު ނުރޫޅެން. އެ ގޮތަށް ކުޅުންތެރިން ތިބީ. އޭގެ ފައިދާކޮށްފި،" އިޓަލީ ގޮވައިގެން އެންމެ ފަހުން ކުޅުނު 28 މެޗުން ބަލިނުވެ ނިންމާލި ކޯޗު މަންޗިނީ ބުންޏެވެ.
ތުރުކީގެ ކޯޗު ސެނިއޯލް ގުނެޝް ބުނީ މުޅި މެޗަށް ބަލާއިރު އިޓަލީ އަށް ލިބުނީ ހައްގު މޮޅެއް ކަމަށާއި އޭނާގެ ޓީމު އަތުން ދެ ވަނަ ހާފުގައި ގިނަ ގޯސްތަކެއް ހެދުނު ކަމަށެވެ.
"މިއީ އަހަރެމެންގެ ދުވަހެއް ނޫން. އަހަރެމެން އަތުން (ދެ ވަނަ ހާފްގައި) ބޯޅަ ގެއްލެން ފަށައިފި. ކުރިއަށް ބޯޅައެއް ނުގެންދެވޭ. އިޓަލީ އަކީ މޮޅަށް ކުޅުނު ޓީމު. އެ ޓީމަށް މޮޅެއް ހައްގު،" 2002 ވަނަ އަހަރުގެ ވޯލްޑް ކަޕްގެ ތިން ވަނަ ތުރުކީ އަށް ހޯދައިދިން ކޯޗު ގުނެޝް ބުންޏެވެ.
ތުރުކީގެ ކުޅުންތެރިން ވަނީ ރޭގެ މެޗުން ބަލިވުމުން އެ ގައުމުގެ ފުޓްބޯޅަ ސަޕޯޓަރުން ކިބައިން މަައާފަށް އެދިފަ އެވެ. އަދި ދެން އޮތް ސްވިޒަލެންޑާއި ވޭލްސް މެޗުން ރަނގަޅު ނަތީޖާއެއް ނެރޭނެ ކަމަށް އެ ޓީމުގެ ކުޅުންތެރިން ވަނީ ބުނެފަ އެވެ.
ޔޫރޯގެ ތާރީހުގައި ތުރުކީ މުބާރާތުގައި ކުޅުނު ފުރަތަަމަ މެޗަކުން އަދި މޮޅުވެފައިނުވެ އެވެ. ފަސް ފަހަރު ޔޫރޯގައި ވާދަކުރިއިރު، ގްރޫޕް ސްޓޭޖުގެ ފުރަތަމަ މެޗުން ބޭނުންވާ ކަމެއް ހާސިލެއްނުވި އެވެ.
