ބެންޖަމިން ނަތަންޔާހޫއަށް ބޮޑު ވަޒީރުކަން ގެއްލޭ ގޮތަށް ކޯލިޝަން ސަރުކާރު ހެދުން ހުއްޓުވަން އެންމެ ފަހުގެ ވަގުތުގައި ކުރި މަސައްކަތަށް އިޒްރޭލުގެ ރައީސް ރޫވެން ރިވްލިން ހުރަސް އަޅުއްވައިފި އެވެ.
ރިޕޯޓުތައް ބުނާ ގޮތުން ސެންޓްރިސްޓް ޕާޓީގެ ލީޑަރު ޔެއާ ލަޕިދް އާއި އަލްޓްރާ ނޭޝަނަލިސްޓް ޕާޓީގެ ލީޑަރު ނަފްތާލީ ބެނެޓް ވަރަށް އަވަހަށް ކޯލިޝަން އެއްބަސްވުމުގައި ސޮއިކުރައްވާނެ އެވެ.
އިޒްރޭލުގެ ރައީސް ރޫވެން ރިވްލިން.-- ފޮޓޯ: ޓައިމްސް އޮފް އިޒްރޭލް
އިޒްރޭލުގެ މީޑިއާއިން ރިޕޯޓުކުރާ ގޮތުގައި ސެންޓްރިސްޓުންނާއި އަލްޓްރާ ނޭޝަނަލިސްޓުންގެ ކޯލިޝަން އެއްބަސްވުމުގެ ދަށުން ކުރިއަށް އޮތް ދެ އަހަރު ބޮޑު ވަޒީރުކަން ކުރައްވާނީ އުމުރުން 49 އަހަރުގެ ބެނެޓް އެވެ. އަދި ދައުރުގެ ބާކީ ދެ އަހަރު ބޮޑު ވަޒީރުކަން ކުރައްވާނީ ލަޕިދް އެވެ.
ކޯލިޝަން ސަރުކާރުގައި ދެ ބޮޑު ވަޒީރުން ރޮޓޭޓުވާ ގޮތަށް ހެދުމަކީ ގާނޫނާ ހިލާފު ކަމެއް ކަމަށް ވިދާޅުވެ، ނަތަންޔާހޫ ފޮނުއްވީ ރައީސް ރިވްލިން އާއި ޕާލިމެންޓަށް ސިޓީ އެކެވެ. ނަމަވެސް ރައީސް ރިވްލިންގެ އޮފީހުން ބުނީ އެއީ ގާނޫނީ ހުއްޖަތެއް ނެތް ވާހަކައެއް ކަމަށެވެ.
ކޯލިޝަން ސަރުކާރު އެކުލަވާލައިގެން ރައީސް ރިވްލިންއަށް ހުށަހަޅަން ޖެހޭ ސުންގަޑިއަކީ ބުދަ ދުވަހެވެ. ކާމިޔާބުކަމާ އެކު އާ ސަރުކާރު އެކުލަވާލެވިއްޖެ ނަމަ ނަތަންޔާހޫގެ 12 އަހަރުވީ ވެރިކަން ނިމުމަކަށް އަންނާނެ އެވެ. ނަތަންޔާހޫއަކީ އިޒްރޭލުގައި އެންމެ ގިނަ ދުވަހު ބޮޑު ވަޒީރުގެ މަގާމު ފުރުއްވަމުން ގެންދަވާ ލީޑަރެވެ.
ނަތަންޔާހޫއާ ދެކޮޅަށް ސީރިއަސް ތުހުމަތުތަކެއް ކުރެވޭއިރު، ކޮރަޕްޝަނާއި މަކަރާއި ހީލަތް ހެދުމުގެ ކުށް ސާބިތުވެއްޖެ ނަމަ ޖަލު ހުކުމެއް އައުން އެކަށީގެންވެ އެވެ. މިދިޔަ މާޗް މަހު އޮތް އާއްމު އިންތިހާބުން އޭނާގެ ލިކޫދް ޕާޓީއަށް ވަނީ މެޖޯރިޓީ ނުލިބިފަ އެވެ. އެއީ ދާއިތުވި ދެ އަހަރު ތެރޭ އެ ޕާޓީއަށް މެޖޯރިޓީ ނުލިބުނު ހަތަރު ވަނަ އިންތިހާބެވެ.
އިންތިހާބުގައި އެންމެ ގިނަ ވޯޓު ލިބުނު ޕާޓީގެ ހައިސިއްޔަތުން ކޯލިޝަން ސަރުކާރެއް ހަދަން ފުރުސަތު ލިބުނު ނަމަވެސް އެއްވެސް ޕާޓީއަކުން ނަތަންޔާހޫއާ ގުޅޭކަށް ބޭނުމެއް ނުވި އެވެ.
އެހެންވެ ދެ ވަނައަށް އެންމެ ގިނަ ވޯޓު ލިބުނު ބެނެޓްގެ ޕާޓީއަށް ވަނީ ކޯލިޝަން ހެދުމުގެ ފުރުސަތު ލިބިފަ އެވެ. އެކަމަކު އެ ޕާޓީއަށް ވެސް ސަރުކާރެއް އެކުލަވާލެވޭނީ ޕާލިމެންޓުގައި ތިއްބަވާ އަރަބި މެމްބަރުންނާއެކު ކަމަށް ރިޕޯޓުތައް ބުނެ އެވެ.
އިޒްރޭލާއި ގާޒާ ކޮންޓްރޯލް ކުރާ ހަމާސް ޖަމާއަތާ ދެމެދު އެގާރަ ދުވަސް ވަންދެން ހަމަލާ ބަދަލު ކުރުމުގެ ސަބަބުން އިޒްރޭލުގައި ޔަހޫދީންނާއި އަރަބިންނާ ދެމެދު ނުތަނަވަސްކަން ވަނީ ބޮޑުވެފަ އެވެ. ބައެއް ސިޓީތަކުގައި ހަމަނުޖެހުން ވެސް ހިނގި އެވެ.
ބެނެޓްއަކީ އިޒްރޭލުން ވެރިވެގަނެފައިވާ ހުޅަނގު އައްސޭރީގައި ޔަހޫދީން އާބާދު ކުރަން ވަރަށް ތާއީދު ކުރައްވާ ލީޑަރެކެވެ. އެހެންކަމުން ބައެއް އަރަބި ޕާލިމެންޓު މެމްބަރުން އޭނާގެ ސަރުކާރެއްގައި ބައިވެރިވާން ދެކޮޅު ހެދުމަކީ އެކަށީގެންވާ ކަމެކެވެ.
