ޗެކް ރިޕަބްލިކުން ޔޫރަޕްގެ ޗެމްޕިއަންކަން ހޯދިއިރު، އެ ޓީމަށް ކިޔަނީ ޗެކޮސްލޮކިއާ އެވެ. އެއީ 1976 ވަަނަ އަހަރު އެވެ. އެންމެ ފަހުން ކުޅުނު ހަތް ޔޫރޯގައި ވެސް ވާދަކުރި ޗެކް ރިޕަބްލިކުން މި ފަހުން މި މުބާރާތުގައި އެންމެ ރަނގަޅު ކާމިޔާބެއް ހޯދީ 2004 ވަނަ އަހަރު ޕޯޗުގަލްގައި ބޭއްވި މުބާރާތުގަ އެވެ. އެ ފަހަރު އެ ޓީމުން ވަނީ ސެމީ ފައިނަލުގައި ވާދަކޮށް މުބާރާތުގެ ޗެމްޕިއަންކަން ހޯދި ގްރީސް އަތުން ބަލިވެފަ އެވެ. މީގެ ހަތަރު އަހަރު ކުރިން ފްރާންސްގައި ބޭއްވި ޔޫރޯގައި ޗެކް ރިޕަބްލިކް ނިންމާލަން ޖެހުނީ ގްރޫޕް ސްޓޭޖުންނެވެ.
ކޮލިފައިން ގްރޫޕް އޭގެ ރަނަރަޕްގެ ގޮތުގައި މި ފަހަރުގެ ޔޫރޯ އިން ފުރުސަތު ހޯދި ޗެކް ރިޕަބްލިކުން ވަނީ ކޮލިފައިންގައި ކުޅުނު އަށް މެޗުގެ ތެރެއިން ފަސް މެޗުން މޮޅުވެފަ އެވެ. އޭގެ ތެރޭގައި ކޮލިފައިން ގްރޫޕްގެ އެއް ވަަނަ ހޯދި އިންގްލެންޑް އަތުން ހޯދި މޮޅު ހިމެނެ އެވެ. މި ފަހަރުގެ ޔޫރޯގައި ވެސް އިންގްލެންޑާ އެއް ގްރޫޕެއްގައި ޗެކް ރިޕަބްލިކް ލައްވާލިއިރު، އިންގްލެންޑާ ދެކޮޅަށް ކުޅޭ މެޗު ފޯރިގަދަވާނެ ކަމަށް ބެލެވެ އެވެ.
ޗެކް ރިޕަބްލިކްގެ ނަމުގައި ކުޅެން ފެށި ފަހުން އެ ޓީމުގެ ރަން ޖީލުގެ ގޮތުގައި ފާހަގަވީ 2004 ގައި ކުޅުނު ޓީމެވެ. ގޯލްކީޕަރު ޕީޓަ ޗެކާއި މިޑްފީލްޑަރު ޕަވެލް ނެޑްވެޑާއި ތޯމަސް ރޮސިކީ އަދި ފޯވާޑް މިލާން ބަރޯސް ފަދަ ކުޅުންތެރިންނަކީ އޭރު ޔޫރަޕްގެ ފުޓްބޯޅައިގައި މަގުބޫލު ނަންތަކެވެ. މި ވަގުތު އޮތް ޗެކް ރިޕަބްލިކް ޓީމުގައި ހިމެނޭ މަޝްހޫރު ކުޅުންތެރިންނަކީ ކޮލިފައިންގައި އެ ޓީމަށް އެންމެ ގިނަ ގޯލު (4) ޖަހައިދިން ޕެޓްރިކް ޝިކް، ވެސްޓް ހޭމް ޔުނައިޓެޑް މެދުތެރޭގައި މޮޅު ކުޅުމެއް ދެއްކި ތޯމަސް ސޫޝެކް އަދި ހާތާ ބާލިން މެދު ތެރޭގައި މަސައްކަތުގެ ރޭޓް ރަނގަޅު ކުޅުންތެރިއެއްގެ ގޮތުގައި ފާހަގަކުރެވޭ ވްލަޑިމީރް ޑަރީޑާ އެވެ.
ޗެކް ރިޕަބްލިކްގެ ކޯޗު ޔަރޯސްލާވް ސިލްހަވީ
ކޯޗު: ޔަރޯސްލާވް ސިލްހަވީ
ޔަރޯސްލާވް ސިލްހަވީ އަކީ ޗެކް ރިޕަބްލިކް ލީގުގައި އެންމެ ގިނަ މެޗު ކުޅުނު ކުޅުންތެރިޔާ އެވެ. އޭނާ ޗެކް ރިޕަބްލިކްގެ ކޯޗުކަމާ ހަވާލުވީ 2018 ވަނަ އަހަރުގެ ސެޕްޓެމްބަރު މަހު އެވެ. ޑިފެންސިވް ޓެކްޓިކްސް އަށް އިސްކަންދޭ ސްޓައިލަކަށް ކުޅުވި ނަމަވެސް ޔަރޯސްލާވް އަކީ ނަތީޖާ ނެރުމުގައި ރަނގަޅު މަސައްކަތްތަކެއް ކުރާ ކޯޗެކެވެ.
ސްކޮޑު
ކީޕަރުން: ތޯމަސް ވަސްލިކް (ސެވިއްޔާ)، ޔިރީ ޕަވްލެންކާ (ވާޑާ ބްރެމެން)، އަލޭސް މެންޑޯސް (ސިގްމާ އޮޮލޮމޯކް)
ޑިފެންޑަރުން: ޕަވެލް ކަޑަރަބެކް (ހޮފެންހައިމް)، އޮންދްރޭ ސެލުސްޓްކާ (ސްޕާޓާ ޕްރާގު)، ތޯމަސް ކަލާޝް (ބްރިސްޓަލް ސިޓީ)، ޔޭން ބޮރީލް (ސްލާވިއާ ޕްރާގް)، ޔަކޫބް ބްރާބެކް (ވިކްޓޯރިއާ ޕްލެޒެން)، ވްލަޑިމީރް ސޫފާލް (ވެސްޓް ހޭމް)، ތޯމަސް ހޯލްސް (ސްލާވިއާ ޕްރާގް)(، އަލެސް މަޓޭއީޔޫ (ބްރެޝިއާ)، ޑޭވިޑް ޒިމާ (ސްލާވިއާ ޕްރާގް)
މިޑްފީލްޑަރުން: ވްލަޑިމީރް ޑަރީޑާ (ހާތާ ބާލިން)، ޔަކޫބް ޖެންކްޓޯ (ސަމްޑޯރިއާ)، ތޯމަސް ސޫޝެކް (ވެސްޓް ހޭމް)، ލޫކަސް މަސޮޕުސްޓް (ސްލާވިއާ ޕްރާގް)، އެންޓޮނީން ބަރަކް (ހެލަސް ވެރޯނާ)، އަލެކްސް ކްރާލް (ސްޕާޓާ މޮސްކޯ)، ޕީޓާ ސެވްޝްސިކް (ސްލާވިއާ ޕްރާގް)، އެޑަމް ހްލޯޒެކް (ސްޕާޓާ ޕްރާގް)، ޔަކޫބް ޕެސެކް (ސްލޯވަން ލިބެެރެކް)
ފޯވާޑުން: މަޓޭއި ވީޑްރާ (ބަންލީ)، މިކައެލް ކްރެމެންޝިކް (ޕީއޭއޯކޭ)، ޕެޓްރިކް ޝިކް (ލެވަކޫސަން)، ތޯމަސް ޕެކާޓް (ލެހިއާ ވޯސޯ)
