ކުރީގެ ރައީސް މައުމޫން އަބްދުލްގައްޔޫމްގެ އަނބިކަނބަލުން، ނަސްރީނާ އިބްރާހިމް ކޮވިޑް-19 އަށް ޕޮޒިޓިވްވެއްޖެ އެވެ.
މައުމޫންގެ ޕާޓީ، އެމްއާރުއެމްގެ ސެކްރެޓަރީ ޖެނެރަލް އަބްދުލްއަލީމް މިރޭ ވިދާޅުވީ މެޑަމް ނަސްރީނާގެ ހާލުކޮޅު ރަނގަޅު ކަމަށެވެ. އެކަމަނާ ހުންނެވީ ގޭގައި ކަމަށް ވިދާޅުވި އެވެ.
"ދެ ޑޯޒު ވެކްސިން ވެސް ފުރިހަމަ ކުރައްވައިގެން ހުންނެވީ،" އަލީމް ވިދާޅުވި އެވެ.
ނަސްރީނާ ބައްޔަށް ޕޮޒިޓިވްވި އިރު، މިދިޔަ އަހަރުގެ އޮގަސްޓް މަހުގެ ތެރޭގައި ރައީސް މައުމޫނަށް މި ބަލީގައި އެޑްމިޓްކޮށްގެން ފަރުވާ ދޭން ޖެހުނެވެ. ބަލީގައި ހައި ރިސްކް ބޭފުޅަކަށް ވާތީ އެމަނިކުފާނު އޮންނެވީ ދަރުމަވަންތަ ހޮސްޕިޓަލުގައި ކޮވިޑަށް ހާއްސަ އައިސީޔޫ، ޑީއެޗް11ގަ އެވެ.
އެ ފަހަރު މައުމޫން ފިޔަވައި އާއިލާގެ އެހެން ބޭފުޅުން ބައްޔަށް ޕޮޒިޓިވެއް ނުވެ އެވެ.
ބަލިން ފަސޭހަފުޅުވެގެން، ގެއަށް ވަޑައިގެން މައުމޫން ގެންދަވަނީ މި ބަލިން ރައްކާތެރިވުމަށް ތަފާތު މެސެޖްތަކުން މީހުން ހޭލުންތެރި ކުރައްވަމުންނެވެ. އެގޮތުން ކޮވިޑް ވެކްސިންގެ ދެ ޑޯޒު ފުރިހަމަ ކުރައްވަން ބާރު އަޅުއްވަ އެވެ. އަދި ހެލްތު ޕްރޮޓެކްޝަން އޭޖެންސީގެ އިރުޝާދުތަކަށް އެންމެން ބޯލަނބައި، ބަލިން ވީހާވެސް އަވަހަކަށް ދިވެހިންނަށް އަރައިގަނެވޭނެ މަގަށް މަސައްކަތް ކުރަން ވެސް ނަސޭހަތްތެރިވެވަޑައިގަންނަވަ އެވެ.
ކޮވިޑް-19ގެ ފިޔަވަޅުތަކުގައި މާބޮޑަށް ދޫދީފި ނަމަ ނުވަތަ ގިނަ ބަޔަކަށް ފެތުރެމުންދާ ދަނޑިވަޅުތަކުގައި، އެމްއާރުއެމުން ބަޔާން ނެރެ، ފިޔަވަޅުތައް ހަރުކަށިކުރަން ގޮވާލައްވަ އެވެ.
ކޮވިޑް19 ގައި ރާއްޖެ އިން އެންމެ ގިނަ ބަޔަކު މަރުވީ މިދިޔަ މަހުގަ އެވެ. ބަލި ކޮންޓްރޯލުން ނެއްޓި ފެތުރެން ފެށުމުން ސަރުކާރުން ވަނީ ފިޔަވަޅުތައް ހަރުކަށި ކޮށްފަ އެވެ. އާއްމުން ބޭރުތެރޭގައި އުޅުން މަދުކުރަން ގެއަކުން ބޭރަށް ނުކުމެވޭ އަދަދު ވެސް އޮތީ ކޮންޓްރޯލްކޮށްފަ އެވެ.
