މެޑްރިޑް (ޖޫން 7) - ޔޫރޯ ފުޓްބޯޅަ މުބާރާތުގައި ސްޕެއިން ކުޅެން އޮތް ފުރަތަމަ މެޗަށް އަށް ދުވަހަށް ވެފައި އޮއްވައި އެ ޓީމުގެ މުހިއްމު މިޑްފީލްޑަރު ސާޖިއޯ ބުސްކެޓްސް ކޮވިޑް-19 އަށް ޕޮޒިޓިވްވެއްޖެ އެވެ.
އުމުރުން 32 އަހަރުގެ ބުސްކެޓްސް މިދިޔަ ބުރާސްފަތި ދުވަހުގެރޭ ވަނީ ސްޕެއިނާއި ޕޯޗުގަލް ލަނޑެއް ނުޖެހި އެއްވަރުވި މެޗުގައި ކުޅެފަ އެވެ. އެ މެޗު ކުޅުމުގެ ކުރިން ހުރިހާ ކުޅުންތެރިން ކޮވިޑަށް ޓެސްޓްކުރިއިރު، ބުސްކެޓްސް ނެގެޓިވް އެވެ.
ބުސްކެޓްސް ޕޮޒިޓިވްވީ މާދަމާރޭ ސްޕެއިނުން ލިތުއޭނިއާއާ ދެކޮޅަށް ސްޕެއިން ކުޅެން އޮތް އެކުވެރިކަމުގެ މެޗުގެ ކުރިން ކުރި ޓެސްޓްތަކުންނެވެ. ބުސްކެޓްސް ޕޮޒިޓިވްވިއިރު، މި މަހު 14 ވަނަ ދުވަހު އެ ޓީމުން ސްވިޑެންއާ ދެކޮޅަށް ޔޫރޯގައި ކުޅޭ މެޗު ފެށެން މިހާރު މި އޮތީ ހަފްތާ އަކަށް ވެފަ އެވެ. އެ މެޗުގައި އޭނާ އަށް ކުޅެވުމުގެ ފުރުސަތު ވަރަށް ކުޑަ އެވެ.
ބުރާސްފަތި ދުވަހުގެރޭ ޕޯޗުގަލްއާ ދެކޮޅަށް ކުޅުނު މެޗުގެ ތެރެއިން ބުސްކެޓްސް ބޯޅަ ހިފައިގެން.
އިއްޔެ ސްޕެއިންގެ މުޅި ސްކޮޑުގެ ހުރިހާ މެމްބަރުން ޓެސްޓްކުރިއިރު، ޕޮޒިޓިވްވީ ބުސްކެޓްސް އެކަންޏެވެ. ބުސްކެޓްސް ޕޮޒިޓިވްވުމާ އެކު އޭނާގެ އިތުރުން ދެން ކޮންޓެކްޓްވި އެންމެން ވަނީ އައިސޮލޭޓް (އެކަހެރި) ކޮށްފަ އެވެ.
ކޮންޓެކްޓްވި މީހުން ދޫކޮށްލާނީ އިތުރު ޓެސްޓްތަކެއް ހެދުމަށް ފަހު އެވެ. ބައެއް މީޑިއާ ރިޕޯޓްތައް ބުނާގޮތުން ބުސްކެޓްސްއާ ކޮންޓެކްޓް ވެގެން ފަސް ކުޅުންތެރިއަކާއި ދެ އޮފިޝަލަކު ވަނީ އައިސޮލޭޓްކޮށްފަ އެވެ.
ބުސްކެޓްސް ޕޮޒިޓިވްވުމާ އެކު ސްޕެއިން ސީނިއާ ޓީމުގެ ބަދަލުގައި މާދަމާރޭ ލިތުއޭނިއާއާ ދެކޮޅަށް ކުޅޭނީ ސްޕެއިންގެ 21 އަހަރުން ދަށުގެ ޓީމެވެ. ސްޕެއިން ސީނިއާ ޓީމު ކުޅޭތަން ބަލަން އެ މެޗަށް ޓިކެޓް ނެގި މީހުންގެ ޓިކެޓްތައް ރިފަންޑް ކޮށްދޭން ސްޕެއިން ފުޓްބޯޅަ ފެޑެރޭޝަނުން ވަނީ ނިންމައިފަ އެވެ.
ޔޫރޯގައި ސްޕެއިނާއި އެއް ގްރޫޕެއްގައި ސްވިޑެންގެ އިތުރުން ދެން އޮތީ ޕޮލެންޑާއި ސްލޮވާކިއާ އެވެ.
