އިޒްރޭލުގެ ބޮޑު ވަޒީރުގެ މަގާމުން ބެންޖަމިން ނަތަންޔާހޫ ވަކި ކުރުމަށް، އިދިކޮޅު ޕާޓީތަކުން އާ ސަރުކާރެއް އެކުލަވާލުމުގެ މަސައްކަތް ކާމިޔާބުކުރުމާ ގާތްވެއްޖެ އެވެ.
ރިޕޯޓުތައް ބުނާ ގޮތުން ސެންޓްރިސްޓް ޕާޓީގެ ލީޑަރު ޔެއާ ލަޕިދް އާއި އަލްޓްރާ ނޭޝަނަލިސްޓް ޕާޓީގެ ލީޑަރު ނަފްތާލީ ބެނެޓް ވަރަށް އަވަހަށް ކޯލިޝަން އެއްބަސްވުމުގައި ސޮއިކުރައްވާނެ އެވެ.
ބެނެޓްގެ ޕާޓީގެ އިސްވެރިން ވަނީ ސެންޓްރިސްޓުންނާއެކު ކޯލިޝަން ސަރުކާރު ހެދުމަށް ތާއީދު ކުރާކަން ހާމަކުރައްވައިފަ އެވެ.
އުމުރުން 57 އަހަރުގެ ލަޕިދްއަށް އާ ކޯލިޝަން ސަރުކާރެއް އުފެއްދުމަށް ލިބިފައިވާ ސުންގަޑި ހަމަވާނީ ބުދަ ދުވަހު އެވެ.
އިޒްރޭލުގެ މީޑިއާއިން ރިޕޯޓުކުރާ ގޮތުގައި ސެންޓްރިސްޓުންނާއި އަލްޓްރާ ނޭޝަނަލިސްޓުންގެ ކޯލިޝަން އެއްބަސްވުމުގެ ދަށުން ކުރިއަށް އޮތް ދެ އަހަރު ބޮޑު ވަޒީރުކަން ކުރައްވާނީ އުމުރުން 49 އަހަރުގެ ބެނެޓް އެވެ. އަދި ދައުރުގެ ބާކީ ދެ އަހަރު ބޮޑު ވަޒީރުކަން ކުރައްވާނީ ލަޕިދް އެވެ.
ލެޕިދް (ވ) އަދި ބެނެޓް.-- ފޮޓޯ: އީޕީއޭ
ބެނެޓްގެ ޔަމީނާ ޕާޓީއަށް ވަނީ 120 މެމްބަރުން ހިމެނޭ ޕާލިމެންޓުގެ މުހިއްމު ހަ ގޮނޑިއެއް ލިބިފަ އެވެ. އެ ހަ ގޮނޑިއާއެކު އިދިކޮޅު ކޯލިޝަނުގައި ހިމެނޭ ޕާޓީތަކަށް ސާފު މެޖޯރިޓީ ލިބެ އެވެ.
ޔަމީނާ ޕާޓީން މިއަދު ނެރުނު ބަޔާނެއްގައި ބުނީ ޕާޓީގެ ވެރިންނާ ބެނެޓް ބައްދަލުކުރެއްވުމުން ކޯލިޝަން އެއްބަސްވުމަށް ރުހުން ދީފައިވާ ކަމަށެވެ.
ނަތަންޔާހޫ މަގާމުން ވަކިކޮށް އާ ސަރުކާރެއް އުފެއްދުމާ ގާތްވެފައިވީ ނަމަވެސް، މި ދަނޑިވަޅުގައި ވެސް މަގާމުގައި ދެމިހުރެވޭނެ ގޮތްތައް ނަތަންޔާހޫ ހޯދުމަކީ އެކަށީގެންވާ ކަމެއް ކަމަށް ތަޖުރިބާކާރުން ދެކެ އެވެ.
މަކަރާއި ހީލަތް ހެދުމުގެ ތުހުމަތުގައި ނަތަންޔާހޫއާ ދެކޮޅަށް ޝަރީއަތް ހިންގަމުން ދާއިރު އާ ކޯލިޝަން ސަރުކާރުގައި ހިމެނޭ ޕާޓީތަކުގެ ސިޔާސީ ވިސްނުން ވަރަށް ތަފާތެވެ. ނަމަވެސް ހުރިހާ ޕާޓީއަކުން ވެސް ކެތްމަދުވެފައި ވަނީ ނަތަންޔާހޫ މަގާމުން ދުރު ކުރުމަށެވެ.
އުމުރުން 71 އަހަރުގެ ނަތަންޔާހޫ ވެރިކަން ކުރައްވާތާ މިހާރު 12 އަހަރު ވެއްޖެ އެވެ. މިދިޔަ މާޗް މަހު އޮތް އާއްމު އިންތިހާބުން އޭނާގެ ޕާޓީއަށް މެޖޯރިޓީ ވޯޓު ހޯދިފައެއް ނުވެ އެވެ. އެއީ ފާއިތުވި ދެ އަހަރު ތެރޭގައި އޭނާގެ ޕާޓީއަށް މެޖޯރިޓީ ނުލިބުނު ހަތަރު ވަނަ އިންތިހާބެވެ.
މާޗް މަހުގެ އިންތިހާބުގެ ނަތީޖާއަށް ފަހު ކޯލިޝަން ސަރުކާރެއް ހެދުމުގެ ފުރުސަތު ނަތަންޔާހޫއަށް ލިބުނު ނަމަވެސް އެއްވެސް ޕާޓީއަކުން އޭނާއާއެކު ކޯލިޝަން ސަރުކާރެއް ހަދަން އެއްބަހެއް ނުވި އެވެ.
އެއާއެކު ކުރިން ފިނޭންސް މިނިސްޓަރުކަން ކުރެއްވި ލަޕިދްއަށް ކޯލިޝަން ސަރުކާރު ހެދުމުގެ ފުރުސަތު ދިނެވެ. އެކަމަށް ދިން ސުންގަޑިއަކީ ޖޫން 2 އެވެ.
މާޗް މަހުގެ އިންތިހާބުގައި ނަތަންޔާހޫގެ ލިކޫދް ޕާޓީން އެންމެ ގިނަ ވޯޓު ހޯދިއިރު، ދެ ވަނައަށް އެންމެ ގިނަ ވޯޓު ލިބުނީ ލަޕިދްގެ ޔެޝް އަތިދް ޕާޓީ އަށެވެ.
ކޯލިޝަން ސަރުކާރު ހަދަން ލަޕިދްއަށް އެންމެ ފުރަތަމަ ދިނީ 28 ދުވަހުގެ މުއްދަތެވެ. ނަމަވެސް އެގާރަ ދުވަސް ވަންދެން އިޒްރޭލާއި ގާޒާގައި ވެރިކަން ކުރާ ހަމާސްއާ ދެމެދު ހަމަލާ ބަދަލު ކުރުމުން، ކޯލިޝަން ހެދުމުގެ މަސައްކަތް ހުއްޓުން އެރިއެވެ.
ލަޕިދްއާއެކު ކޯލިޝަން ސަރުކާރެއް ހަދަން ޝައުގުވެރިކަން ފާޅުކުރި އަރަބި އިސްލާމިސްޓް ރާމް ޕާޓީން މަޝްވަރާގައި ބައިވެރިވާން ދެކޮޅު ހެދީ ވެސް ގާޒާއަށް ހަމަލާ ދެމުން ދިއުމުންނެވެ.
ނަތަންޔާހޫގެ ލިކޫދް ޕާޓީން ވަނީ އެންމެ ފަހު ވަގުތު ސަރުކާރުގައި ދެމި އޮވެވޭތޯ ބައެއް ޕާޓީތަކަށް ހުށަހެޅުންތައް ހުށަހަޅާފަ އެވެ. ނަމަވެސް އެއްވެސް ޕާޓީއަކުން އެކަން ގަބޫލެއް ނުކުރި އެވެ.
ލަޕިދް އާއި ބެނެޓްގެ ޕާޓީން ކޯލިޝަން އެއްބަސްވުމުގައި ސޮއިނުކޮށްފި ނަމަ އަނެއްކާވެސް ޖެހޭނީ އިންތިހާބު ބާއްވާށެވެ. އެ އިންތިހާބު ވެގެން ދާނީ ދެ އަހަރު ތެރޭ ބާއްވާ ފަސް ވަނަ އިންތިހާބަށެވެ.
އިޒްރޭލުގެ ބަރުލަމާނީ ނިޒާމުގައި އޮންނަ ޕްރޮޕޯޝަނަލް ރެޕްރެޒެންޓޭޝަންގެ ސަބަބުން އެއް ޕާޓީން ސަރުކާރެއް އުފެއްދޭ ވަރަށް ގޮނޑި ހޯދުމަކީ ވަރަށް އުނދަގޫ ކަމެކެވެ.
