އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ފޭސްބުކް އަދި އިންސްޓަގްރާމް އެކައުންޓު ދެ އަހަރަށް ސަސްޕެންޑު ކުރަން ފޭސްބުކް ކުންފުނިން ނިންމައިފި އެވެ.
މިދިޔަ ޖެނުއަރީ މަހު އެމެރިކާގެ ކެޕިޓަލްގައި ޓްރަމްޕްގެ ސަޕޯޓަރުން ހިންގި ހަމަނުޖެހުމަށް ތާއީދުކޮށް ކުރެއްވި ޕޯސްޓުތަކާ ގުޅިގެން މުއްދަތެއް ނެތް ގޮތަށް އެކައުންޓްތައް ސަސްޕެންޑު މިދިޔަ ޖެނުއަރީ މަހު އެވެ.
ނަމަވެސް ފޭސްބުކްގެ އެފަދަ ނިންމުންތައް މުރާޖައާ ކުރާ ބޯޑުން މިދިޔަ މަހު ވަނީ މުއްދަތެއް ނެތް ގޮތަށް ސަސްޕެންޑު ކުރުމުން އެކަމަށް ފާޑުކިޔާފަ އެވެ.
ފޭސްބުކް އިން ބުނީ ޓްރަމްޕްގެ އަމަލުތަކަކީ "ގަވާއިދާ ހިލާފުވުން" ކަމަށެވެ. ޓްރަމްޕް ވިދާޅުވީ ފޭސްބުކްގެ ނިންމުމަކީ އޭނާއަށް ވޯޓުދެއްކި އެތައް މިލިއަން މީހުންނަށް ކުރި "މަލާމާތެއް" ކަމަށެވެ.
ފޭސްބުކްގެ ނައިބު ރައީސް ނިކް ކްލެގް ވިދާޅުވީ ދެ އަހަރަށް ޓްރަމްޕްގެ އެކައުންޓުތައް ސަސްޕެންޑު ކުރާއިރު، ދުވަސް ގުނާނީ އެކައުންޓުތައް ސަސްޕެންޑު ކުރި ޖެނުއަރީ ހަތަކުން ފެށިގެން ކަމަށެވެ.
ސަސްޕެންޝަން ނިމޭއިރު، ޓްރަމްޕްގެ ފަރާތުން ގަވާއިދާ ހިލާފު އިތުރު އަމަލުތައް ފެންނާނެ ކަމަށް ބެލެވޭ ނަމަ ސަސްޕެންޝަން އިތުރު ކުރާނެ ކަމަށް އޭނާ ވިދާޅުވި އެވެ.
ސޯޝަލް މީޑިއާއިން ބްލޮކް ކުރުމުން ޓްރަމްޕްގެ ހާއްސަ ވެބްސައިޓެއް
ޓްރަމްޕްގެ ޕޯސްޓުތައް ފޭސްބުކާއި ޓްވިޓާގައި ޝެއާކުރެވޭ ގޮތަށް ހާއްސަ ވެބްސައިޓެއް މިދިޔަ މަހު ލޯންޗުކުރި އެވެ.
އެ ވެބްސައިޓުގެ ނަމަކީ "ފްރޮމް ދަ ޑެސްކް އޮފް ޑޮނަލްޑް ޖޭ ޓްރަމްޕް" އެވެ. ވެބްސައިޓުގައި ޓްރަމްޕް ލިޔުއްވާފައިވާ ޕޯސްޓުތަކުގައި ވަނީ 2020 ވަނަ އަހަރުގެ ރިޔާސީ އިންތިހާބުގައި މަކަރު ހެދި ކަމުގެ ތުހުމަތު ތަކުރާރު ކުރައްވާފަ އެވެ.
ޓްރަމްޕް ދައްކަވާ ސާބިތު ނުހިފޭ ވާހަކައިގެ މައްޗަށް ކުރައްވާ ޕޯސްޓުތައް ކަމަށް ބުނެ، ގިނަ ޕޯސްޓުތަކެއް މީގެ ކުރިން ފޭސްބުކާއި ޓްވިޓާއިން ރިމޫވްކޮށްފައި ވެ އެވެ.
އަލަށް ލޯންޗު ކުރި ވެބްސައިޓު މެދުވެރިކޮށް ޓްރަމްޕްގެ ޕޯސްޓުތައް ޝެއާކޮށް ލައިކް ކުރެވެ އެވެ.
އެމެރިކާގެ ރިޔާސީ އިންތިހާބުން ޓްރަމްޕަށް ލިބިވަޑައިގެންނެވި ނާކާމިޔާބީއަށް ފަހު ވެރިރަށް ވޮޝިންޓަނުގައި ހިންގި ހަމަނުޖެހުންތަކާ ގުޅިގެން ފޭސްބުކް އާއި އިންސްޓަގްރާމުގެ އިތުރުން ޓްވިޓާ އާއި ޔޫޓިއުބުން ވެސް ޓްރަމްޕް ސަސްޕެންޑް ކުރި އެވެ.
އެ ހުރިހާ ސޯޝަލް މީޑިއާ ޕްލެޓްފޯމްތަކުން ވެސް ބުނެފައި ވަނީ ފިޔަވަޅު އަޅަން ޖެހުނީ ހަމަނުޖެހުމަށް ހިތްވަރު ލިބޭ ފަދަ މޭރުމަކުން އަދި ދޮގު ހަބަރު ފެތުރުމުގެ ބޭނުމުގައި ޓްރަމްޕްގެ އެކައުންޓުތައް ބޭނުން ކުރައްވާތީ ކަމަށެވެ.
