މެޑްރިޑް (ޖޫން 5) - އަންނަ ހުކުރު ދުވަހު ފަށާ ޔޫރޯ ފުޓްބޯޅަ މުބާރާތަށް ފަރިތަކުރުމުގެ ގޮތުން ރޭ ޕޯޗުގަލާއި ސްޕެއިން ކުޅުނު މެޗު ލަނޑެއް ނުޖެހި އެއްވަރުވިއިރު، ފަސޭހަކަމާ އެކު 4-0 އިން ޗެކް ރިޕަބްލިކް ބަލިކޮށް އިޓަލީން މޮޅުވުމުގެ ރެކޯޑް ދަމަހައްޓައިފި އެވެ.
އެތުލެޓިކޯ މެޑްރިޑްގެ ވަންޑާ މެޓްރޮޕޮލިޓާނޯ ސްޓޭޑިއަމްގައި ރޭ 14،000 އަށް ވުރެ ގިނަ ސަޕޯޓަރުން ކުރިމަތީގައި ސްޕެއިން ކުޅުނު މެޗަކީ ދާދި ފަހުން އެ ޓީމަށް ރަށްވެހިކަން ބަދަލުކުރި ޑިފެންޑަރު އައިމެރިކް ލަޕޯޓް އެ ޓީމު ޖޯޒީގައި ކުޅުނު ފުރަތަމަ މެޗެވެ.
މި މެޗުން ސްޕެއިން މޮޅުކޮށްދޭން އެންމެ ރަނގަޅު ފުރުސަތުތައް ލިބުނީ އަލްވާރޯ މޮރާޓާ އާއި ފެރާން ޓޮރޭޒް އަށެވެ. މެޗުގެ ފަހު ކޮޅު މޮރާޓާ އަށް މުޅިން ހުސްކޮށް ލިބުނު ފުރުސަތުން އޭނާ ޖެހި ބޯޅަ އަމާޒުވީ ހުރަސްދަނޑިއަށެވެ.
ސްޕެއިނުގެ ލަޕޯޓް (ކ) ޕޯޗުގަލްގެ ގޯލަށް ބޮލުން ބޯޅައެއް ފޮނުވާލަނީ.-- ފޮޓޯ: އޭއެފްޕީ
ޕޯޗުގަލް އިން ގޯލާ ސީދާކޮށް ފޮނުވާލި ހަމައެކަނި ހަމަލާ އަކީ ޑަނީލޯ ޕެރޭރާ ބޮލުން ޖެހި ބޯޅައެވެ. ޕެރޭރާ ފޮނުވާލި ބޯޅަ އަމާޒުވީ ސްޕެއިންގެ ކީޕަރު އުނާއި ސިމޯން އަަތަށެވެ. ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އަށް ރޭ މާ ރަނގަޅު ކުޅުމެއް ދެއްކޭގޮތެއް ނުވި އެވެ.
ޔޫރޯގެ ކުރިން އަދި ޕޯޗުގަލާއި ސްޕެއިނުން އިތުރު މެޗެއް ކުޅޭނެ އެވެ. ސްޕެއިން ބައްދަލުކުރާނީ ލިތުއޭނިއާއާ އެވެ. ޕޯޗުގަލް ނުކުންނާނީ އިޒްރޭލާ ދެކޮޅަށެވެ.
އިޓަލީން ރޭގެ މެޗުގައި ޗެކް ރިޕަބްލިކް ކޮޅަށް ގޯލުތައް ޖެހީ ޗީރޯ އިމޯބިލޭ، ނިކޯލޯ ބަރޭލާ، ލޮރެންޒޯ އިންސީނިއޭ އަދި ޑޮމެނިކޯ ބެރާޑީ އެވެ. އިންސީނިއޭގެ 30 ވަނަ އުފަން ދުވަހު އޭނާ ގޯލު ޖެހީ އިމޯބިލޭ ދިން ބޯޅައަކުންނެވެ.
ހުކުރު ދުވަހު ޔޫރޯ ފަށާ މެޗުގައި އިޓަލީ ނުކުންނާނީ ތުރުކީއާ ދެކޮޅަށެވެ. ރޮބާޓޯ މަންޗިނީގެ ކޯޗުކަމުގައި ކުޅޭ އިޓަލީ 2018 ވަނަ އަހަރުގެ ފަހުން މެޗަކުން ބަލިނުވެ އެވެ. އަދި އެ ޓީމުން އެންމެ ފަހުން ކުޅުނު އަށް މެޗު ކާމިޔާބުކުރީ ބައިކޮޅަށް ގޯލެއް ނުވަދެ އެވެ.
