އިޒްރޭލުން ވެރިވެ ގަނެފައިވާ އިރުމަތީ ގުދުސްއިން ފާއިތުވި މަސް ތެރޭގައި އެތައް ސަތޭކަ ފަލަސްތީނު ރައްޔިތުން ހައްޔަރުކޮށްފި އެވެ.
ގުދުސްގައި ހަމަނުޖެހުން ފެށުނީ މިދިޔަ ރޯދަ މަހު ދިމިޝްކު ގޭޓު ކައިރިއަށް ފަލަސްތީނު މީހުންނަށް ނުދެވޭނެ ކަމަށް އިޒްރޭލް ފުލުހުން އެންގުމުންނެވެ.
އޭގެ ފަހުން ޝެއިހް ޖައްރާގެ ގެތަކުން ފަލަސްތީނު ރައްޔިތުން ނެރުމާ ދެކޮޅަށް މުޒާހަރާ ކުރި މީހުންނަށް ފުލުހުންގެ ހަމަލާ އަމާޒުވި އެވެ.
ހަމަނުޖެހުން ބޮޑުވެފައި ވަނިކޮށް އިޒްރޭލުގެ ޔަހޫދީން ވަނީ އަރަބިންނާ ދެކޮޅަށް ފަލަސްތީނު މީހުން ގިނަ ހިސާބުތަކުގައި ހިނގާލުން ބާއްވާފަ އެވެ.
އޭގެ ފަހުން އިޒްރޭލާއި ގާޒާއާ ދެމެދު 11 ދުވަސް ވަންދެން ހަމަލާ ބަދަލު ކުރި އެވެ. އަދި އިޒްރޭލުގައި ދިރިއުޅޭ ފަލަސްތީނު މީހުންނަށް ފުރައްސާރައާ ކުރިމަތިވެ، ގުދުސްއިން އިން 2000 އަށް ވުރެ ގިނަ މީހުން ހައްޔަރުކޮށްފައި ވެ އެވެ.
އިރުމަތީ ގުދުސްއިން ގިނަ މީހުން ހައްޔަރު ކުރަމުން ދަނީ ސޯޝަލް މީޑިއާގައި އިޒްރޭލު ފުލުހުންނަށް މަލާމާތްކޮށް ޕޯސްޓު ކުރާތީ އެވެ. ގާނޫނީ ވަކީލުން ބުނާ ގޮތުގައި ސޯޝަލް މީޑިއާގައި ޕޯސްޓު ކުރާ ކޮންޓެންޓާ ގުޅިގެން ފަލަސްތީނު މީހުން ހައްޔަރު ކުރުމަކީ އިޒްރޭލް ފުލުހުން އާއްމުކޮށް ކުރާ ކަމެކެވެ.
މިހާތަނަށް އިރުމަތީ ގުދުސްއިން 550 މީހުން ހައްޔަރުކޮށްފައި ވާއިރު، ލަފާކުރެވޭ ގޮތުގައި އޭގެ ތެރެއިން 25 ޕަސެންޓަކީ ކުޑަކުދިންނެވެ.
ފަލަސްތީނު މީހުންގެ ހައްގަށް މަސައްކަތް ކުރާ ގްރާސްރޫޓް ޖެރުސަލަމް ޖަމިއްޔާއިން ބުނީ ގިނަ މީހުން ހައްޔަރުކޮށްފައިވާ 24 ގަޑިއިރު ތެރޭގައި ދޫކޮށްލަ އެވެ. ނަމަވެސް ދޫކޮށްލަނީ 154 ޑޮލަރާއި 1،540 ޑޮލަރާ ދެމެދުގެ އަދަދަކުން ޖޫރިމަނާކޮށްފަ އެވެ.
އޭގެ އިތުރުން ބައެއް މީހުން ގޭ ބަންދުކޮށް، ގުދުސްގެ ބައެއް ހިސާބުތަކަށް ނުދެވޭ ގޮތަށް ވެސް ޝަރުތު ކުރެ އެވެ. ދިޔުން މަނާ ކުރާ ތަންތަނުގެ ތެރޭގައި ދިމިޝްކު ގޭޓާއި، އަގްސާ މިސްކިތާއި، ޝެއިހް ޖައްރާ ހިމެނެ އެވެ.
