އިޒްރޭލުން ވެރިވެގަނެފައިވާ އިރުމަތީ ގުދުސްގެ ބައެއް ސަރަހައްދުތަކުގެ ގެތަކުން ފަލަސްތީން މީހުން ނެރުމާ ދެކޮޅަށް މުޒާހަރާތައް ރޭވުމުގައި އިސްކޮށް އުޅޭ އެކްޓިވިސްޓު މުނާ އަލް ކުރްދު ހައްޔަރުކޮށްފި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ ގުދުސްގެ ޝެއިހް ޖައްރާ ހިސާބުގަނޑުގައި މުނާ ދިރިއުޅޭ ގެޔަށް އިޒްރޭލް ފުލުހުން ވަދެ، އަތުގައި ބިޑި އަޅުވައިގެން ގެންދާ މަންޒަރެވެ.
ފުލުހުން ބުނީ އުމުރުން 23 އަހަރުގެ މުނާއަށް ތުހުމަތު ކުރަނީ ހަމަނުޖެހުން ހިންގުމުގައި ބައިވެރިވި ކަމަށެވެ.
މުނާގެ އެއްމާބަނޑު ބޭބެ، މުހައްމަދު އަލް ކުރްދު ވަނީ އޭނާގެ ފަހަތުން ފުލުސް އޮފީހަށް ގޮސް، އަމިއްލައަށް މައުލޫމާތު ދީފަ އެވެ. އެއާއެކު ފަހުން އެ ދެ މީހުން ދޫކޮށްލި އެވެ.
މުނާ އަދި މުހައްމަދު.-- ފޮޓޯ: ގެޓީ އިމޭޖަޒް
ރޯދަ މަހު އަލް އަގްސާ މިސްކިތުގައި ނަމާދު ކުރަން ހުރި ދަތިތަކާއެކު ޝެއިހް ޖައްރާ ސަރަހައްދުގެ ގެތަކުން ފަލަސްތީނު މީހުން ނެރުމަށް މަސައްކަތް ކުރުމުން ގުދުސްގައި އެއްވުންތައް ބޭއްވި އެވެ.
އެއްވުންތަކަށް ފުލުހުން ހަމަލާ ދިނުމުން، އެކަމާ ނުރުހުންވެ ގާޒާގައި ވެރިކަން ކުރާ ހަމާސްއިން އިޒްރޭލަށް ރޮކެޓް ހަމަލާ ފޮނުވަން ފެށި އެވެ.
ރައްދުގައި އިޒްރޭލުން ގާޒާއަށް ބޮން އަޅަން ފަށައި، ދެ ފަރާތުގެ ދެމެދުގައި ހަމަލާ ބަދަލު ކުރުން ހުއްޓާލީ 11 ދުވަސް ފަހުންނެވެ. އޭރު ގާޒާއިން 250 އަށް ވުރެ ގިނަ މީހުން މަރުވެއްޖެ އެވެ.
މުނާ ހައްޔަރު ކުރުމުގެ ކުރިން ފުލުހުން ވަނީ މިދިޔަ ހޮނިހިރު ދުވަހު އަލް ޖަޒީރާގެ ނޫސްވެރިޔާ ގިވާބާ ބުދެއިރީ ވެސް ހައްޔަރުކޮށް އަނިޔާކޮށްފަ އެވެ.
އޭނާ ދޫކޮށްލީ ކުރިއަށް އޮތް 15 ދުވަހަށް ޝެއިހް ޖައްރާ ސަރަހައްދަށް ދިޔުން މަނާ ކުރުމަށް ފަހު އެވެ. އިޒްރޭލް ފުލުހުން އޭނާއަށް ތުހުމަތު ކުރީ އަންހެން ފުލުހެއްގެ ގައިގައި ޖެހި ކަމަށެވެ.
