މެޑްރިޑް (މެއި 31) - ރެއާލް މެޑްރިޑްގެ ކޯޗު ޒިނެދިން ޒިދާން އެ ޓީމު ދޫކޮށްލާފައިވާއިރު، މަހެއްހާ ދުވަސްތެރޭ އެ ކްލަބްގެ ކޮންޓްރެކްޓް ހަމަވުމުން ތަޖުރިބާކާރު ޑިފެންޑަރު ސާޖިއޯ ރާމޯސް ވެސް ރެއާލް ދޫކޮށްލަން ނިންމާފައިވާ ރިޕޯޓްތައް ބުނެފި އެވެ.
ސެވިއްޔާ ދޫކޮށް 2005 ވަނަ އަހަރު ރެއާލަށް ބަދަލުވި ރާމޯސް އެ ކްލަބާ އެކު ކޮންޓްރެކްޓްގައި ހުރީ އަންނަ މަހުގެ ނިޔަލަށެވެ. މިހާތަނަށް ރާމޯސްއާ އެކު އާ ކޮންޓްރެކްޓެއް ހަދަން ރެއާލުން ކުރި އެއްވެސް މަސައްކަތަކަށް އަލިމަގެއް ފެންނަ ގޮތް ވަނީ ނުވެފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން އުމުރުން 35 އަހަރުގެ ރާމޯސް މިހާރު ނިންމައިގެން ހުރީ ކޮންޓްރެކްޓް ހަމަވުމުން ރެއާލް ދޫކޮށްލާށެވެ. މި ފަހަރު ޔޫރޯ އަށް ނެގި ސްކޮޑުން ވެސް ފުރުސަތު ނުލިބޭތީ ރާމޯސް މިހާރު ހުރީ ޗުއްޓީގަ އެވެ. ރާމޯސްގެ ގާތް ފަރާތްތަކާ ހަވާލާދީ ސްޕެއިނުގެ ރޭޑިއޯ އަކުން ދާދި ފަހުން ވަނީ ރާމޯސް އަންނަ ސީޒަނުގައި ފެނުމުގެ ފުރުސަތު އޮތީ ސްޕެއިން ނޫން ގައުމެއްގެ ކްލަބަކުން ކަމަށް ބުނެފަ އެވެ.
ރާމޯސް ހޯދަން އެންމެ ބޮޑަށް މަސައްކަތް ކުރަނީ ފްރާންސްގެ ޕީއެސްޖީންނެވެ. ޕީއެސްޖީން ނިންމާފައިވަނީ އަހަރަކު 15 މިލިއަން ޑޮލަރު ލިބޭ ގޮތަށް ރާމޯސް އަށް ދެ އަހަރުގެ ކޮންޓްރެކްޓެއް ހުށަހަޅާށެވެ. ރާމޯސް ވަނީ އެ ގޮތަށް އެއްބަސްވެފައި ކަމަށް ފްރާންސްގެ މީޑިއާތަކުން ރިޕޯޓްކުރި ނަމަވެސް ރާމޯސްގެ އޭޖެންޓް ވަނީ އެކަން ދޮގުކޮށްފަ އެވެ. އެކަަމަކު ޒިދާން ރެއާލް ދޫކޮށްލުމާ އެކު ރާމޯސް މިހާރު ވިސްނައިގެން ހުރީ އާ ޗެލެންޖެއް ނަގައި އެހެން ޓީމަކާ ގުޅުމަށް ކަމަށް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ.
ރެއާލަށް ކުޅެދިން 16 އަހަރުގައި ރާމޯސް ވަނީ އެ ޓީމާ އެކު 22 ތަށި ހޯދައިފަ އެވެ.
ޕީއެސްޖީގެ ކޯޗުކަމުން މައުރީސިއޯ ޕޮޗެޓީނޯ ވަކިވެއްޖެނަމަ އެ ޓީމުން ބޭނުންވަނީ ޒިދާނާ އެ ޓީމާ ހަވާލުވާން ކަމަށް ވެސް ފްރާންސާއި އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
ރެއާލް ދޫކޮށްލީ އިތުބާރުގެ މައްސަލައިގައި: ޒިދާން
ގޯލް.ކޮމް އިން ރިޕޯޓްކުރި ގޮތުގައި ޒިދާން ވަނީ ސެވިއްޔާ އާއި ރެއާލް އެއްވަރުވި މެޗުގައި މި ސީޒަނަށް ފަހު ދެން އޭނާ ރެއާލްގެ ކޯޗުގެ މަގާމުން ނުފެންނާނެ ކަމަށް ކުޅުންތެރިން ގާތުގައި ބުނެފަ އެވެ. އެކަމަކު އޭރު ޒިދާން ވަނީ އެ ވާހަކަތައް ދޮގުކޮށްފަ އެވެ. އެކަމަކު ސީޒަން ނިމުނުތަނާ ޒިދާން ވަނީ ދެ ވަނަ ފަހަރަށް ރެއާލް ދޫކޮށްލަން ނިންމިކަން ކްލަަބަށް އަންގައި މަގާމު ދޫކޮށްލައިފަ އެވެ.
ސްޕެއިނުގެ ނޫހެއް ކަމަށްވާ އޭއެސް އިން ވަނީ ޒިދާން އެ ކްލަބްގެ ސަޕޯޓަރުންނަށް ފޮނުވި ސިޓީއެއް ހިއްސާކޮށްފަ އެވެ. އެ ސިޓީގައި ޒިދާން ބުނީ 2018 ވަނަ އަހަރު އެންމެ ފުރަތަމަ އޭނާ ރެއާލް ދޫކޮށްލީ ވަރަށް ރަނގަޅަށް އެ ކްލަބް ކުރިއަރުވައި ކާމިޔާބީގެ އެންމެ މަތީ ފަންތީގައި ބޭއްވުމަށް ފަހު ކަމަށެވެ. އެކަމަކު ދެ ވަނަ ފަހަރު ޓީމު ދޫކޮށްލަން ޖެހުނީ މުޅިން ތަފާތު ހާލަތެއް އޮއްވައި ކަމަށް ޒިދާން ވަނީ ބުނެފަ އެވެ.
"އަހަރެން ޓީމު ދުކޮށްލީ ކްލަބުން އަހަންނަށް އިތުބާރު ނުކުރާކަން އިހުސާސްވާތީ. ކްލަބުން އަހަންނަށް ސަޕޯޓެއް ނެތް މި ވަގުތު ވެސް ނޫނީ މުސްތަގުބަލަށް ވެސް ޓީމު ބިނާކުރާކަށް،" ޒިދާން ބުންޏެވެ.
ޒިދާން ވަނީ މިދިޔަ ދެ އަހަރު ރެއާލުން ކުޅުންތެރިންނަށް އިންވެސްޓް ކުރުން މަދުވުމާއި އެ ނޫން ވެސް އެކި ޗެލެންޖްތަކުގެ ސަބަބުން ކްލަބްގެ އެތެރެއިން އޭނާ އަށް ލިބެން ޖެހޭ ސަޕޯޓް ނުލިބޭކަން ފާހަގަކޮށްފަ އެވެ. އަދި ރެއާލަކީ އެންމެ މަތީ ލެވަލްގައި އޮންނަން ޖެހޭ ކްލަބަކަށް ވެފައި އޭނާ ހުރެ އެކަން އެގޮތަށް ނުކުރެވޭއިރު މަގާމުގައި ދެމިހުންނަން ބޭނުންނުވީ ކަމަށް ޒިދާން ބުންޏެވެ.
"އެއީ އަހަންނަށް އެންމެ އަސަރުކުރާ ކަމަކީ ކޮންމެ ފަހަރަކު މެޗަކުން ބަލިވާއިރަށް އަހަންނަށް މީޑިއާ އިން ފެންނަނީ ދެން އިން މެޗަކުން ބަލިވެއްޖިއްޔާ އަހަރެން މަގާމުން ވަކިކުރާނެ ވާހަކަ. އަހަންނަށް އަސަރުކުރޭ ގަސްދުގައި ބަޔަކު ޓީމުގެ މެސެޖްތައް މީޑިއާ އަށް ލީކުކޮށް ޓީމުގެ ރޫހު ގެއްލުވާލާތީ," ޒިދާން ބުންޏެވެ.
ރެއާލް ކޯޗުކަން ފުރަތަމަ ދޫކޮށްލިތާ އަހަރެއް ނުވަނިސް ޒިދާން އެ ޓީމާ ދެ ވަނަ ފަހަރަށް ހަވާލުވީ 2019 ވަނަަ އަހަރުގެ މާޗް މަހުގަ އެވެ. ޒިދާން ދެ ވަނަ ފަހަރު ކޯޗުކަން ކޮށްދިންއިރު، މިދިޔަ ސީޒަނުގައި ރެއާލުން ސްޕެނިޝް ލީގާއި ސުޕަ ކަޕް ކާމިޔާބުކުރި އެވެ. ރެއާލުން މި ސީޒަން ނިންމާލީ ހުސް އަތާ އެވެ. މިއީ މިދިޔަ 10 އަހަރު ތެރޭ ރެއާލުން ތަށްޓެއް ނުލިބި ސީޒަނެއް ނިންމާލި ފުރަތަމަ ފަހަރެވެ.
ރެއާލުން މަސައްކަތް ކުރަނީ އިންޓަ މިލާނުން ވަކިވި ކޯޗު އެންޓޯނިއޯ ކޮންޓޭ ނޫނީ ޕީއެސްޖީގައި ހުރި މައުރީސިއޯ ޕޮޗެޓީނޯއާ ޓީމު ހަވާލުކުރާށެވެ. އަދި ރެއާލްގެ ބީ ޓީމުގައި ހުރި ކޯޗު ރައުލް ގޮންޒާލޭޒް ސީނިއާ ޓީމުގެ ކޯޗަކަށް ޕްރޮމޯޓްކުރުމުގެ ވިސްނުން ވެސް އެ ޓީމުން ގެންގުޅެ އެވެ.
