ބާސެލޯނާ (މެއި 30) - ބާސެލޯނާގެ ތަރި ލިއޮނަލް މެސީގެ މުސްތަގުބަލާ ގުޅިގެން އެ ކްލަބްގެ ސަޕޯޓަރުން ހާސްވާން ނުޖެހޭނެ ކަމަށާއި މެސީ އެ ކްލަބްގައި މަޑުކުރާނެ ކަމަށް ބާސެލޯނާގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
ބާސެލޯނާއާ އެކު 2017 ވަނަ އަހަރު މެސީ ސޮއިކުރި ކޮންޓްރެކްޓް ހަމަވާން ދެން އޮތީ މަހެއްހާ ދުވަހެވެ. މިދިޔަ ސީޒަން ފެށުމުގެ ކުރިން މެސީ ބާސެލޯނާ ދޫކޮށްލަން ބޭނުންވި ނަމަވެސް އެ ކްލަބްގެ ރައީސަަކަށް އޭރު ހުރި ޖޯސެފް މާރިއާ ބާޓޮމެއު ވަނީ މެސީ ދޫކޮށްލަން ދެކޮޅު ހަދައިފަ އެވެ. ކްލަބާ ދެކޮޅަށް ކޯޓަށް ގޮސްގެން ކަންކަން ހާސިލްކުރަން ބޭނުންނުވާތީ މެސީ އޭރު ބާސެލޯނާގައި މަޑުކުރަން ނިންމި އެވެ.
މި އަހަރުގެ ކުރީކޮޅުގައި ބާސެލޯނާގެ ރައީސް ކަމަށް ލަޕޯޓާ އަލުން އިންތިހާބުވުމަށް ފަހު އަންނަނީ މެސީއާ ބެހޭގޮތުން އަަބަދު ވެސް އުއްމީދީ ވާހަކަތަކެއް ދައްކަމުންނެވެ. އެކަމަކު މެސީ އާ ކޮންޓްރެކްޓެއްގައި ސޮއި ނުކޮށް އޮއްވައި ސީޒަން ވެސް ނިމިފައިވާއިރު، ބާސެލޯނާގެ ބައެއް ސަޕޯޓަރުން ތިބީ މެސީ ޓީމުގައި މަޑުނުކޮށްފާނެތީ ބިރު ވެސް ހީވެފަ އެވެ.
"މިހާރު މެސީއާ އެކު ދައްކަން ޖެހޭ ވާހަކަތައް ކުރިއަށް އެބަދޭ. އަހަރެން ކުރިން ވެސް ވާނީ ބުނެފައި އަހަރެން މި ކްލަބްގެ ރައީސަކަށް ހުއްޓައި މެސީ ނުދާނެއޭ. އަދިވެސް މި ދެނީ އެ ޔަގީންކަން. ސަޕޯޓަރުން ހާސްވާކަށް ނުޖެހޭނެ. މެސީ ހުންނާނީ މި ޓީމުގައި،" ސްޕެއިނުގެ ނޫހަކަށް ދިން އިންޓަވިއުއެއްގައި ލަޕޯޓާ ބުންޏެވެ.
2011 ވަނަ އަހަރު ސްޕެނިޝް ލީގުގެ ކާމިޔާބީ އަށް ފަހު މެސީ (ކ) އާއި ލަޕޯޓާ ޓްރޮފީ ހިފައިގެން.-- ފޮޓޯ: އޭއެފްޕީ
ބާސެލޯނާ އިން ދެން މެސީ އަށް ހުށަހަޅާނީ ހަތަރު އަހަރުގެ އެއްބަސްވުމެކެވެ. އެއީ ދެ އަހަރު ފަހުން އެމެރިކާ ލީގުގެ ޓީމަކަށް ނޫނީ ސައުތު އެމެރިކާގެ ޓީމަކަށް ބަދަލުވެވޭ ގޮތަށް ވަކި މާއްދާތަކެއް ހިމެނުމަށް ފަހު ކަމަށް ރިޕޯޓްތައް ބުނެ އެވެ.
ރިޕޯޓްތައް ބުނާގޮތުން މެސީ ބާސެލޯނާގައި މަޑުކުރަން ކުރި ޝަރުތަކީ ހުރިހާ މުބާރާތްތަކަށް ވާދަކުރެވޭ ފެންވަރުގެ ޓީމެއް އެކުލަވާލުމަށެވެ. ބާސެލޯނާގައި ޓްރާންސްފާ އަށް ހަރަދުކުރާނެ މާ ބޮޑު ފައިސާގެ ބަޖެޓެއް ނެތުމުން އެ ކްލަބުން ވަނީ އެމެރިކާގެ އިންވެސްޓްމެންޓް ބޭންކް ގޯލްޑްމަން ސާކްސް އިން 500 މިލިއަން ޔޫރޯގެ ލޯނެއް ނަގައިފަ އެވެ. އެއީ ކްލަބްގެ ދަރަނިތައް ދެއްކުމާއި ޓްރާންސްފާ މާކެޓްގައި ކޮންމެ ވެސް ވަރަކަށް ހަރަދުކުރުމަށެވެ.
ބާސެލޯނާ އިން ވަނީ ހިލޭ ޓްރާންސްފާއެއްގެ ދަށުން ހަތަރު ކުޅުންތެރިންނާ އެކު އަނގަބަހުން އެއްބަސްވުމަކަށް އަތުވެފަ އެވެ. އެއީ މެންޗެސްޓާ ސިޓީގެ ފޯވާޑް ސާޖިއޯ އަގުއޭރޯ، ލިޔޯންގެ ފޯވާޑް މެމްފިސް ޑިޕާއި، ސިޓީގެ ޑިފެންޑަރު އެރިކް ގާސިއާ އަދި ލިވަޕޫލްގެ މިޑްފީލްޑަރު ޖިއޮޖީނިއޯ ވައިނަލްޑަމް އެވެ. ބާސެލޯނާ އިން އަންނަނީ އޭސީ މިލާނުގެ ޒުވާން ކީޕަރު ޖިއަންލުއީޖީ ޑޮންނަރުންމާ ގެންނަން ވެސް މަސައްކަތް ކުރަމުންނެވެ. އޭނާ ވެސް ގެނެވޭތޯ ބަލަނީ ހިލޭ ޓްރާންސްފާއެއްގަ އެވެ.
ފީފާ އާއި ޔުއެފާއާ ދެކޮޅަށް މަޝްހޫރު ކްލަބްތަކެއް އަޑީގައި އޮވެގެން ފަށަން މަސައްކަތް ކުރަމުން އަންނަ ސުޕަ ލީގުގައި މި ވަގުުތު ބާކީ އޮތީ ބާސެލޯނާ އާއި ރެއާލް މެޑްރިޑް އަދި ޔުވެންޓަސް އެވެ. ޔުއެފާގެ އަދަބަކުން ސަލާމަތްވާން ސުޕަ ލީގުން ވަކިވެ މައާފަށް އެދުމަށް ވަނީ އެ ކްލަބްތަކަށް އަންގައިފަ އެވެ. އެކަމަކު ލަޕޯޓާ ވަނީ މައާފަށް ނޭދޭނެ ކަމަށް ވިދާޅުވެފަ އެވެ.
