ލަންޑަން (ޖޫން 9) - ރަސްމީ ފެޑެރޭޝަންތަކާ ދެކޮޅަށް ގެންނަން އުޅުނު ޔޫރަޕިއަން ސުޕަ ލީގުގެ ފައުންޑަރު ކްލަބްތަކުގެ ތެރޭގައި ހިމެނުމަށް ފަހު އެ ލީގުން ވަކިވި އިނގިރޭސި ޕްރިމިއާ ލީގުގެ ހަ ކްލަބް ޖޫރިމަނާކުރަން އެ ލީގުން ނިންމައިފި އެވެ.
މިދިޔަ އޭޕްރީލް މަހު 18 ވަަނަ ދުވަހު 12 ކްލަބާ އެކު ސުޕަ ލީގު އިއުލާނުކުރި ނަމަވެސް އެކި ފިއްތުންތަކާ ހުރެ 72 ގަޑިއިރު ވެސް ނުވަނީސް އޭގެ ތެެރެއިން ނުވަ ޓީމެއް ވަނީ އެ ލީގުން ވަކިވެފަ އެވެ.
ސުޕަ ލީގުން ވަކިވި ކްލަބްތަކަކީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް، ޗެލްސީ އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ. ލީގުން އަދިވެސް ވަކިނުވެ އޮތީ ސްޕެއިނުގެ ރެއާލް މެޑްރިޑާއި ބާސެލޯނާ އަދި އިޓަލީގެ ޔުވެންޓަސް އެވެ.
ޔުއެފާ އިން ސުޕަ ލީގުން ވަކިވި ނުވަ ޓީމަށް މިދިޔަ މަހު ދީފައިވާ އަދަބަކީ ހުރިހާ ޓީމެއް އެކުވެގެން 13.4 މިލިއަން ޕައުންޑްގެ ޖޫރިމަނާއެއް ދެއްކުމެވެ. އޭގެ އިތުރުން އެއް ސީޒަން ވަންދެން މި ކްލަބްތަކަށް ޔުއެފާ މެދުވެރިކޮށް ލިބޭ ފައިސާގެ ފަސް ޕަސެންޓް ޔުއެފާ އަށް ނެގުމެވެ. އަދި މުސްތަގުބަލުގައި މި ފަދަ ޔުއެފާގެ އުސޫލާ ހިލާފު ޕްރޮޖެކްޓްތަކުގައި ބައިވެރިވެއްޖެނަމަ 100 މިލިއަން ޕައުންޑްގެ ޖޫރިމަނާއެއް އަންނާނެކަން އަންގާފައިވެ އެވެ.
އިނގިރޭސި އެފްއޭ އިން މިއަދު އެ ގައުމުގެ ހަ ކްލަބަށް ދިން އަދަބަކީ ހުރިހާ ކްލަބެއް އެކުވެގެން 21 މިލިއަން ޕައުންޑް ދެއްކުމަށެވެ. އެއީ ކޮންމެ ކްލަބަކުން 3.5 މިލިއަން ޕައުންޑެވެ. މިއާ އެކު ސުޕަ ލީގުގައި ބައިވެރިވި އިނގިރޭސި ކޮންމެ ކްލަބެއް އަތުން ޖޫރިމަނާގެ ގޮތުގައި މި ވަގުތު ފަސް މިލިއަން ޕައުންޑް ދައްކަން ޖެހޭނެ އެެވެ. އެއީ ޔުއެފާ އާއި ޕްރިމިއާ ލީގުގެ ޖޫރިމަނާ އެއްކޮށްލުމުން ދައްކަން ޖެހޭ އަދަދެވެ.
ޕްރިމިއާ ލީގުން ޖޫރިމަނާކުރުމުގެ އިތުރުން ކްލަބްތަކަށް އަންގާފައިވަނީ ލީގުގެ ގަވާއިދު ހުއްދަ ނުދޭ ޕްރޮޖެކްޓެއްގައި ދެން ބައިވެރިވެއްޖެނަމަ އެ ޓީމެއް ޖޫރިމަނާ ކުރުމުގެ އިތުރުން ޕޮއިންޓް އުނިކުރާނެ ކަމަށެވެ. މި ފަދަ ކަމެއްގައި ދެން ކްލަބަކުން ޝާމިލުވެއްޖެނަމަ އެންމެ ފުރަތަމަ 20 މިލިއަން ޕައުންޑުން ޖޫރިމަނާ ކުރުމުގެ އިތުރުން 30 ޕޮއިންޓް އުނިކުރަން ވަނީ ކަނޑައެޅި އާ އުސޫލުގައި ހިމަނައިފަ އެވެ.
އަދި ހާލަތުގެ ގޮތުން ބެލުމަށް ފަހު އެ ޓީމެއް ލީގުން ސަސްޕެންޑް ކުރަން ވެސް ނިންމަން ޖެހިދާނެ ކަމަށް ލީގުން ވަނީ އަންގައިފަ އެވެ.
ސުޕަ ލީގުގައި މި ވަގުތު އޮތް ރެއާލާއި ބާސެލޯނާ އިން އަންނަނީ ލީގުގެ ދިފާއުގައި އަދިވެސް ވާހަކަ ދައްކަމުންނެވެ.
ޔުއެފާގެ ރައީސް އެލްކްސަންޑަ ކެފެރިން ދާދި ފަހުން ވިދާޅުވީ ބާސެލޯނާ އާއި ރެއާލް އަދި ޔުވެންޓަސް އަށް އަދިވެސް ފުރުސަތު އެބައޮތް ކަމަށާއި ސުޕަ ލީގުން ވަކިވެ މައާފަށް އެދިއްޖެނަމަ ކުޑަ އަދަބަކުން ސަލާމަތް ވެވޭނެ ކަމަށެވެ. ޔުވެންޓަސް އިން އަންނަނީ އެ ކަމަށް ވިސްނަމުންނެވެ. އެކަމަކު ބާސެލޯނާގެ ރައީސް ޖޮއާން ލަޕޯޓާ ވަނީ މައާފަަށް ނޭދޭނެ ކަމަށް ވިދާޅުވެފަ އެވެ. އޭނާ ވިދާޅުވީ ސުޕަ ލީގުން ވުޖޫދުވުމަށް ހުރަހެއް ނެތް ކަމަށް ސްޕެއިންގެ ކޯޓަކުން ނިންމާފައިވާ ނިންމުމެއް އެބައޮތް ކަމަށެވެ.
