މިއުނިކް (ޖޫން 2) - ބަޔާން މިއުނިކްގެ ސީނިއާ މެނޭޖްމަންޓްގައި 30 އަހަރު މަސައްކަތް ކުރުމަށް ފަހު މިހާރުގެ ޗެއާމަން ކާލް-ހެއިންޒް ރުމެނިގާ ކްލަބާ ދުރަށް ދިއުން އަވަސްކުރަން ނިންމައިފި އެވެ.
ކުރިން ނިންމާފައި އޮތީ މި އަހަރު ނިމުމުން ރުމެނިގާ މަގާމު ދޫކޮށްލާ ގޮތަށެވެ. އެކަމަކު އެ އެއްބަސްވުމުގެ ހަ މަސް ކުރިން މި މަހުގެ ނިޔަލަށް ރުމެނިގާ މަގާމުން ވަކިވާނެކަން މިހާރު ވަނީ ރަސްމީކޮށް ކްލަބަށް އަންގައިފަ އެވެ. ރުމެނިގާގެ މަގާމު ދެން ފުރާނީ ބަޔާނާއި ޖަރުމަނުގެ ގައުމީ ޓީމުގެ ގޯލު ބެލެހެއްޓި ކުޅަދާނަ ގޮލްކީޕަރު އޮލިވާ ހާން އެވެ.
ރުމެނިގާ އަވަހަށް ކްލަބް ދޫކޮށްލަން ނިންމީ ސީޒަންގެ މެދުތެރެއިން އެކަން ކުރުމަށް ވުރެ ބުއްދިވެރި ގޮތަކީ ސީޒަނެއް ފެއްޓުމުގެ ކުރިން އެކަން ކުރުން ކަމަށް ފެންނާތީ އެވެ. އެ ގޮތަށް ބަޔާންގެ ބޯޑުން ވެސް ވަނީ ރުހުން ދީފަ އެވެ.
ބަޔާނުން ވަނީ ރުމެނިގާ އެ ކްލަބަށް ކޮށްދިން ހިދުމަތުގެ އަގުވަޒަންކޮށްފަ އެވެ.
އުމުރުން 65 އަހަރުގެ ރުމެނިގާ ވަނީ ބަޔާނަށް 10 އަހަރު ކުޅެދީފަ އެވެ. އަދި ވެސްޓް ޖާމަނީ ޓީމުން 1980 ވަނަ އަހަރުގެ ޔޫރަޕިއަން ފުޓްބޯލް ޗެމްޕިއަންޝިޕް (ޔޫރޯ) ކާމިޔާބުކުރި ޓީމުގައި ރުމެނިގާ ހިމެނެ އެވެ.
ހާއްސަ ދައުވަތަކަށް އެންމެ ފުރަތަމަ ބަޔާނުން ރުމެނިގާ ގެނައީ 1991 ވަނަ އަހަރު ކްލަބްގެ ނައިބު ރައީސްގެ ރޯލަށެވެ. އޭނާ ވަނީ 2002 ވަނަ އަހަރާ ހަަމައަށް އެ މަގާމު ފުރައިފަ އެވެ. އޭގެ ފަހުން އެގްޒެކްޓިވް ބޯޑުގެ ޗެއާމަންގެ މަގާމު މިހާތަނަށް ފުރިއިރު، ކްލަބް ހިންގުމުގައި ރަނގަޅު މޮޑެލެއް އެކުލަވާލި އެވެ.
ރުމެނިގާ ވަނީ ޖަރުމަނު ގައުމީ ޓީމުގެ މެޗުތަކުގައި ޓީވީ ކޮމަންޓޭޓަރެއްގެ ގޮތުގައި ވެސް ކުރިން މަސައްކަތްކޮށްފަ އެވެ. ބަޔާނުން ވަކިވުމަށް ފަހު ފުޓްބޯޅައިގެ ތެރޭގައި މަސައްކަތް ކުރާނަމަ އޭނާ ދެން ފެނުން އެންމެ ގާތީ މީޑިއާގެ ރޯލަކުން ނޫނީ ޖަރުމަނު ފުޓްބޯޅަ ފެޑެރޭޝަނުގެ މަގާމަކުން ކަމަށް ރުމެނިގާ ވަނީ މީގެ ކުރިން ވިދާޅުވެފަ އެވެ.
