ހުޅަނގު އައްސޭރިއަކީ އިޒްރޭލުގެ ބިމެއްގެ ގޮތުގައި ކަނޑައަޅަން ތާއީދުކުރާ ނަފްތާލީ ބެނެޓްއާއެކު ކޯލިޝަން ހެދުމަށް ޔުނައިޓެޑް އަރަބް ލިސްޓް (ޔޫއޭއެލް) ޕާޓީން ނިންމުމުން ފަލަސްތީން މީހުންގެ ފާޑުކިޔުން އަމާޒުވެއްޖެ އެވެ.
ޔޫއޭއެލްގެ ލީޑަރު މަންސޫރު އައްބާސް ވަނީ ހިޔާލު ތަފާތުވުންތައް އެއް ފަރާތްކޮށް، އުމުރުން 49 އަހަރުގެ ބެނެޓްއާއެކު ކޯލިޝަން އެއްބަސްވުމެއްގައި ސޮއިކުރައްވާފަ އެވެ. ޔޫއޭއެލްއާއެކު ޖުމްލަ އަށް ޕާޓީ އެ ކޯލިޝަނުގައި ހިމެނެ އެވެ.
ޕާޓީތަކުގެ މެދުގައި ފިކުރީ ތަފާތުވުންތައް ހުރިއިރު، އެއްބަސްވާ ހަމައެކަނި ކަމަކީ މިހާރުގެ ބޮޑު ވަޒީރު ބެންޖަމިން ނަތަންޔާހޫގެ 12 އަހަރުވީ ވެރިކަން ނިމުމަކަށް ގެންނަން ޖެހޭ ކަމެވެ.
ކޯލިޝަން އެއްބަސްވުމުގެ ދަށުން ކުރިއަށް އޮތް ދެ އަހަރު ބޮޑު ވަޒީރުކަން ލިބިވަޑައިގަންނަވާ ބެނެޓްއަކީ ދާދި ފަހަކާ ޖެހެންދެން ނަތަންޔާޔޫއަށް ވަފާތެރި މީހެކެވެ. އޭނާއަކީ ފަލަސްތީނާ މެދު ހަރުކަށި ވިސްނުން ގެންގުޅޭ، މުޅި ބިމުގެ ސަރަހައްދަށް އިޒްރޭލުގެ ކޮންޓްރޯލް އޮންނަން ޖެހޭ ކަމަށް ގަބޫލުކުރާ މީހެކެވެ.
އިޒްރޭލުގައި ދިރިއުޅޭ އަރަބިން ނުވަތަ ފަލަސްތީން ރައްޔިތުން ހިމެނޭ ޔޫއޭއެލް ޕާޓީން އެފަދަ މީހަކާއެކު ކޯލިޝަން ހެދުން ދިފާއުކޮށް، ފަލަސްތީނުގެ ރައީސް މަހްމޫދު އައްބާސް ވިދާޅުވީ އެއްބަސްވުމުގެ ސަބަބުން އިޒްރޭލުގައި ދިރިއުޅޭ ފަލަސްތީން މީހުންގެ ދިރިއުޅުމަށް ކުރިއެރުން ލިބޭނެ ކަމަށެވެ.
އިޒްރޭލުގެ ޖުމްލަ އާބާދީގެ ނުވަ މިލިއަންގެ ތެރެއިން 20 ޕަސެންޓަކީ ފަލަސްތީން މީހުންނެވެ. އެ ނިންމުން ދިފާއުކޮށް އައްބާސް ވާހަކަދެއްކެވި އިރު، ފަލަސްތީންގެ ގިނަ މީހުން ތިބީ ހިތްހަމަނުޖެހިފަ އެވެ.
އިޒްރޭލުގައި ފަލަސްތީން މީހުން ތަމްސީލް ކުރާ އެންމެ ބޮޑު ގްރޫޕަކީ ގިނަ ޕާޓީތައް އެކުލެވޭ ޖޮއިންޓް އަރަބް ލިސްޓް ކޯލިޝަނެވެ. މިދިޔަ މާޗް މަހުގެ އާއްމު އިންތިހާބުގެ ކުރިން އައްބާސް ވަނީ އެ ކޯލިޝަނާ ވަކިވެ ވަޑައިގެން ޔޫއޭއެލްގެ ނަމުގައި ޕާޓީއެއް އުފައްދަވާފަ އެވެ.
އޭގެ ސަބަބުން ގާނޫނު ހަދާ މަޖިލިސް ކަނޭސެތުގައި ފަލަސްތީން މީހުން ތަމްސީލް ކުރުމުގެ މަސައްކަތަށް ހީނަރުކަން އައެވެ. އައްބާސްގެ ޔޫއޭއެލްއަށް މަޖިލީހުން ހަތަރު ގޮނޑި ލިބުނު އިރު، ބެނެޓްއާ އެކު އެކުލަވާލި އެއްބަސްވުމުގެ ދަށުން ފަލަސްތީން މީހުން ދިރިއުޅޭ ހިސާބުތަކުގެ ތަރައްގީއަށް 16 ބިލިއަން ޑޮލަރު ލިބިފައިވާ ކަމަށް އޭނާ ވިދާޅުވި އެވެ.
އޭގެ އިތުރުން ހުއްދަ ނެތި އިޒްރޭލުގައި ދިރިއުޅެން އަޅާފައިވާ ފަލަސްތީން މީހުންގެ ގެތައް ސުންނާފަތި ނުކުރާނެ ކަމުގެ ޔަގީންކަން ވެސް އެއްބަސްވުމުގެ ދަށުން ދީފައިވެ އެވެ.
ނަމަވެސް ޔޫއޭއެލްގެ ނިންމުމަށް ފާޑުކިޔާ ފަރާތްތައް ބުނަނީ އިޒްރޭލުގައި އުޅޭ ފަލަސްތީން ރައްޔިތުންގެ ދައުރަކަށް ވާން ޖެހޭނީ އެ ތަނުގައި އަމަލުކުރާ ނިޒާމާ ދެކޮޅުހަދައި ފަލަސްތީން ރައްޔިތުންގެ ހައްގު ދިފާއު ކުރުން ކަމަށެވެ.
އޭގެ އިތުރުން ތަފާތު ގިނަ ފިކުރު ހިމެނޭ ކޯލިޝަން ވުޖޫދަށް އައިއިރު ވެސް ބަލިކަށި ކަމަށާއި އެފަދަ ކޯލިޝަނެއްގެ ތެރެއިން ލިބޭނެ ފައިދާއެއް ނެތް ކަމަށް ވެސް އެ މީހުން ބުނެ އެވެ.
އިޒްރޭލުގައި އުޅޭ ފަލަސްތީނު ރައްޔިތުންގެ ހައްގުގައި އަޑުއުފުލާ މުސާވާ ސެންޓަރުގެ ޑިރެކްޓަރު ޖައުފަރް ފަރާހް ވިދާޅުވީ އެއްބަސްވުމުގެ ދަށުން ކުށް މަދު ކުރުމާއި ބޯހިޔާވަހިކަން ފަދަ މައްސަލަތަކަށް ކޮންމެވެސް ވަރެއްގެ ހައްލެއް ލިބިދާނެ ކަމަށެވެ.
"އެކަމަކު މި ކަންކަމަކީ ނަތަންޔާހޫގެ ސަރުކާރުން ވެސް ބަލަމުން އައި ކަންކަން. އެހެންވީމާ މިއީ އެއްބަސްވުމުގެ ސަބަބުން ލިބޭ އާ ކަންކަމެއް ނޫން،" އޭނާ ވިދާޅުވި އެވެ.
އޭނާ ވިދާޅުވި ކުދި މައްސަލަތަކަށް ފޯކަސް ކުރުމުގެ ބަދަލުގައި ފަލަސްތީނު މީހުންގެ ލީޑަރުން ބަލަންވީ އަޅުވެތިކަމުން ސަލާމަތްވެވޭނެ ގޮތްތައް ހޯދަން ކަމަށެވެ.
ފަލަސްތީނު މީހުންގެ ބަލާދް ޕާޓީގެ ލީޑަރު ސާމީ އަބޫ ޝެހާދޭ އަލް ޖަޒީރާއަށް ވިދާޅުވީ ކޯލިޝަން ހެދުމުން ފަލަސްތީނު މީހުންނާ އައްބާސްއާ އޮތް ގުޅުން ކެނޑިފައިވާ ކަމަށެވެ.
"ހަރުކަށި ސަރުކާރެއް، އެއީ އިޒްރޭލާއި އިޒްރޭލުން އަޅުވެތިކޮށްފައިވާ ސަރަހައްދުގައި އުޅޭ ފަލަސްތީނު ރައްޔިތުންގެ ހައްގުތަކާ ދެކޮޅު ސަރުކާރަކާ ބައިވެރިވާން އައްބާސް ނިންމެވި ނިންމުމަކީ ނުރައްކާތެރި ނިންމުމެއް،" އޭނާ ވިދާޅުވި އެވެ.
