ސަންޓިއާގޯ، އާޖެންޓީނާ (ޖޫން 4) - ވޯލްޑް ކަޕް ކޮލިފައިންގެ ދެކުނު އެމެރިކާގެ މެޗުތަކުގައި ރޭ އާޖެންޓީނާ އިން ގޯލެއް ޖަހާފައިވަނިކޮށް 1-1 އިން ޗިލީން އެއްވަރުކޮށްފި އެވެ.
މި މެޗުން މޮޅުވެގެން ދެކުނު އެމެރިކާގެ ކޮލިފައިން ގްރޫޕްގެ އެއް ވަނަ އަށް އެރުމުގެ ފުރުސަތު އާޖެންޓީނާ އަށް އޮތެވެ. އެކަމަކު އެއްވަރުވުމުން އޮތީ ދެ ވަނައިގަ އެވެ. ކުޅުނު ހަތަރު މެޗުން ވެސް މޮޅުވެގެން ބްރެޒިލް އޮތީ އެއް ވަނައިގައި 12 ޕޮއިންޓާ އެކު އެވެ. އާޖެންޓީނާ އަށް ފަސް މެޗުން ލިބުނީ 11 ޕޮއިންޓެވެ. ތިން ވަނައިގައި އޮތް އެކުއެޑޯ އަށް ހަތަރު މެޗުން ނުވަ ޕޮއިންޓް ލިބިފައިވާއިރު، މިރޭ އެ ޓީމުން ކޮލިފައިންގައި ބްރެޒިލް އަތުން މޮޅުވެގެން ތާވަލުގެ ކުރިއަށް އެރޭނެ އެވެ.
އާޖެންޓީނާ އިން ލީޑުނެގީ މެޗުގެ 23 ވަނަ މިނިޓްގައި ލިއޮނަލް މެސީ ވައްދާލި ޕެނަލްޓީންނެވެ. މިއީ އޭރިއާތެރެއިން ޗިލީގެ ގިލެރްމޯ މަރިޕަން އާޖެންޓީނާގެ ލަޓާރޯ މާޓިނޭޒަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
ޗިލީން ކުޅުން ރަނގަޅުކޮށް ނަތީޖާ ހަމަހަމަކުރަން ކުރި މަސައްކަތް ކާމިޔާބުކުރީ އާޖެންޓީނާ އިން ލީޑުނެގިތާ 12 މިނިޓް ފަހުންނެވެ. ޗިލީގެ ގޯލު ކާމިޔާބުކޮށްދިނީ އަލެކްސިސް ސަންޗޭޒް އެވެ. މިއީ ގެރީ މެޑަލް ދިން ބޯޅައަކުން ސަންޗޭޒް ޖެހި ގޯލެކެވެ.
މެޗުގެ ފަހު ވަގުތު މެސީ ވަނީ އާޖެންޓީނާ މޮޅުކޮށްދިނުމާ ގާތަށް ޖެހިލައިފަ އެވެ. އޭނާ ފޮނުވާލި ބޯޅަ ޗިލީގެ ތަޖުރިބާކާރު ކީޕަރު ކްލައުޑިއޯ ބްރާވޯ ވަނީ މަތަކޮށްފަ އެވެ. ކޮވިޑަށް ޕޮޒިޓިވްވެފައިވާތީ ޗިލީން މި މެޗު ކުޅުނީ އާޓޫރޯ ވިޑާލް ނުލަ އެވެ.
ކޮލިފައިންގައި ރޭ ހަތަރު ވަނައިގައި އޮތް ޕެރަގުއޭ އާއި ފަސް ވަނައިގައި އޮތް އުރުގުއޭ ކުޅުނު މެޗު ނިމުނީ ލަނޑެއް ނުޖެހި އެއްވަރުވެގެންނެވެ. އުރުގުއޭ އަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް ބޭނުމެއް ނުކުރެވުނެވެ. އުރުގުއޭގެ ޖޮނަތަން ރޮޑްރިގޭޒް ޖެހި ގޯލު އޮފްސައިޑް ކަމަށް ނިންމިއިރު، ލުއިސް ސުއަރޭޒް ހުސްކޮށް ހުރެފައި ބޮލުން ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.
