މެޑްރިޑް (ޖޫން 1) - އިނގިރޭސި ޕްރިމިއާ ލީގުގެ އެވަޓަން ކޯޗުކަން ދޫކޮށްލައި ރެއާލް މެޑްރިޑްގެ ކޯޗުކަމާ އަލުން ހަވާލުވާން އިޓަލީގެ މަޝްހޫރު ކޯޗު ކާލޯ އަންޗެލޮޓީ ނިންމައިފި އެވެ.
ރެއާލަށް 2013 އިން 2015 އަށް ކޯޗުކޮށްދިން އަންޗެލޮޓީ ވަނީ ރެއާލާ އެކު ތިން އަހަރުގެ އެއްބަސްވުމެއްގައި މިއަދު ސޮއިކޮށްފަ އެވެ. އަންޗެލޮޓީ ވަނީ ރެއާލާ އެކު ފުރަތަމަ މަސައްކަތް ކުރިއިރު، އެ ޓީމަށް ޗެމްޕިއަންސް ލީގުގެ އިތުރުން ކޮޕަ ޑެލް ރޭ އާއި ޔުއެފާ ސުޕަ ކަޕް އަދި ކްލަބް ވޯލްޑް ކަޕް ހޯދައިފަ އެވެ.
އަންޗެލޮޓީ ރެއާލްގެ ކޯޗުކަމަށް އައީ އެ ޓީމުގެ ކޯޗުކަމުން ޒިނެދިން ޒިދާން ވަކިވުމުންނެވެ. ދިހަ އަހަރު ތެރޭ ފުރަތަމަ ފަހަރަށް ރެއާލުން ހުސްއަތާ ނިންމާލި ސީޒަނަށް ފަހު ޒިދާން އެ ޓީމުގެ ކޯޗުކަން ދޫކޮށްލުމަށް ފަހު ބުނީ ޓީމު ދޫކޮށްލަން ނިންމީ ކްލަބްގެ ވެރިންގެ އިތުބާރު ނެތުމުން ކަމަށެވެ.
އުމުރުން 61 އަހަރުގެ އަންޗެލޮޓީ ބުނީ އެވަޓަންގެ މެނޭޖްމަންޓަށް ޝުކުރު އަދާކުރާކަމަށާއި އެ ޓީމު ދޫކޮށްލައި ރެއާލާ ގުޅެން ނިންމީ މިއީ މި ވަގުތަށް ބަލާއިރު ދޫކޮށްލެވެން ނެތް ފުރުސަތަކަށް ވާތީ ކަމަށެވެ.
"އެވަޓަންގައި އަހަރެން ހުރީ ހިތްހަމަޖެހިގެން. އެކަމަކު ރެއާލުން މި ލިބުނު ފުރުސަތަކީ އަހަންނާއި އަހަރެންގެ އާއިލާ އަށް ވެސް މި ވަގުތަށް ވަރަށް ރަނގަޅު ފުރުސަތެއް. އަހަރެން އެދެން އެވަޓަން މިހާރު ކުރަމުން އަންނަ ރަނގަޅު މަސައްކަތް ދެން ހަވާލުވާ ކޯޗަކާ އެކު ވެސް ކުރިއަށް ގެންދަން،" އަންޗެލޮޓީ ބުންޏެވެ.
އެވަޓަން އިން އާ ކޯޗެއް ހޯދުމުގެ މަސައްކަތް ކުރަމުން އަންނައިރު، އެ ޓީމުން ޝޯޓްލިސްޓުކޮށްފައިވާ ކޯޗުންގެ ތެރޭގައި ލިވަޕޫލްގެ ކުރީގެ ކެޕްޓަން ސްޓީވަން ޖެރާޑް ހިމެނެ އެވެ. ޖެރާޑް ވަނީ މެޗަކުން ބަލިނުވެ ރޭންޖާސް އަށް މި ސީޒަނުގައި ސްކޮޓްލެންޑްގެ ޗެމްޕިއަންކަން ހޯދައިދީފަ އެވެ.
ރެއާލުން އެންމެ ފުރަަތަަމަ އެ ޓީމުގެ ކޯޗަކަށް ގެންނަން ބެލީ އިޓަލީގެ ކޯޗު މެސިމޯ އަލެގްރީ އެވެ. އަލެގްރީ ނިންމީ އަލުން ޔުވެންޓަސްއާ ހަވާލުވާށެވެ. ދެން ރެެއާލުން މަސައްކަތްކުރީ ދާދި ފަހުން އިންޓަ މިލާންގެ ކޯޗުކަމުން ވަކިވި އެންޓޯނިއޯ ކޮންޓޭއާ ރެއާލް ހަވާލުކުރާށެވެ. އެކަމަކު ކޮންޓޭ މިހާރު އަންނަނީ އިންގްލެންޑްގެ ޓޮޓެންހަމް ހޮޓްސްޕާސްއާ ގުޅެން ވާހަކަ ދައްކަމުންނެވެ.
ކުޅުންތެރިޔެއްގެ ގޮތުގައި އޭސީ މިލާނާ އެކު ދެ ފަހަރު ޗެމްޕިއަންސް ލީގު ކާމިޔާބުކޮށް އަދި އިޓަލީއާ އެކު 1990 ގެ ވޯލްޑް ކަޕުގެ ތިން ވަނަ ހޯދި އަންޗެލޮޓީ ވަނީ ކޯޗިންގައި ވެސް އެހާމެ ގިނަ ކާމިޔާބު ހޯދައިފަ އެވެ. އެގޮތުން މިލާނަށް ދެ ފަހަރު އަދި ރެއާލް މެޑްރިޑަށް އެއް ފަހަރު ޗެމްޕިއަންސް ލީގު ކާމިޔާބުކޮށްދިނެވެ. ޗެލްސީ އާއި ޕީއެސްޖީ އަދި ބަޔާން މިއުނިކަށް ވެސް ލީގު ކާމިޔާބުކޮށްދިނެވެ.
ނަޕޯލީ ކޯޗުކަމާ 2018 ވަނަ އަހަރު ހަވާލުވި އަންޗެލޮޓީ އެ ޓީމުގެ ކޯޗުކަމުން ވަކިކުރީ 2019 ވަނަ އަހަރުގެ ޑިސެމްބަރު މަހު އެވެ. ނަޕޯލީން އަންޗެލޮޓީ ވަކިކުރީ އެ ކްލަބްގެ ރައީސް އައުރެލިއޯ ޑި ލޯރެންޓިސްއާ ޖެހުނު މައްސަލައެއްގެ ތެރެއިންނެވެ.
ނަޕޯލީން ވަކިކުރިތާ ދެ ހަފްތާ ފަހުން އަންޗެލޮޓީ ވަނީ ހަތަރު އަހަރުގެ އެއްބަސްވުމެއްގެ ދަށުން އެވަޓަން އަށް ބަދަލުވެފަ އެވެ. އެވަޓަން މި ފަހަރު ޕްރިމިއާ ލީގު ނިންމާލީ 10 ވަނައިގަ އޮވެ އެވެ. އަންޗެލޮޓީ އެވަޓަން ދޫކޮށްލިއިރު، އެ ޓީމާ އެކު ހަދާފައިވާ ކޮންޓްރެކްޓްގައި ބާކީ ދެ އަހަރާއި ހަ މަސް އެބައޮތެވެ. .
