ޑެންމާކުން ޔޫރަޕްގެ ޗެމްޕިއަންކަން 1992 ވަަނަ އަހަރު ހޯދިއިރު، އެ މުބާރާތުގެ ފުރުސަތު އެ ޓީމަށް ލިބުނީ ވެސް ތަފާތު ގޮތަކަށެވެ. މުބާރާތް ފެށެން އެންމެ 10 ދުވަހަށް ވެފައި ވަނިކޮށް ޔޫގޯސްލާވިއާ މުބާރާތުން ވަކިކުރަން ޖެހުނީ އެ ގައުމު ބައިބައިވުމުގެ މައްސަލައިގެ ތެރެއިން އުފެދުނު ހިޔާލުތަފާތުވުންތަކާ ހެދި އެވެ. އެ ފަހަރު ފައިނަލުގައި ޑެންމާކުން ވަނީ ޖަރުމަނު ބަލިކޮށްފަ އެވެ.
ޑެންމާކަކީ މި ފަހަރުގެ ޔޫރޯ އަށް މެޗަކުން ބަލިނުވެ ކޮލިފައިވި ޓީމެކެވެ. ކޮލިފައިން ގްރޫޕްގެ އެއް ވަނަ ޓީމުގެ ގޮތުގައި މުބާރާތަށް ކޮލިފައިވި ޑެންމާކުން ވަނީ ކޮލިފައިންގައި ކުޅުނު އަށް މެޗުގެ ތެރެއިން ހަތަރު މެޗުން މޮޅުވެ، ހަތަރު މެޗުން އެއްވަރުވެފަ އެެވެ. ޑެންމާކުން ކޮލިފައިންގައި ޖުމްލަ 23 ގޯލު ޖެހިއިރު، ބައިކޮޅަށް ވަނީ އެންމެ ހަ ގޯލެވެ. މިއީ ޑެންމާކުން ޔޫރޯގައި ކުޅޭ ނުވަ ވަަނަ ފަހަރެވެ. އެންމެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯ އަށް ޑެންމާކް ކޮލިފައިނުވެ އެވެ
ކޮލިފައިންގައި ޑެންމާކަށް އެންމެ ގިނަ ގޯލު ޖަހައިދިނީ މިޑްފީލްޑަރު ކްރިސްޓިއަން އެރިކްސަން އެވެ. ގައުމީ ޓީމަށް 100 އަށް ވުރެ ގިނަ މެޗު ކުޅެދީފައިވާ އެރިކްސަން އަކީ މި ފަހަރު ޔޫރޯގައި ޑެންމާކުން އެންމެ ވިދާލާނެ ކުޅުންތެރިޔާ އެވެ. އޭނާގެ އިތުރުން ވެސް އެ ޓީމުގައި ފާހަގަކޮށްލެވޭ އެހެން ކުޅުންތެރިން އެބަތިއްބެވެ. އޭގެ ތެރޭގައި ބޮލޯނިއާގެ ފޯވާޑް އަންޑްރެއަސް ސްކޯވް އޮލްސެން އާއި އާރްބީ ލައިޕްޒިގުގެ ފޯވާޑް ޔޫސެފް ޕޯލްސަން ހިމެނެ އެވެ. އަދި ބާސެލޯނާގެ ފޯވާޑް މާޓީން ބްރައިތުވެއިޓާއި ޓޮޓެންހަމްގެ މިޑްފީލްޑަރު ޕިއޭ އެމީލް ހޮއިބިއާ އަކީ ވެސް ފާހަގަކޮށްލެވޭ ކުޅުންތެރިންނެވެ.
ކޯޗު: ކެސްޕާ ޖޮލްމަންޑް
ޑެންމާކް ޔޫރޯ އަށް ކޮލިފައިކޮށްދިން ކޯޗު އެގާ ހަރެއިޑާ ވަނީ މިދިޔަ އަހަރުގެ ޖުލައި މަހުގެ ތެރޭގައި މަގާމުން ވަކިވެފަ އެވެ. އޭނާ އަކީ ޑެންމާކް ޔޫރޯ އަށް ކޮލިފައިކޮށްދިން ކޯޗެވެ.އެކަމަކު އަމިއްލަ ސަބަބުތަކާ ހުރެ ޓީމާ ވަކިވާން ނިންމީ އެވެ. ދެން ޑެންމާކާ ހަވާލުވީ އެ ގައުމުގެ ކްލަބްތަކުގައި މަސައްކަތްކުރި ކޯޗު ޖޮލްމަންޑް އެވެ.
ސްކޮޑު
ކީޕަރުން: ކެޝްޕާ ޝްމައިކަލް (ލެސްޓާ ސިޓީ) ޖޮނަސް ލޮސްލް (މިޓްޔައެލަންޑް)، ފްރެޑެރިކް ރޯނޯ (ޝާލްކާ)
ޑިފެންޑަރުން: ޔެންސް ސްޓްރައިގާ ލާސެން (އުދިނޭޒީ)، ސިމޮން ކިއޭ (އޭސީ މިލާން)، އަންޑްރެއަސް ކްރިސްޓައެންސަން (ޗެލްސީ)، ޔަކީމް އެންޑަސަން (ފުލަމް)، ޑެނިއަލް ވަސް (ވެލެންސިއާ)، މަތައިސް ޔޯގެންސަން (ކޮޕެންހާގެން)، ޔަކީމް މައޭލީ (އެޓަލަންޓާ)، ޔެނިކް ވެސްޓެގާޑް (ސައުތެމްޓަން)، ނިކޮލައި ބޮއިލަސެން (ކޮޕެންހާގެން)
މިޑްފީލްޑަރުން: މަތައިސް ޔެންސެން (ބްރެންޓްފޯޑް)، ކްރިސްޓިއަން ނޯގާޑް (ބްރެންޓްފޯޑް)، ޕިއޭ-އެމީލް ހޮއިބިއާ (ޓޮޓެންހަމް)، ތޯމަސް ޑެލަނީ (ބޮރޫޝިއާ ޑޯޓްމަންޑް)، އަންޑާސް ކްރިސްޓިއަންސެން (މަލްމޯ)، ކްރިސްޓިއަން އެރިކްސެން (އިންޓަ މިލާން)، މިކެލް ޑަމްސްގާޑް (ސަމްޑޯރިއާ)، ރޮބާޓް ސްކޯވް (ހޮފެންހައިމް)
ފޯވާޑުން: މާޓިން ބްރައިތުވެއިޓް (ބާސެލޯނާ)، އަންޑްރެއަސް ކޮނޭލިއަސް (ޕާމާ)، އަންޑްރެއަސް ސްކޯވް އޮލްސެން (ބޮލޯނިއާ)، ޔޫސެފް ޕޯލްސަން (އާރްބީ ލައިޕްޒިގު)، ކެޝްޕާ ޑޯލްބާގް (ނީސް)، ޖޮނަސް ވިންޑް (ކޮޕެންހާގެން)
