އިޒްރޭލާއި ގާޒާއާ ދެމެދު ހަމަލާ ބަދަލު ކުރުން ދާއިމަށް ހުއްޓާލުމުގެ މަޝްވަރާތަކަށް 13 އަހަރުގެ ތެރޭގައި ފުރަތަމަ ފަހަރަށް އިޒްރޭލުގެ ފޮރިން މިނިސްޓަރު ގާބީ އަޝްކެނާޒީ މިސްރަށް ވަޑައިގެންފި އެވެ.
"އަޅުގަނޑުމެން މަޝްވަރާ ކުރަނީ ހަމަލާ ބަދަލު ކުރުން ދާއިމަށް ހުއްޓާލުމުގެ އެއްބަސްވުމަކަށް ހަމާސްއާ އެކު އައުމަށް. އަދި ގާޒާއަށް އިންސާނީ އެހީ ފޯރުކޮށްދެވޭނެ ގޮތްތައް ހޯދައި، ގާޒާ އަލުން ބިނާ ކުރަން ބައިނަލްއަގްވާމީ ފަރާތްތަކުގެ ބައިވެރިވުމަށް މަގުފަހިކޮށްދޭން،" އޭނާ ޓްވީޓް ކުރެއްވި އެވެ.
އޭގެ އިތުރުން ހަމާސްއިން ގާޒާގެ ހައްޔަރުކޮށްފައިވާ އިޒްރޭލުގެ މީހުން މިނިވަން ކުރުމާ ގުޅޭ ގޮތުން ވެސް މަޝްވަރާ ކުރާނެ ކަމަށް އޭނާ ވިދާޅުވި އެވެ.
މިސްރުގެ ފޮރިން މިނިސްޓަރާ ބައްދަލު ކުރައްވަން އަޝްކެނާއީ މިސްރަށް ވަޑައިގެންފައި ވާއިރު، މިސްރުގެ ޖާސޫސީ ވެރިޔާ އައްބާސް ކަމާލް މި ވަގުތު އުޅުއްވަނީ އިސް ވަފުދަކާއެކު އިޒްރޭލާއި ފަލަސްތީނުގަ އެވެ.
"ރައީސް އަބްދުލް ފައްތާހް އަލް ސިސީ ޖާސޫސީ ވެރިޔާއަށް އެންގެވީ ހަމަލާތައް ދާއިމަށް ހުއްޓާލުމާ ގުޅޭ ގޮތުން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫއާ މަޝްވަރާ ކުރަން،" މިސްރުގެ ސެކުއިރުޓީ އޮފިޝަލުން އޭއެފްޕީއަށް ވިދާޅުވި އެވެ.
ފަލަސްތީނާއި އިޒްރޭލް މައްސަލާގައި މިސްރުން އިސް ދައުރެއް އަދާ ކުރަމުން ދާއިރު، ގާޒާ އަލުން ބިނާ ކުރަން ބޮޑެތި އެހީތަކެއް ދޭން ވެސް މިސްރުން ވަނީ ވައުދުވެފަ އެވެ. އެގޮތުން 500 މިލިއަން ޑޮލަރު ހަދިޔާ ކުރާނެ ކަމަށް ބުނެފައި ވެ އެވެ.
ރޯދަ މަސް ނިމެން ގާތްވެފައި ވަނިކޮށް އިޒްރޭލާއި ހަމާސްއާ ދެމެދު ހަމަލާ ބަދަލު ކުރަން ފެށުމުގެ ސަބަބުން ގާޒާއަށް ވަނީ ބޮޑެތި ގެއްލުންތަކެއް ވެފަ އެވެ. އެގާރަ ދުވަސް ވަންދެން އިޒްރޭލުން މެދުނުކެނޑި ބޮން އެޅުމުން ފަލަސްތީނުގެ 354 މީހުން މަރުވި އެވެ. ހަމާސްގެ ރޮކެޓް ހަމަލާތަކުގައި މަރުވީ އިޒްރޭލުގެ 12 މީހުންނެވެ.
