އާންމު ތަނެއްގައި ވަކި މީހަކީ އިސްލާމްދީނާ ދެކޮޅު މީހެއް ކަމަށް ތުހުމަތުކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހަދަން ގާނޫނުލްއުގޫބާތަށް ސަރުކާރުގެ ފަރާތުން ހުށަހަޅާފައިވާ އިސްލާހު، ރައީސް އިބްރާހިމް މުހައްމަދު ސޯލިހު ދިފާއު ކުރައްވައިފި އެވެ.
ސަރުކާރުގެ ފަރާތުން ތުޅާދޫ ދާއިރާގެ މެންބަރު ހިސާން ހުސެއިން ރައްޔިތުންގެ މަޖިލީހަށް ހުށަހަޅާފައިވާ ބިލާ ގުޅިގެން ވަނީ ހިޔާލު ތަފާތުވުންތަކެއް އުފެދިފަ އެވެ. އެ ބިލުގައިވާ ބައެއް ކަންކަމަށް ތާއިދު ނުކުރާކަން ސަރުކާރު ކޯލިޝަން ތެރޭގައި ހިމެނޭ އަދާލަތު ޕާޓީ އާއި ޖުމްހޫރީ ޕާޓީން ވެސް ވަނީ ބުނެފަ އެވެ.
އޭގެއިތުރުން ބައެއް ދީނީ އިލްމްވެރިން ވެސް އެކަމާ ނުރުހުން ފާޅުކޮށް، ބިލާ ދެކޮޅަށް ކެމްޕެއިނެއް ވެސް ވަނީ ފަށާފަ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ ނަފުރަތު އުފެއްދުން ކުށަކަށް ހެދުމަށް ހުށަހެޅި ބިލްގެ ބޭނުމަކީ މީހުންގެ ތެރޭގައި ނަފުރަތު އުފައްދައި، އޭގެ ސަބަބުން މީހުންގެ ފުރާނަ އާއި މުދަލަށް ގެއްލުންވާ ހިސާބަށް ކަންކަން ދާތީ، އެކަން ހުއްޓުވުން ކަމަށެވެ.
އެއީ، އެއްވެސް ހާލެއްގައި ވަކި ބަޔަކަށް އަމާޒުކޮށް އެއްވެސް ފަރާތަކުން ފާޅުކުރާ ހިޔާލަކަށް ހުރަސް އެޅުމުގެ ގޮތުން ސަރުކާރުން ހުށަހެޅި ބިލެއް ނޫން ކަމަށް ރައީސް ސޯލިހު ވިދާޅުވި އެވެ.
"އޭގެ ބޭނުމަކަށް ވެފައި މިއޮތީ އެއްވެސް ފަރާތަކުން ހުށަހަޅާ ހިޔާލަކަށް ހުރަސް އެޅުމެއް ނޫން، އެހެންނަމަވެސް، ފާޅުކުރާ ހިޔާލަކުން ނަފުރަތު އުފެދި އެ ބޮޑު ފިތުނައަކަށް ބަދަލުވެ ފުރާނައަށް ގެއްލުންވާ ހިސާބަށްދާތީ އެކަން ހުއްޓުވުން،" ރައީސް ވިދާޅުވި އެވެ.
ނަމަވެސް، ބިލާމެދު ރައްޔިތުންގެ ހިޔާލު ތަފާތުވުންތަކެއް އެބަހުރިކަން އެނގިވަޑައިގަންނަވާ ކަމަށާއި އެ ކަންކަމަށް ބަލައި ސަރުކާރުން ވެސް ބިލަށް ބަދަލު ގެންނަން ޖެހޭ ކަންކަން ފާހަގަކުރަމުންދާނެ ކަމަށް ރައީސް ވިދާޅުވި އެވެ.
އަދި، ރައްޔިތުންގެ މަޖިލީހުގައި ބިލަށް ބަހުސްކޮށް، ކޮމިޓީން ދިރާސާކުރާއިރު ރައްޔިތުންގެ ހިޔާލުތަކާއި ކަންބޮޑުވުންތަކަށް ރިއާޔަތް ކުރާނެކަމުގެ ޔަގީންކަން ވެސް އެބަ އޮތް ކަމަށް ރައީސް ސޯލިހު ވިދާޅުވި އެވެ.
ނަފުރަތުގެ އަމަލު ހިންގުމަކީ ކުށެއް ކަމަށް ކަނޑައަޅަން ހުށަހެޅި އިސްލާހާ ގުޅިގެން ރައްޔިތުން ފާޅުކުރަމުންދާ ކަންބޮޑުވުމަށް ހައްލެއް ހޯދައިދިނުމުގެ ގޮތުން މިހާރު ބަންޑާރަ ނައިބުގެ އޮފީހުން ވަނީ ގާނޫނުލްއުގޫބާތަށް އިސްލާހު ހުށަހެޅުމަށް އިތުރު ބިލެއް ވެސް ތައްޔާރުކޮށްފަ އެވެ.
ސަރުކާރުން މި ބިލު ހުށަހެޅުމުގެ ބޭނުމަކީ، ގާނޫނުލްއުގޫބާތުގެ 617 ވަނަ މާއްދާގައި މިހާރުވެސް ކުށެއް ކަމުގައިވާ "އިސްލާމްދީނާ އިދިކޮޅު އަމަލުތައް" އިތުރަށް ތަފްސީލުކުރުމެވެ. އަދި، އެ ކުށުގެ އަމަލުގެ ތެރޭގައި، އިސްލާމްދީނަށް ފުރައްސާރަކުރުމުގެ އަމަލުތައް ވަކިން ހިމަނައި، އިސްލާމްދީނަށް ފުރައްސާރަކުރުމަކީ ކުށެއްކަން ސާފުވާގޮތަށް އެ މާއްދާގައި ބަޔާންކުރުމެވެ.
ގާނޫނުލްއުގޫބާތަށް މިހާރު ހުށަހަޅާފައިވާ އިސްލާހު
ގާނޫނުލްއުގޫބާތަށް ގެންނަން މަޖިލީހުގެ މެންބަރު ހިސާން ހުސެއިން ހުށަހަޅުއްވާފައިވާ އިސްލާހަކީ ދީނީ އެއްބައިވަންތަކަން އިތުރަށް ދަމަހައްޓައި، މީހުންނާމެދު ނަފުރަތު އުފެދޭނެ ވާހަކަތައް ހުއްޓުވުމުގެ މަގުސަދުގައި ގެންނަ އިސްލާހެކެވެ.
އިސްލާހުގައިވާ ގޮތުން، އާންމު ތަނެއްގައި ވަކި މީހަކީ އިސްލާމްދީނާ ހިލާފަށް ނޫނީ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމާއި، މީހެއްގެ އިސްލާމީ އަގީދާއާ ގުޅުވައި އެ މީހަކާމެދު ނަފްރަތު އުފެއްދުމުގެ އިތުރުން، މުސްލިމަކު ކާފަރެއްގެ ގޮތުގައި ސިފަކުރުމާއި އެކަމުގައި ބައިވެރިވުމަކީ ކުށެކެވެ.
އެއީ ޖުނަހުގެ އެއް ވަނަ ދަރަޖައިގެ ކުށެއް ކަމަށް އެ އިސްލާހުގައި ބުނެފައިވާއިރު، ގާނޫނުލްއުގޫބާތުގެ ދަށުން އެ ދަރަޖައިގެ ކުށަށް ދެވޭނެ އެންމެ ބޮޑު އަދަބަކީ އެއް އަހަރުގެ ދުވަހުގެ ޖަލު ހުކުމެވެ.
މީގެ އިތުރުން، މީހެއްގެ ސިޔާސީ ފިކުރަށް ބަލައި، އެމީހަކަށް ޖިސްމާނީ އަނިޔާއެއް ދިނުމާއި ބައިވެރިވުމާއި އެފަދަ ކަމެއް ރޭވުން ވެސް ވަނީ ކުށަކަށް ހަދަން ހުށަހަޅާފަ އެވެ. އެ ކުށުގެ އަދަބެއްގެ ގޮތުގައި ކަނޑައަޅާފައިވަނީ ޖިނާޔަތުގެ ހަތަރެއް އަދި ފަސް ވަނަ ދަރަޖަ އެވެ. އޭގެ މާނައަކީ އެފަދަ ކުށެއް ސާބިތުވާ މީހަކަށް ދެ އަހަރާއި ހަތަރު އަހަރާ ދެމެދުގެ ޖަލު ހުކުމެއް އައުމެވެ.
މީގެ އިތުރުން، މީހެއްގެ ނަސްލަށާއި، އުފަންވީ ގައުމަށް ނުވަތަ ކުލަޔަށް ބަލައި، އެމީހަކަށް ޖިސްމާނީ އަނިޔާއެއް ދިނުމާއި، ބައިވެރިވުމާއި ރޭވުމަކީ ވެސް ކުށެއް ކަމަށް އެ އިސްލާހުގައި ބުނެފައިވެ އެވެ.
އެފަދަ އަމަލެއް ހިންގައިގެން މީހެއްގެ ފުރާނަ ގެއްލިއްޖެނަމަ، އެ މީހަކަށް މަރުގެ އަދަބު ނޫނީ އުމުރަށް ޖަލަށް ލުމުގެ އަދަބު އެ އިސްލާހުގައި ވަނީ ކަނޑައަޅައިފަ އެވެ. އަދި، އޭގެ ތެރެއިން ކުށެއް ކުރީ މީހަކު ރަހީނުކޮށްގެން، ޖިންސީ އަނިޔާ ދީގެން ނޫނީ މަރާލާނެ ކަމުގެ އިންޒާރު ދީގެން ނަމަ، އަދަބެއްގެ ގޮތުގައި 15 އަހަރުގެ ޖަލު ހުކުމެއް އަންނާނެ އެވެ.
