އިޒްރޭލުގައި 12 އަހަރު ވަންދެން ވެރިކަން ކުރެއްވި ބޮޑު ވަޒީރު ބެންޖަމިން ނަތަންޔާހޫގެ ވެރިކަން ނިމުމަކަށް ގެނެސް، އާ ބޮޑު ވަޒީރަކަށް ނަފްތާލީ ބެނެޓް ހަމަޖައްސަން އިދިކޮޅު ޕާޓީތަކުން އެއްބަސްވެއްޖެ އެވެ.
މައި އިދިކޮޅި ޔެޝް އަތީދް ޕާޓީގެ ލީޑަރު ޔެއާ ލެޕިދް އިއުލާނު ކުރެއްވި ކޯލިޝަން ސަރުކާރުގައި ހިމެނެނީ އަށް ޕާޓީ އެވެ. ޕާޓީތަކުގެ މެދުގައި އެކުލަވާލި އެއްބަސްވުމުގެ ދަށުން ދައުރުގެ ފުރަތަމަ ދެ އަހަރު ވެރިކަން ކުރައްވާނީ ޔަމީނާ ޕާޓީގެ ވެރިޔާ ނަފްތާލީ ބެނެޓް އެވެ. އޭގެ ފަހުން ބާކީ ދެ އަހަރު ބޮޑު ވަޒީރަކަށް ހުންނަވާނީ ލެޕިދް އެވެ.
އާ ސަރުކާރު ރަސްމީކޮށް ހުވާކުރުމުގެ ކުރިން ޕާލިމެންޓުގައި ވޯޓަށް އަހާ ރުހުން ހޯދަން ޖެހެ އެވެ.
ލެޕިދް ނެރުއްވި ބަޔާނެއްގައި ވިދާޅުވީ ޕާޓީތަކުން ކޯލިޝަން ސަރުކާރެއް ހަދަން އެއްބަސްވުމަކަށް އައިކަން ރައީސް ރޫވެން ރިވްލިންއަށް އަންގަވާފައިވާ ކަމަށެވެ.
އިޒްރޭލުގެ މީޑިއާއިން ދައުރު ކުރަމުންދާ ފޮޓޯއަކުން ފެންނަނީ ލެޕިދް އާއި ބެނެޓް އަދި އަރަބި އިސްލާމިސްޓް ރާމް ޕާޓީގެ ލީޑަރު މަންސޫރު އައްބާސް ކޯލިޝަން އެއްބަސްވުމުގައި ސޮއިކުރައްވަނިކޮށެވެ.
އައްބާސް ވިދާޅުވީ އެއްބަސްވުމަކަށް އައީ ވަރަށް ގިނަ ދެބަސްވުން ހުރި ކަންކަމާ މެދު މަޝްވަރާ ކުރުމަށް ފަހު ކަމަށާއި މި ކޯލިޝަނުގެ ސަބަބުން އިޒްރޭލުގެ އަރަބި ރައްޔިތުންނަށް ފައިދާވާނެ ކަމަށެވެ.
ރައީސް ރިވްލިން ވަނީ ވީ އެންމެ އަވަހަކަށް ޕާލިމެންޓުގެ ބައްދަލުވުމެއް ބާއްވާ ކޯލިޝަން ސަރުކާރަށް ރުހުން އޮތްތޯ ބެލުމަށް ވޯޓަށް އެހުމަށް އަންގަވާފަ އެވެ.
ޖުމްލަ 120 މެމްބަރުން ހިމެނޭ ޕާލިމެންޓު ނެއްސެތުން ރުހުން ނުލިބިއްޖެ ނަމަ އަނެއްކާވެސް ޖެހޭނީ އާއްމު އިންތިހާބެއް ބާއްވާށެވެ. އެ އިންތިހާބު ވެގެން ދާނީ ދެ އަހަރު ތެރޭ ބާއްވާ ފަސްވަނަ އިންތިހާބަށެވެ.
ކޯލިޝަން ސަރުކާރުގައި ހިމެނޭ ޕާޓީތަކަކީ ތަފާތު ވިސްނުންތަކުގެ ޕާޓީތައް ނަމަވެސް ހުރިހާ ޕާޓީއަކުން ވެސް އެއްބަސްވަނީ ނަތަންޔާހޫ މަގާމުން ދުރު ކުރަން ޖެހޭ ކަމަށެވެ. އަށް ޕާޓީގެ ބައިވެރިވުމާއެކު ޕާލިމެންޓުގެ މެޖޯރިޓީ ކޯލިޝަނަށް ލިބެ އެވެ.
މިދިޔަ މާޗް މަހު އޮތް އާއްމު އިންތިހާބުން އެއް ޕާޓީއަކަށް އެންމެ ގިނަ ގޮނޑި ލިބުނީ ނަތަންޔާހޫގެ ލިކޫދް ޕާޓީއަށެވެ. ނަމަވެސް ސަރުކާރެއް ހެދޭ ވަރަށް ގޮނޑި ކާމިޔާބު ނުވުމުން ކޯލިޝަން ހެދުމުގެ ފުރުސަތު ރައީސް ދެއްވި އެވެ. އެކަމަކު އެއްވެސް ޕާޓީއަކުން ނަތަންޔާހޫއާ ބައިވެރިއެއް ނުވި އެވެ.
އެހެންވެ، ރައީސް ރިވްލިން ވަނީ ކޯލިޝަން ހެދުމުގެ ދުރުސަތު ދެ ވަނައަށް އެންމެ ގިނަ ގޮނޑި ހޯދި ޔެޝް އަތީދް ޕާޓީއަށް ދީފަ އެވެ.
