އެއްފަހަރު ބޭނުން ކުރާ ޕްލާސްޓިކުގެ ބައެއް ބާވަތްތައް މިއަދުން ފެށިގެން ރާއްޖެއަށް އެތެރެކުރުން މަނާކޮށްފައިވާއިރު، އޭގެ ތެރެއިން ކާބޯތަކެތި ބަންދުކުރަން ބޭނުންކުރާ ސްޓައިރަފޯމް ފޮއްޓާއި އިތުރު އެހެން ބާވަތެއް މަނާވާ ތާރީހު ސަރުކާރުން ފަސްކޮށްފި އެވެ.
އެއްފަހަރު ބޭނުން ކުރާ ޕްލާސްޓިކުގެ ބައެއް ބާވަތްތައް ރާއްޖެ އެތެރެކުރުން މަނާ ކުރުމަށް އިމްޕޯޓް/އެކްސްޕޯޓް ގާނޫނަށް ގެނައި އިސްލާހު ގެޒެޓުކޮށްފައި ވަނީ މިދިޔަ ޑިސެމްބަރު، 22، ގަ އެވެ.
އޭގައި ބުނެފައިވާ ގޮތުން މަނާ ކުރާ ޕްލާސްޓިކުގެ ބާވަތްތަކާއި އެ ތަކެތި އެތެރެ ކުރުން މަނާ ކުރާ ތާރީހު ގަރާރަކުން ކަނޑައަޅަންޖެހެނީ ރައީސުލްޖުމްހޫރިއްޔާ އެވެ.
އެތެރެ ކުރުން މަނާ ކުރާ ޕްލާސްޓިކާއި އެ ތަކެތި މަނާ ކުރާ ތާރީހު ބަޔާން ކުރާ ރައީސުލްޖުމްހޫރިއްޔާގެ ގަރާރު ޖެނުއަރީ، 1، 2021، ގެ ކުރިން ނެރުމަށް ވެސް އެ ގާނޫނު ލާޒިމް ކުރި އެވެ.
ގާނޫނުގައި ބުނާ މުއްދަތު ހަމަވުމުގެ ކުރިން މިދިޔަ ޑިސެމްބަރު، 30، ގައި ރައީސް ނެރުއްވި ގަރާރުގައި މަނާކޮށްފައި ވަނީ 12 ބާވަތެއްގެ ޕްލާސްޓިކެވެ. އޭގެ ތެރެއިން ނުވަ ބާވަތެއްގެ ޕްލާސްޓިކު އެތެރެ ކުރުން މަނާވާ ގޮތަށް އޮތީ މިއަދުން ފެށިގެންނެވެ.
ނަމަވެސް، ރޭގެ ވަގުތެއްގައި ރައީސް ވަނީ އެ ގަރާރު އިސްލާހު ކުރައްވައި އެ ލިސްޓުގައި ހިމެނުނު ދެ ބާވަތެއް މަނާކުރާ މުއްދަތު އިތުރުކޮށް ދެއްވައިފަ އެވެ.
އެގޮތުން، ކުރިން މިއަދުން ފެށިގެން މަނާކުރަން ނިންމި ބަތް ޕާރުސަލް ތަށި އެތެރެކުރެވޭ ތާރީހު މިހާރު ވަނީ މިއަހަރުގެ ނިޔަލަށް އިތުރުކޮށްފަ އެވެ.
އޭގެ އިތުރުން، 500 މިލިލީޓަރަށްވުރެ ކުދި ޕީއީޓީ ފުޅީގައި ބަންދުކޮށްފައި ހުންނަ ތައްޔާރީ ބުއިންތައް އެތެރެކުރުން މަނާކުރާ ތާރީހު ވަނީ އަންނަ އަހަރުގެ ޖޫން މަހާ ހަމައަށް އިތުރުކޮށްދީފަ އެވެ.
އެ ބާވަތުގެ ޕްލާސްޓިކް ފުޅި ވެސް ކުރިން އޮތީ މިއަދުން ފެށިގެން މަނާވާ ގޮތަށެވެ.
މިއަދުން ފެށިގެން އެތެރެ ކުރުން މަނާ ތަކެތި
- ޕްލާސްޓިކް ހޮޅި
- ޕްލާސްޓިކް ތަށި، ސަމުސާ، ވަޅި، އޫ، ޕްލާސްޓިކް ދަނޑިކޮޅު
- 30 ސެންޓިމީޓަރަށްވުރެ ކުދި ޕްލާސްޓިކް ކޮތަޅު
- ޕްލާސްޓިކްގައި ބަންދުކޮށްފައި ހުންނަ ސުޕާރީ
- 250 މިލިލީޓަރަށްވުރެ ކުޑަ ޕްލާސްޓިކް ތަށި
- ޕްލާސްޓިކް ދަނޑިކޮޅު ލާފައިވާ ކަފަބުރު
- 50 މިލިލީޓަރާއި 50 މިލިލީޓަރަށްވުރެ ކުދި ޝޭމްޕޫ އާއި ސައިބޯނި ފުޅި
- 500 މިލިލީޓަރަށްވުރެ ކުދި ޕީއީޓީ ފުޅީގައި ބަންދުކޮށްފައި ހުންނަ ފެން.
އެ ބަދަލު ގެންނަންޖެހުނީ ކޮވިޑް-19ގެ ބަލިމަޑުކަމުގެ ސަބަބުން ކުދި ވިޔަފާރިތަކަށް ކުރިމަތިވެފައިވާ ދަތިތަކަށް ރިއާއަތްކޮށް ކަމަށް އެ ގަރާރުގައި ރައީސް ވިދާޅުވެފައި ވެ އެވެ.
އޭގެ އިތުރުން ރައީސް ކުރިން ނެރުއްވި ގަރާރުގައި ބާޒާރު ކުރަން ބޭނުން ކުރާ 50 މައިކްރޯނަށްވުރެ ތުނި ކޮތަޅު، ޑިސެމްބަރު، 1، 2022، ގައި މަނާ ކުރުމަށް ހިމަނާފައި އޮތެވެ. ގަރާރުގައިވާ ގޮތުން 50 މިލިލީޓަރާއި 200 މިލިލީޓަރާ ދެމެދު ހުންނަ ކުދި ސައިބޯންޏާއި ޝޭމްޕޫ ފުޅި ވެސް އެ ތާރީހުގައި މަނާވާނެ އެވެ.
އަދި އެއް ލީޓަރާއި އެއް ލީޓަރަށްވުރެ ކުދި ޕްލާސްޓިކް ފެން ފުޅި ޑިސެމްބަރު، 1، 2023 ގައި މަނާވާނެ އެވެ.
ކޮވިޑުގެ ސަބަބުން މިއަދު މަނާކުރި ޕްލާސްޓިކުގެ ބާވަތްތައް ވެސް އެތެރެކުރުމުގެ ސުންގަނޑިއަށް އިކޮނޮމިކް މިނިސްޓްރީން ވަނީ ބަދަލުގެނެސްފަ އެވެ.
އެގޮތުން، އިކޮނޮމިކް މިނިސްޓްރީން އިއްޔެ ބުނެފައިވަނީ މިއަދުގެ ފަހުން ރާއްޖެއަށް ގެންނަ ޝިޕްމަންޓެއް ނަމަ، އެ މުދަލެއްގެ ބިލް އޮފް ލެޑިން (ބީއެލް) ނުވަތަ އެއާވޭ ބިލް މާދަމާގެ ކުރިން ދޫކޮށްފައިވާނަމަ، މުދާ އެތެރެކުރުމަށް ކަސްޓަމްސުން ފުރުސަތު ދޭނެ ކަމަށެވެ.
މީގެ އިތުރުން، ސިންގަލް ޔޫސް ޕްލާސްޓިކްގެ ބާވަތްތައް ރާއްޖޭގައި އުފެއްދުން މަނާކުރަން ސަރުކާރުގެ ފަރާތުން ރައްޔިތުންގެ މަޖިލީހަށް މިހާރު ވަނީ ހުށަހަޅައިފަ އެވެ.
ބިލުގައި ބުނެފައިވަނީ ތިމާވެއްޓަށް ގެއްލުންދޭ އެއްޗެހިގެ ތެރެއިން، ރައީސުލްޖުމްހޫރިއްޔާ ކަނޑައަޅާ ސިންގަލް ޔޫސް ޕްލާސްޓިކްގެ ބާވަތްތައް ރާއްޖޭގައި އުފެއްދުމާއި ބާޒާރަށް ނެރުމަކީ މަނާކަމެއް ކަމަށެވެ.
އަދި އޭގެ ދަށުން އެކި މަރުހަލާތަކަކަށް ބަހާލައިގެން ސިންގަލް ޔޫސް ޕްލާސްޓިކްގެ ބާވަތްތައް މަނާކުރުމުގެ އިހުތިޔާރު ރައީސުލްޖުމްހޫރިއްޔާއަށް ލިބިގެންވާ ނަމަވެސް، އަންނަ މަހުގެ އެއް ވަނަ ދުވަހުގެ ކުރިން އެ ބާވާތްތަކުގެ ލިސްޓެއް ގެޒެޓު ކުރަންޖެހޭނެ ކަމަށް އެ އިސްލާހުގައިވެ އެވެ.
