މެޑްރިޑް (ޖޫން 9) - ހަތަރު ދުވަހުގެ ތެރޭގައި ސްޕެއިންގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވްވުމުން އެ ޓީމުގެ ގްރޫޕް ފަރިތަކުރުންތައް ވަގުތީ ގޮތުން ހުއްޓާލައިފި އެވެ.
ފަރިތަކުރުންތައް މެދުކަނޑާލިއިރު، ހުކުރު ދުވަހު ފަށާ ޔޫރޯގައި ސްޕެއިން ކުޅޭ ފުރަތަަމަ މެޗަށް ބާކީ އޮތީ ފަސް ދުވަހެވެ.
މިދިޔަ އާދިއްތަ ދުވަހު އެންމެ ފުރަތަމަ ކޮވިޑަށް ޕޮޒިޓިވްވީ ސްޕެއިން ކެޕްޓަން ސާޖިއޯ ބުސްކެޓްސް އެވެ. އޭގެ ފަހުން ކުރި ޓެސްޓްތަކުން ހުރިހާ ކުޅުންތެރިންނާއި އޮފިޝަލުން ވީ ކޮވިޑަށް ނެގެޓިވް އެވެ. އެކަމަކު އިއްޔެ ޑިފެންޑަރު ޑިއޭގޯ ލޮރެންޓޭ ކޮވިޑަށް ޕޮޒިޓިވްވުމާ އެކު ހާލަތު އިތުރަށް ގޯސްވެދާނެތީ ސަލާމަތީ ފިޔަވަޅު ވަރުގަދަކުރަން ނިންމި އެވެ.
ސްޕެއިން ފުޓްބޯޅަ ފެޑެރޭޝަނުން ވަނީ ހާލަތު ގޯސްވެފައިވާތީ ޓީމުގެ ގްރޫޕް ފަރިތަކުރުންތައް މި ވަގުތަށް ހުއްޓާލައިފަ އެވެ. ކުޅުންތެރިންނަށް އަންގާފައިވަނީ އިންޑިވިޖުއަލް ޓްރެއިނިންތައް ފިޓްނަސް ކޯޗުން އަންގާ ގޮތަށް ކުރިއަށް ގެންދިއުމަށާއި ވެކްސިން ޖެހުމާއި ޓީމުގެ ހާލަތަށް ބަދަލު އައިހާ އަވަހަކަށް ގްރޫޕް ޓްރެއިނިންތައް ފަށާނެ ކަމަށެވެ.
ފުރަތަމަ ބުސްކެޓްސް ޕޮޒިޓިވްވުމުން ސްޕެއިނުން ވަނީ އެ ޓީމުގެ ހާލަތު ގޯސްވެދާނެ ކަމަށް ބަލައި ސްކޮޑަށް ހަ ކުޅުންތެރިން އިތުރުކޮށްފަ އެވެ. އަދި ރޭ ލިތުއޭނިއާއާ ދެކޮޅަށް ކުޅެން އޮތް މެޗު ސްޕެއިންގެ ޒުވާން ޓީމު ކުޅޭ ގޮތަށް ހަމަޖެއްސި އެވެ. ސްޕެއިނުން ވަނީ އެ މެޗުގައި ކުޅުނު ގިނަ ޒުވާން ކުޅުންތެރިންތަކެއް ޔޫރޯ ސްކޮޑަށް އިތުރުކޮށްފަ އެވެ. މިހާރު ސްކޮޑަށް އިތުރުކުރި ކުޅުންތެރިންގެ ޖުމްލަ ވަނީ 17 އަށް އަރައިފަ އެވެ.
އެ ކުޅުންތެރިންގެ ތެރެއިން އެންމެ ފުރަތަމަ އިތުރުކުރި ހަ ކުޅުންތެރިންނަކީ ލީޑްސް ޔުނައިޓެޑްގެ ފޯވާޑް ރޮޑްރީގޯ މޮރޭނޯ، ވެސްޓް ހޭމްގެ ޕަބްލޯ ފޯނާލްސް، ވެލެންސިއާގެ ކާލޯސް ސޯލާ، ސެލްޓަގެ ބްރައިސް މެންޑޭޒް، ވިޔަރެއާލްގެ ކެޕްޓަން ރައުލް އަލްބިއޯލް އަދި ގޯލްކީޕަރަކަށް އިތުރުކުރީ ޗެލްސީގެ ކީޕަރު ކެޕާ އަރިއްޒަބަލާގާ އެވެ.
އަދި ފަހުން ސްކޮޑުގައި ހިމެނީ ޒުވާން ޓީމުގެ ތަރިންނެވެ. އެއީ އަލްވާރޯ ފެނާންޑޭޒް، އޮސްކާ މިންގޭޒާ، މާކް ކުކުރެއްލާ، ބްރަޔާން ގިލް، ހުއާން މިރަންޑާ، ގޮންޒާލޯ ވިޔާ، އަލެހަންދްރޯ ޕޯޒޯ، ބްރަހިމް ޑިއާޒް، މާޓިން ޒުބިމެންޑީ، ޔެރެމީ ޕީނޯ އަދި ހަވީ ޕުއާޑޯ އެވެ.
މިދިޔަ ބުރާސްފަތި ދުވަހުގެރޭ ސްޕެއިނުން ލަނޑެއް ނުޖެހި ޕޯޗުގަލްއާ އެއްވަރުވި މެޗުގައި ބުސްކެޓްސް އާއި ލޮރެންޓޭ ވަނީ ކުޅެފަ އެވެ. އެކަމަކު ބުސްކެޓްސް އާއި ލޮރެންޓޭ އަށް ސްޕެއިނުން ޔޫރޯގައި ކުޅޭ ފުރަތަމަ މެޗުގައި ނުކުޅެވޭނެ އެވެ. އެއީ ޕޮޒިޓިވްވާ ކުޅުންތެރިން 10 ދުވަހަށް އައިސޮލޭޝަނަކަށް ދިއުން ލާޒިމުކޮށްފައިވާތީ އެވެ.
ޔޫރޯގައި ސްޕެއިން ކުޅޭ ފުރަތަމަ މެޗު އޮންނާނީ އަންނަ ހޯމަ ދުވަހު ސްވިޑެންއާ ދެކޮޅަށެވެ. ދެ ވަނަ މެޗުގައި މި މަހު 19 ވަނަ ދުވަހު ޕޮލެންޑާ ބައްދަލުުކުރާނެ އެވެ. އަދި ގްރޫޕްގެ ފަހު މެޗުގައި ސްލޮވާކިއާއާ ދެކޮޅަށް ކުޅޭނީ 23 ގަ އެވެ.
ޔުއެފާ އިން ކަނޑައަޅާފައިވާ ގަވާއިދުގައިވާ ގޮތުން އަންނަ ހޮނިހިރު ދުވަހުގެ ނިޔަލަށް ކޮންމެ ޓީމަކަށް ވެސް ޔޫރޯ ސްކޮޑަށް ބަދަލު ގެނެވޭނީ ހާއްސަ ހާލަތެއްގަ އެވެ. އެއީ އަނިޔާގެ މައްސަލަތަކާއި ކޮވިޑް-19ގެ ކޭސްތައް ޓީމުތަކަށް ކުރިމަތިވާ ގޮތް ބެލުމަށް ފަހު އެވެ. ކޮންމެ ޓީމެއް 26 ކުޅުންތެރިންނަށް ވުރެ ގިނަ ނުވާ ގޮތަށް ސްކޮޑު ހުށަހަޅަން ފުރަތަމަ ދިން މުހުލަތު ހަމަވީ މި މަހުގެ އެއް ވަނަ ދުވަހު އެވެ.
