ލަންޑަން (ޖޫން 1) - ރެއާލް މެޑްރިޑާ އެކު އޭނާގެ އެއްބަސްވުމެއް އެބައޮތް ކަމަށާއި އަލުން ޗެލްސީ އަށް ދިއުމުގެ ވިސްނުމެއް އަދި ނެތް ކަމަށް ބެލްޖިއަމްގެ ތަރި އެޑެން ހަޒާޑް ބުނެފި އެވެ.
ޗެލްސީ ދޫކޮށް ހަޒާޑް ރެއާލަށް ބަދަލުވީ 2019 ވަނަ އަހަރު 100 މިލިއަން ޔޫރޯ އަށެވެ. ހަޒާޑް ރެއާލްގައި ދައްކާ ކުޅުމަށް ބަލައި އިތުރު 40 މިލިއަން ޔޫރޯ ދޭ ގޮތަށް އެ އެއްބަސްވުމުގައި ހިމަނާފައިވެ އެވެ. އެކަމަކު މިހާތަނަށް ހަޒާޑް ރެއާލަށް ކުޅެދިން 43 މެޗުން ޖެހުނީ ފަސް ގޯލެވެ. ދެ ސީޒަނު ރެއާލްގައި ހޭދަކުރިއިރު ހަޒާޑަށް އަނިޔާގެ ގިނަ މައްސަލަތަކެއް ވަނީ ކުރިމަތިވެފަ އެވެ.
ރެއާލުން މި ފަހަރުގެ ޓްރާންސްފާ މާކެޓްގައި ހަޒާޑް ވިއްކާލަން ނިންމައިފިނަމަ އޭނާ ބޭނުންވަނީ އަލުން ޗެލްސީ އަށް ދާން ކަމަށް ދާދި ފަހުން ސްޕެއިނާއި އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ. އެ ވާހަކަތަކަށް އިޝާރާތްކޮށް ހަޒާޑް ބެލްޖިއަމްގެ ނޫހަކަށް ބުނީ އޭނާ ހުރީ ރެއާލްގެ ކޮންޓްރެކްޓެއްގައި ކަމަށާއި ވިސްނަނީ އެ ޓީމާ އެކު ކާމިޔާބު ހޯދުމަށް ކަމަށެވެ.
"އަދިވެސް އަހަރެން ރެއާލާ އެކު ހެދި ކޮންޓްރެކްޓްގައި ބާކީ ތިން އަހަރު އެބައޮތް. އެހެންވީމަ އަހަރެން އެނބުރި އިންގްލެންޑަށް ދާ ވާހަކަ އަކީ ސުވާލު ކުރަން ޖެހޭ ކަމެއް ނޫން. ޗެލްސީ އަށް އެނބުރި ދިއުމުގެ ވިސްނުމެއް މި ވަގުތު ނެތް،" ހަޒާޑް ބުންޏެވެ.
ޗެމްޕިއަންސް ލީގުގެ ސެމީ ފައިނަލްގައި ހަޒާޑް (މ) ޗެލްސީގެ ކުޅުންތެރިންނާ ވާހަކަ ދައްކަނީ.
މި ސީޒަނުގައި ޗެލްސީ ވަނީ ޗެމްޕިއަންސް ލީގުގެ ސެމީ ފައިނަލުން ރެއާލް ކަޓުވާލައިފަ އެވެ. ޗެލްސީން 2012 ވަނަ އަހަރު އަލަށް ޗެމްޕިއަންސް ލީގު ކާމިޔާބުކުރިއިރު، ހަޒާޑް އެ ޓީމާ ގުޅުނީ އޭގެ ފަހުން އައި ޓްރާންސްފާ މާކެޓްގަ އެވެ. ޗެލްސީން މި ސީޒަނުގައި ޗެމްޕިއަންސް ލީގު ކާމިޔާބުކުރިއިރު ވެސް ހަޒާޑް އެ ޓީމުގައެއް ނެތެވެ. ޔޫރަޕްގައި ހަޒާޑް ވަނީ ޗެލްސީއާ އެކު ދެ ފަހަރު ޔޫރޮޕާ ލީގު ކާމިޔާބުކޮށްފަ އެވެ.
ހަޒާޑް ބުނީ ރެއާލް ކުޅުންތެރިއެއްގެ ގޮތުގައި ހުރެ، ޗެލްސީ ޗެމްޕިއަންސް ލީގުގެ ޗެމްޕިއަންކަން ހޯދުމުން އުފާފާޅުނުކުރެވޭނެ ކަމަށެވެ. އެކަމަކު އޭނާގެ ގިނަ އެކުވެރިންތަކެއް ޗެލްސީގައި ތިބިއިރު، އެ ކުޅުންތެރިންނަށް އެ ލިބުނު ކާމިޔާބީއާ މެދު ހިތްހަމަޖެހޭ ކަމަށް ހަޒާޑް ބުންޏެވެ.
ޗެމްޕިއަންސް ލީގުން ރެއާލް ކެޓި މެޗަށް ފަހު ހަޒާޑާއި ޗެލްސީގެ ބައެއް ކުޅުންތެރިން ސަކަރާތްޖެހި ވީޑިއޯއެއް ވައިރަލްވެ ރެއާލްގެ ގިނަ ސަޕޯޓަރުންގެ ނުރުހުން ހަޒާޑަށް އަމާޒުވި އެވެ. ހަޒާޑް ވަނީ އެކަމަށް ސަޕޯޓަރުންގެ ކިބައިން މައާފަށް އެދިފަ އެވެ.
ހަޒާޑް ބުނީ މި ވަގުތު އެންމެ ބޮޑަށް ފޯކަސް ކުރަނީ މި މަހު 13 ވަނަ ދުވަހު ފަށާ ޔޫރޯ ފުޓްބޯޅަ މުބާރާތަށް ރަނގަޅަށް ތައްޔާރުވުމަށް ކަމަށެވެ. އެ މުބާރާތް ރަނގަޅަށް ގޮސްފިނަމަ އަންނަ ސީޒަނުގައި ރެއާލްގައި ވެސް އޭނާ އެންމެ ބޭނުންވާ ކުޅުން ދައްކަން ފަސޭހަވެގެންދާނެ ކަމަށް ހަޒާޑް ގަބޫލުކުރެ އެވެ. ހަޒާޑް ވަނީ 2018 ވަނަ އަހަރު ރަޝިއާގައި ބޭއްވި ވޯލްޑް ކަޕްގައި ބެލްޖިއަމް ތިން ވަނަ އަށް ގެންގޮސްދިނުމުގައި މުހިއްމު ދައުރެއް އަދާކޮށްފަ އެވެ.
