ކޯވިޑްގެ މި ބަލިމަޑުކަމުގެ ތެރޭގައި، ދުންފަތުގެ އިސްތިއުމާލުކުރުން ފަދަ ނުބައި އާދަތަކާ ދުރުހެލިވުމަށް ރައީސް އިބްރާހީމް މުހައްމަދު ސޯލިހު އިލްތިމާސްކުރައްވައިފި އެވެ.
ރައީސް މިގޮތަށް އިލްތިމާސް ކުރެއްވީ، ދުނިޔޭގެ މި އަހަރުގެ ދުންފަތުގެ އިސްތިއުމާލު ނުކުރާ ދުވަހުގެ މުނާސަބާގައި އެމަނިކުފާނު ފޮނުއްވި ހިތޯބެއްގަ އެވެ.
ރައީސް ވިދާޅުވި ގޮތުގައި، ކޯވިޑްގެ ބަލިމަޑުކަމުގެ ސަބަބުން ރާއްޖޭގެ އިގުތިސޯދަށް އެތައް ގެއްލުންތަކެއް ލިބިފައިވާ މި ހާލަތަކީ ދުންފަތުގެ އިސްތިއުމާލުކުރުން ފަދަ އިސްރާފުތައް ހުއްޓާލައި އެ ނުބައި އާދައާ ދުރުހެލިވާން އެންމެ މުނާސަބު ވަގުތެއް ކަމަށެވެ.
ދުންފަތުގެ އިސްތިއުމާލުކުރުމާއި ކޮވިޑަކީ ވެސް ފުއްޕާމެޔާ ނޭވާލާ ނިޒާމު ބަލިކޮށްލާ ކަމަކަށްވާއިރު، ދުންފަތުގެ އިސްތިއުމާލުކުރާ މީހުން ކޯވިޑަށް ހުށަހެޅިއްޖެ ނަމަ އެކަމުގެ ހުރި ނުރައްކާތެރިކަން ބޮޑުވެ އެވެ.
ތަފާސްހިސާބުތައް ދައްކާ ގޮތުން، ރާއްޖޭގައި މިހާތަނަށް ކޮވިޑް ބައްޔަށް ފައްސިވި މީހުންގެ، 62 އިންސައްތައަށް ވުރެ މަތީ އަދަދެއްގެ މީހުންނަކީ، އުމުރުން 15 އަހަރާއި 45 އަހަރާ ދެމެދުގެ މީހުންނެވެ. ރާއްޖޭގެ އާބާދީގެ 40 އިންސައްތައަށް ވުރެ މަތީ ނިސްބަތެއްގެ މީހުން ދުންފަތުގެ އިސްތިއުމާލުކުރާއިރު، އޭގެ ތެރެއިން ވެސް ވަރަށް މަތީ އިންސައްތައެއް ފެތެނީ މި އުމުރުފުރާއަށެވެ.
ދުންފަތުގެ އިސްތިއުމާލުކުރުން ހުއްޓާލުމަކީ، ދުންފަތުގެ އިސްތިއުމާލުކުރާ މީހުންނާއި ދުންފަތުގެ އިސްތިއުމާލު ނުކުރާ މީހުންގެ ހަށިހެޔޮކަމާއި ދުޅަހެޔޮކަމަށްވެސް އެތައް ފައިދާތަކެއް ކުރާނެ ކަމެއްކަން ފާހަގަކުރައްވަމުން ރައީސް ސޯލިހު ވަނީ ހަށިހެޔޮ ދުޅަހެޔޮ ސިއްހަތެއް ރައްޔިތުންނަށް ހޯދައިދިނުމަށް، ސަރުކާރުން ކުރަމުން އަންނަ މަސައްކަތުގައި ހުރިހާ ފަރާތްތަކުގެ ބައިވެރިވުމަށް އެދިވަޑައިގަންނަވާފަ އެވެ.
