ނަތަންޔާހޫއަށް ބޮޑު ވަޒީރުކަން ގެއްލޭ ގޮތަށް އިޒްރޭލުގައި އުފައްދަން މަސައްކަތްކުރާ ކޯލިޝަން ސަރުކާރަކީ ގައުމުގެ ސަލާމަތަށް އޮތް ނުރައްކަލެއް ކަމަށް ބޮޑުވަޒީރު ނަތަންޔާހޫ ވިދާޅުވެއްޖެ އެވެ.
އެގޮތަށް ވިދާޅުވި ނަތަންޔާހޫ ވަނީ ކަނާއަތު ފިޔައިގެ ސިޔާސީ ފަރާތްތަކުން އެ ސަރުކާރަށް ތާއީދު ނުކުރުމަށް ގޮވާލައްވާފަ އެވެ. އަލްޓްރާ ނޭޝަނަލިސްޓް ނަފްތާލީ ބެނެޓް ވިދާޅުވީ ސެންޓްރިސްޓް ޕާޓީއަކާއެކު ކޯލިޝަން ސަރުކާރެއް ހަދަން ނިންމާފައިވާ ކަމަށެވެ.
އެ ސަރުކާރާ ގުޅުން ހުރި ކަންކަން ނިންމާ އެއްބަސްވުމުގައި ސޮއި ކުރަން ދީފައިވާ ސުންގަޑިއަކީ ބުދަ ދުވަހެވެ.
ކާމިޔާބުކަމާ އެކު އާ ސަރުކާރު އެކުލަވާލެވިއްޖެ ނަމަ ނަތަންޔާހޫގެ 12 އަހަރުވީ ވެރިކަން ނިމުމަކަށް އަންނާނެ އެވެ. ނަތަންޔާހޫއަކީ އިޒްރޭލުގައި އެންމެ ގިނަ ދުވަހު ބޮޑު ވަޒީރުގެ މަގާމު ފުރުއްވަމުން ގެންދަވާ ލީޑަރެވެ.
ނަތަންޔާހޫއާ ދެކޮޅަށް ސީރިއަސް ތުހުމަތުތަކެއް ކުރެވޭއިރު، ކޮރަޕްޝަނާއި މަކަރާއި ހީލަތް ހެދުމުގެ ކުށް ސާބިތުވެއްޖެ ނަމަ ޖަލު ހުކުމެއް އައުން އެކަށީގެންވެ އެވެ. މިދިޔަ މާޗް މަހު އޮތް އާއްމު އިންތިހާބުން އޭނާގެ ލިކޫދް ޕާޓީއަށް ވަނީ މެޖޯރިޓީ ނުލިބިފަ އެވެ. އެއީ ދާއިތުވި ދެ އަހަރު ތެރޭ އެ ޕާޓީއަށް މެޖޯރިޓީ ނުލިބުނު ހަތަރު ވަނަ އިންތިހާބެވެ.
އިންތިހާބުގައި އެންމެ ގިނަ ވޯޓު ލިބުނު ޕާޓީގެ ހައިސިއްޔަތުން ކޯލިޝަން ސަރުކާރެއް ހަދަން ފުރުސަތު ލިބުނު ނަމަވެސް އެއްވެސް ޕާޓީއަކުން ނަތަންޔާހޫއާ ގުޅޭކަށް ބޭނުމެއް ނުވި އެވެ.
އެހެންވެ ދެ ވަނައަށް އެންމެ ގިނަ ވޯޓު ލިބުނު ބެނެޓްގެ ޕާޓީއަށް ވަނީ ކޯލިޝަން ހެދުމުގެ ފުރުސަތު ލިބިފަ އެވެ. އެކަމަކު އެ ޕާޓީއަށް ވެސް ސަރުކާރެއް އެކުލަވާލެވޭނީ ޕާލިމެންޓުގައި ތިއްބަވާ އަރަބި މެމްބަރުންނާއެކު ކަމަށް ރިޕޯޓުތައް ބުނެ އެވެ.
ބެނެޓްގެ ޕާޓީއާއެކު ކޯލިޝަން ހަދަން އެއްބަސްވެފައިވާ ސެންޓްރިސްޓް ޕާޓީގެ ލީޑަރު ޔެއާ ލެޕިދް ވިދާޅުވީ އެއްބައިވަންތަކަމުގެ ސަރުކާރެއް ހެދޭނީ "ގިނަ ގޮންޖެހުންތައް" ފަހަނައަޅައި ގޮސްގެން ކަމަށެވެ.
"އަޅުގަނޑުމެން އެކުގައި މަސައްކަތްކޮށްގެން ގޮންޖެހުންތައް ނައްތާލަން ޖެހޭނީ. އަޅުގަނޑުމެންގެ އެންމެ ފުރަތަމަ އިމްތިހާނަކީ އެއީ، ކުރިއަށް އޮތް ދުވަސްތަކުގައި އެއް ބަޔަކު އަނެއް ބަޔަކަށް ހިކުމަތްތެރިކަމާއެކު ދޫދީގެން ގައުމަށް ބޭނުންވާ ލަނޑުދަނޑިއަށް ވާސިލްވެވޭތޯ ބެލުން،" އޭނާ ވިދާޅުވި އެވެ.
އިޒްރޭލާއި ގާޒާ ކޮންޓްރޯލް ކުރާ ހަމާސް ޖަމާއަތާ ދެމެދު އެގާރަ ދުވަސް ވަންދެން ހަމަލާ ބަދަލު ކުރުމުގެ ސަބަބުން އިޒްރޭލުގައި ޔަހޫދީންނާއި އަރަބިންނާ ދެމެދު ނުތަނަވަސްކަން ވަނީ ބޮޑުވެފަ އެވެ. ބައެއް ސިޓީތަކުގައި ހަމަނުޖެހުން ވެސް ހިނގި އެވެ.
ބެނެޓްއަކީ އިޒްރޭލުން ވެރިވެގަނެފައިވާ ހުޅަނގު އައްސޭރީގައި ޔަހޫދީން އާބާދު ކުރަން ވަރަށް ތާއީދު ކުރައްވާ ލީޑަރެކެވެ. އެހެންކަމުން ބައެއް އަރަބި ޕާލިމެންޓު މެމްބަރުން އޭނާގެ ސަރުކާރެއްގައި ބައިވެރިވާން ދެކޮޅު ހެދުމަކީ އެކަށީގެންވާ ކަމެކެވެ.
