ހަމަލާ ބަދަލު ކުރަން ފަށާފާނެ ކަމުގެ ބިރަށް ކެންސަލް ކުރި ޔަހޫދީ ނެޝަނަލިސްޓުންގެ ހިނގާލުން ބޭއްވުމުގެ ހުއްދަ އިޒްރޭލް ސަރުކާރުން ދީފި އެވެ.
"ދިދައިގެ ހިނގާލުން" ބާއްވައިފި ނަމަ ހަމަލާ ދޭނެ ކަމުގެ އިންޒާރު ގާޒާ ކޮންޓްރޯލް ކުރާ ހަމާސް ޖަމާއަތުން ދިނުމުން އެކަން އިންތިޒާމް ކުރި ފަރާތުން ނިންމީ ކެންސަލް ކުރުމަށެވެ.
ނަމަވެސް ވެރިކަމުގެ ފަހު ދުވަސްތައް ގުނަމުންދާ ބޮޑު ވަޒީރު ބެންޖަމިން ނަތަންޔާހޫގެ ސަރުކާރުން ވަނީ އެ ހިނގާލުން ބޭއްވުމުގެ ހުއްދަ ދީފަ އެވެ.
މިދިޔަ ބުރާސްފަތި ދުވަހު ހިނގާލުން ބާއްވަން މަސައްކަތް ކުރީ ގުދުސްގައި މުސްލިމުން ގިނައިން ދިރިއުޅޭ "މުސްލިމް ކުއާޓާ" ސަރަހައްދު ގަ އެވެ.
ނަމަވެސް ބޮޑު ހަމަނުޖެހުމެއް އުފެދުމުގެ ބިރާއެކު އެ ހިސާބުގައި ހިނގާލުން ނުބޭއްވޭނެ ކަމަށް ފުލުހުން އެންގި އެވެ. ސަރުކާރުން ހުއްދަ ދިނުމުން ދެން ހިނގާލުން ބާއްވާނީ އަންނަ އަންގާރަ ދުވަހު އެވެ.
ހިނގާލުން ބާއްވައިފި ނަމަ ހަމަލާ ދޭން ޖެހިދާނެ ކަމުގެ އިންޒާރު ހަމާސްއިން ދީފައި ވާއިރު، މިދިޔަ މަހު ހަމާސް އާއި އިޒްރޭލާ ދެމެދު 11 ދުވަސް ވަންދެން ހަމަލާ ބަދަލު ކުރި އެވެ. އެ ހަމަލާ ބަދަލު ކުރުމުގައި ގާޒާއިން 250 މީހުން އަދި އިޒްރޭލުން 13 މީހުން މަރުވި އެވެ.
"ދިދައިގެ ހިނގާލުން" ބޭއްވިޔަސް މައްސަލައެއް ނެތް ކަމަށް ނަތަންޔާހޫގެ ކެބިނެޓުން ފާސްކުރީ އިއްޔެ ކުރިއަށް ދިޔަ ބައްދަލުވުމެއްގަ އެވެ.
އެ ގޮތަށް ނިންމާފައި ވާއިރު، އަށް ޕާޓީއެއް ގުޅިގެން އުފެއްދި އާ ކޯލިޝަން ސަރުކާރަށް ރުހުން ދިނުމުގެ މައްސަލަ އަންނަ އާދީއްތަ ދުވަހު ގާނޫނު ހަދާ މަޖިލިސް، ކަނޭސެތުގައި އޮންނާނެ އެވެ.
ކޯލިޝަން ސަރުކާރަށް ރުހުން ލިބިއްޖެ ނަމަ އިޒްރޭލުގައި އެންމެ ގިނަ ދުވަސް ވަންދެން ބޮޑު ވަޒީރުގެ މަގާމު ފުރުއްވި ނަތަންޔާހޫގެ ވެރިކަން ނިމުމަކަށް އަންނާނެ އެވެ.
އެގޮތަށް ދިމާވެއްޖެ ނަމަ، "ދިދައިގެ ހިނގާލުން" ބޭއްވުމުގެ މައްސަލަ އާ ސަރުކާރުން މުރާޖައާ ކުރާނެ ކަމަށް ބެލެވެ އެވެ. ނަމަވެސް އާ ސަރުކާރުގެ ބޮޑު ވަޒީރު ކަމުގައި ހުންނަވާނެ ނަފްތާލީ ބެނެޓްއަކީ ވެސް ޔަހޫދީންގެ ކުރިއެރުމަށް މަސައްކަތް ކުރާ މީހެކެވެ.
"ދިދައިގެ ހިނގާލުމަކީ" އާއްމުކޮށް "ޖެރުސަލަމް ޑޭ" ނުވަތަ ގުދުސް ދުވަހާ ދިމާކޮށް ބާއްވާ މޭ 10 ގައި ކޮންމެ އަހަރަކު ވެސް ބާއްވާ ހިނގާލުމެކެވެ. ނަމަވެސް ހަމަލާ ބަދަލު ކުރުން ކުރިއަށް ދާތީ އެ ދުވަހު މި އަހަރުގެ ހިނގާލުން ނުބޭއްވުނެވެ.
އެ ދުވަހަކީ އިޒްރޭލުން 1967 ގެ ހަނގުރާމައިގައި އިރުމަތީ ގުދުސްއަށް ވެރިވެގަނެ، ޔަހޫދީންގެ ބާރުގެ ދަށަށް އެތަން ގެންދިޔަ ދުވަހެވެ.
އެކަން ފާހަގަކުރަން ކޮންމެ އަހަރަކު ވެސް އެތައް ސަތޭކަ ޔަހޫދީންނެއް އިޒްރޭލުގެ ދިދަތައް ހިފައިގެން ގުދުސްގައި މުސްލިމުން ދިރިއުޅޭ ހިސާބުގެ މަގުތަކުގައި ހިނގަ އެވެ.
ފަލަސްތީނު މީހުން ދެކޭ ގޮތުގައި އެ ހިނގާލުމަކީ މައްސަލަ ހޫނުކޮށް، ހަމަނުޖެހުން އުފެއްދުމުގެ މަގްސަދުގައި ޔަހޫދީން ބާއްވާ ހިނގާލުމެކެވެ.
