އިޒްރޭލުން ވެރިވެގަނެފައިވާ އިރުމަތީ ގުދުސްގެ ޝެއިހް ޖައްރާ ސަރަހައްދުގައި އޮތް މުޒާހަރާއެއް ރިޕޯޓް ކުރަމުން ދިޔަ އަލް ޖަޒީރާގެ ނޫސްވެރިޔާ ގިވާރާ ބުދެއިރީ ހައްޔަރު ކުރުމަށް ފަހު ދޫކޮށްލައިފި އެވެ.
އަލް ޖަޒީރާއިން ބުނީ ބުދެއިރީ ހައްޔަރު ކުރުމުގައި އިޒްރޭލް ފުލުހުން އޭނާއަށް އަނިޔާ ކުރި ކަމަށާއި އަދި އަލް ޖަޒީރާގެ މަސައްކަތަށް ބޭނުން ކުރާ ސާމާނަށް ގެއްލުން ދިން ކަމަށެވެ.
އިއްޔެ ބުދެއިރީ ހައްޔަރު ކުރުމުން ނޫސްވެރިކަމުގެ މިނިވަންކަމަށް އަޑު އުފުލާ ފަރާތްތަކުން އޭނާ މިނިވަން ކުރުމަށް ގޮވާލާ ޕްރެޝަރު ކުރަން ފެށި އެވެ.
"އެ މީހުން [އިޒްރޭލް ފުލުހުން] ކުއްލިއަކަށް ހުރިހާ ފަރާތަކުން އައިސް ވަށާލީ. ނޭނގެ ކީއްވެ ކަމެއް، އެ މީހުން އަޅުގަނޑުގެ ގައިގައި ފައިން ޖަހައި ފާރަކަށް ކޮއްޕާލީ،" ރޭ ދޫކޮށްލުމުން އަލް ޖަޒީރާއަށް ދިން އިންޓަވިއުގައި ބުދެއިރީ ބުންޏެވެ.
"ކާރު ތެރޭގައި ވެސް އެ މީހުން ދިޔެއީ ފައިން ޖަހައި އަނިޔާ ކުރަމުން... ހުރިހާ ދިމާލަކުން ގައިގައި ތަޅަމުން ދިޔައީ."
ބުދެއިރީއަށް ހަމަލާ ދިން އިރު އޭނާ ރިޕޯޓު ކުރަމުން ދިޔެއީ ފަލަސްތީން މީހުން ކޮންމެ އަހަރަކު ފާހަގަކުރާ "ނަކްސާ" ގެ 54 ވަނަ އަހަރީ ދުވަހާ ގުޅިގެން ކުރިއަށް ދިޔަ އެއްވުމެކެވެ. "ނަކްސާ" އަކީ 1967 ގައި އިޒްރޭލުން އިރުމަތީ ގުދުސް، ހުޅަނގު އައްސޭރި އަދި ގާޒާ އަޅުވެތި ކުރުމަށް ދީފައިވާ ނަމެކެވެ.
އެކަމާ ގުޅޭ އެއްވުން ޝެއިހް ޖައްރާގައި ބޭއްވިއިރު، އެ ތަނުގައި ދިރިއުޅޭ ފަލަސްތީނު މީހުން ގެތަކުން ނެރުމަށް މަސައްކަތް ކުރާތީ ވެސް ހުއްޓުމެއް ނެތި ދަނީ މުޒާހަރާ ކުރަމުންނެވެ.
ބުދެއިރީ އަކީ 2000 ވަނަ އަހަރުން ފެށިގެން އަލް ޖަޒީރާގައި މަސައްކަތް ކުރަމުން އަންނަ ނޫސްވެރިއެކެވެ. އޭނާ ހައްޔަރު ކުރި ވަގުތު ހުރީ ނޫސްވެރިންކަން އަންގައިދޭ ޖެކެޓު ލައިގެން ޕްރެސް ކާޑު ހިފައިގެންނެވެ.
އިޒްރޭލް ފުލުހުން އޭނާއާ މެދު ކުށްވެރިއެއްގެ ގޮތުގައި އަމަލު ކުރީ އިޒްރޭލުގެ އަންހެން ފުލުހެއްގެ ގައިގައި އޭނާ ޖެހި ކަމަށް ތުހުމަތުކޮށްފަ އެވެ. ނަމަވެސް އެކަން އޭނާ ދޮގުކުރެ އެވެ.
ބުދެއިރީ ދޫކޮށްލާފައި ވަނީ ކުރިއަށް އޮތް 15 ދުވަހު ޝެއިހް ޖައްރާ ސަރަހައްދަށް ނުދިޔުމަށް ޝަރުތު ކުރުމަށް ފަހު އެވެ.
