އަފްގާނިސްތާނުން އެމެރިކާ އާއި ނޭޓޯގެ ސިފައިން ފައިބަމުން ދާތީ ޕާކިސްތާނުގައި ނުތަނަވަސްކަމާއި ބިރުވެރިިކަން އިތުރުވެފައިވާ ކަމަށް އެ ގައުމުގެ ބޮޑު ވަޒީރު އިމްރާން ހާން ވިދާޅުވެއްޖެ އެވެ.
ސެޕްޓެމްބަރު 11 ގެ ކުރިން ބޭރުގެ ފައުޖުތައް އަފްގާނިސްތާން ދޫކޮށް ދާނެ ކަމަށް އެމެރިކާގެ ރައީސް ޖޯ ބައިޑެން ވަނީ އިއުލާނު ކުރައްވާފަ އެވެ.
ބޭރުގެ ސިފައިން އަފްގާނިސްތާނަށް އަރާފައިވަނީ ސެޕްޓެމްބަރު 11، 2001 ގައި އަލް ގައިދާއިން އެމެރިކާއަށް ދިން ހަމަލާތަކަށް ފަހު އެވެ. އޭރު އަފްގާންގައި އޮތް ތާލިބާނު ސަރުކާރުން އަލް ގައިދާއަށް ހިމާޔަތް ދޭ ކަމަށް ބުނެ، ތާލިބާނުންނާއި އަލް ގައިދާއަކީ އެއް ބައެއްގެ ގޮތުގައި އެމެރިކާއިން ދެކެ އެވެ.
އިމްރާން ވިދާޅުވީ އަފްގާނިސްތާނުގައި ދާހިލީ ހަނގުރާމައެއް ފެށުމުގެ ނުރައްކާ ކުޑަ ކުރުމުގެ ގޮތުން ސިޔާސީ ހައްލުތަކެއް ހޯދަން ޕާކިސްތާނުން ބާރު އަޅަމުންދާ ކަމަށެވެ.
"މިހާރު ޕާކިސްތާނުގެ ބޮޑު ބިރުވެރިކަމެއް އެބަ އޮތް. އަޅުގަނޑު ޔަގީންކަން އަރުވަން، އެމެރިކާ ސިފައިން ދިޔުމުގެ ކުރިން ސިޔާސީ ހައްލެއް ލިބޭތޯ އަޅުގަނޑުމެންނަށް ކުރެވެން ހުރި ހުރިހާ ކަމެއް މި ދަނީ ކުރަމުން،" އިމްރާން ރޮއިޓާޒްއަށް ވިދާޅުވި އެވެ.
އަފްގާނިސްތާނުން އެމެރިކާ އާއި ނޭޓޯގެ ސިފައިން ފައިބާނެކަން އިއުލާނު ކުރުމާއެކު އެ ގައުމުގައި ހަމަނުޖެހުން ވަނީ އިތުރުވެފަ އެވެ. އެގޮތުން ބޮމުގެ ހަމަލާތަކުގައި ގިނަ ބަޔަކު ދަނީ މަރުވަމުންނެވެ.
އަފްގާން ސަރުކާރާއެކު ސުލްހަ ގާއިމް ކުރަން ތާލިބާނުންނަށް ޕްރެޝަރް ކުރިމަތިވެ، ދާދި ފަހުން ވަނީ ބައްދަލުވުމެއް ބާއްވަފަ އެވެ. ނަމަވެސް އެއްބަސްވުމަކާ ހަމައަށް ދިޔުމުގެ އުއްމީދު ކުޑަ އެވެ.
"އެމެރިކާ ސިފައިން ފައިބާނެ ތާރީހު އިއުލާނު ކުރުމާއެކު ތާލިބާނުންނަށް ހީވީ ހަނގުރާމައިން މޮޅުވީއޭ،" ރޮއިޓާޒްއަށް ދެއްވި އިންޓަވިއުގައި އިމްރާން ވިދާޅުވި އެވެ.
އޭނާ ވިދާޅުވީ އެއްބަސްވުމަކަށް އައުމަކީ އުނދަގޫ ކަމެއް ކަމަށާއި އަފްގާނިސްތާނުގައި ދާހިލީ ހަނގުރާމައެއް ފަށައި، ރެފިއުޖީންގެ ކާރިސާއެއް އުފެދިއްޖެ ނަމަ ބޮޑު ނޭދެވޭ އަސަރެއް ޕާކިސްތާނަށް ކުރާނެ ކަމަށެވެ.
އަފްގާނިސްތާނަށް މުހިއްމު ދަނޑިވަޅެއް
އެމެރިކާ ސިފައިން އަފްގާނިސްތާނުން ފައިބާ ދަނޑިވަޅަކީ އެ ގައުމަށް މުހިއްމު ދަނޑިވަޅެކެވެ. މިއީ ސުލްހައަށް މަސައްކަތް ފަށާ ނުވަތަ އިތުރު ހަމަނުޖެހުމަށް މަގު ކޮށާ ދަނޑިވަޅަށް ވެދާނެ އެވެ.
"މި ދަނޑިވަޅުގައި ލިބޭނެ އެންމެ ރަނގަޅު ނަތީޖާއަކީ އަފްގާނިސްތާނުގެ އެކި ފަރާތްތަކުން ސެޕްޓެމްބަރުގެ ކުރިން ސިޔާސީ އެއްބަސްވުމަކަށް އައުން. އެހެން ނޫނީ ދެން އޮތް އަނެއް ގޮތަކީ ސީރިއާ ފަދަ ލޭއޮހޮރުވުން ބޮޑު ދާހިލީ ހަނގުރާމައަކަށް ވެއްޓުން،" އިންސްޓިޓިއުޓް އޮފް ވޯ އެންޑް ޕީސް ސްޓަޑީޒް އިން ކާބުލްްގެ އެގްޒެކްޓިވް ޗެއާމަން ތަމީމް އަސޭ ބީބީސީއަށް ވިދާޅުވި އެވެ.
އެމެރިކާ ސިފައިން އަފްގާނިސްތާނުގައި ހޭދަކުރި ދުވަސްތަކުގެ ނިމުން އަންނާނީ މިފަދަ ގޮތަކަށް ކަމެއް ކުރިން ހީވެފައެއް ނުވެ އެވެ. ސިފައިން ފައިބަން ރާވާފައި ވާއިރު، ހަނގުރާމަވެރި ތާލިބާނުން ތިބީ ބާރުވެރިކަމުގަ އެވެ. ކޮންމެ ވަގުތެއްގައި ވެސް ވެރިކަމަށް އަތުވެދާނެ ފަދަ ހާލަތެއްގައި ތާލިބާނުން އެބަ ހަރަކާތްތެރިވެ އެވެ.
އެހެން އެކަން އޮތް އިރު، އަފްގާނިސްތާނުގެ ގިނަ މީހުން މިހާރު އެންމެ ކަންބޮޑުވަނީ ދާހިލީ ހަނގުރާމައެއް ފެށުމުގެ ފުރުސަތު އޮތުމުންނެވެ.
"އަޅުގަނޑު ހިތަށް އަރާ ރައީސް ބައިޑެން އެކަން އިއުލާނު ކުރެއްވި އިރު، މޭ މަހާއި ސެޕްޓެމްބަރާ ދެމެދު އެއްވެސް ހަމަނުޖެހުމެއްގައި މީހަކު މަރައިގެން ނުވާނެ ކަމަށް ޝަރުތު ކުރެއްވި ނަމައޭ،" އަފްގާން ރިސާޗް އެންޑް އިވެލުއޭޝަން ޔުނިޓުގެ ޑިރެކްޓަރު އުރްޒަލާ ނިމަތު ބީބީސީ އަށް ވިދާޅުވި އެވެ.
ނަމަވެސް އެމެރިކާގެ އޮފިޝަލަކު ބުނީ ސިފައިން ފައިބާނީ ޝަރުތެއްގެ މަތިން ކަމަށް ބުނެފި ނަމަ އެއީ ދުވަހަކު ވެސް ނުފައިބާ ތިބުން ފަދަ ކަމެއް ކަމަށާއި މިދިޔަ ވިހި އަހަރު ވެސް ދިމާވީ އެގޮތަށް ކަމަށެވެ.
މިހާރު މި ދަނޑިވަޅުގައި އެ މަސައްކަތް ދޫވެފައި އޮތީ އަފްގާނިސްތާނުގެ ލީޑަރުންގެ އަތް މައްޗަށެވެ. ސުލްހަ ގެނެވޭނީ އަފްގާނުގެ ލީޑަރުން ސީރިއަސްކޮށް ވިސްނާ، ސީރިއަސްކޮށް ފިޔަވަޅު އަޅައިގެންނެވެ.
