މިއާމީ (މެއި 29) - މަޝްހޫރު ފުޓްބޯޅަ ލެޖެންޑް ޑޭވިޑް ބެކަމްގެ ހިއްސާ އޮންނަ އެމެރިކާގެ ކްލަބް އިންޓަ މިއާމީ އެފްސީން މިދިޔަ އަހަރު ފްރާންސްގެ މިޑްފީލްޑަރު ބްލައިސް މަޓުއިޑީގެ ސޮއި ހޯދިއިރު، ގަވައިދާ ހިލާފަށް ހަރަދުކޮށް އޭނާ ރަޖިސްޓްރީ ކުރުމުގައި އޮޅުވާލި މައްސަލައިގައި އެ ޓީމު ދެ މިލިއަން ޑޮލަރުން ޖޫރިމަނާކޮށްފި އެވެ.
މިއީ އެމެރިކާގެ ފުޓްބޯޅަ ލީގު އެމްއެލްއެސް ފްރެންޗައިސްގެ ދަށުން ފެށި ފަހުން ކްލަބަކަށް ދިން އެންމެ ބޮޑު އަދަބެވެ.
ޔުވެންޓަސް ދޫކޮށް މަޓުއިޑީ އިންޓަ މިއާމީ އަށް ބަދަލުވީ މިދިޔަ އަހަރު އެވެ. ގަވާއިދާ ހިލާފަށް ހަރަދުކުރި އެ މައްސަލައިގެ ތަހުގީގުތައް ފެށީ މިދިޔަ މަހު އެވެ.
އެމެރިކާ ލީގު އެމްއެލްއެސްގެ ބިދޭސީ ކުޅުންތެރިންގެ ގަވައިދުގައިވާ ގޮތުން ބޮޑު ހަރަދުކޮށްފައި ހާއްސަ ތިން ޖާގަ އަކަށް ތިން ކުޅުންތެރިއަކު ގެނެވިދާނެ އެވެ. އެ ކުޅުންތެރިންނަށް މުސާރައިގެ ލިމިޓެއް ނޯންނާނެ އެވެ. މި ގަވައިދަކީ 2007 ވަނަ އަހަރު ބެކަމް އެމެރިކާގެ ގެލެކްސީ އަށް ސޮއިކުރިއިރު، އުސޫލެއް ހެދުމުގެ ގޮތުން "ބެކަމް ރޫލް" ގެ ނަމުގައި އެމްއެލްއެސް އިން އެކުލަވާލި ގަވާއިދެކެވެ.
އެމްއެލްއެސް ޑިސިޕްލިނަރީ ކޮމިޓީން ބެލި ބެލުމުގައި އުމުރުން 34 އަހަރުގެ މަޓުއިޑީގެ ހަރަދު އޮޅުވާލައި އޭނާ ރަޖިސްޓްރީ ކުރުމުގައި ވެސް ގޯސް ހަދާފައިވުމުގެ އިތުރުން އެ ޓީމަށް ކުރިން ކުޅުނު ކޮލަމްބިއާގެ ޑިފެންޑަރު އަންދްރޭ ރެޔެސް ވެސް އިނީ ނުބައިކޮށް ރަޖިސްޓްރީ ކޮށްފަ އެވެ.
މި މައްސަލަތަކަށް ބަލައި ޑިސިޕްލިނަރީ ކޮމިޓީން ވަނީ އިންޓަ މިއާމީ އަށް 2022 އާއި 2023 ވަަނަ އަހަރުގައި ކުޅުންތެރިން ހޯދަން ކުރާ ހޭދަ އިން 2.2 މިލިއަން ޑޮލަރު އުނިކުރަން އަންގައި އެ ކްލަބްގެ މެނޭޖްމަންޓްގެ އިސް ވެރިޔާ ޖޯޖް މާސް 250،000 ޑޮލަރުން ޖޫރިމަނާ ކޮށްފަ އެވެ. އޭގެ އިތުރުން އިންޓަ މިއާމީގެ ކުރީގެ ޗީފް އެގްޒެކްޓިވް އަދި ސްޕޯޓިން ޑިރެކްޓަރު ޕޯލް މެކްޑޮނައުގް 2022 ވަނަ އަހަރުގެ ސީޒަންގެ ނިޔަލަށް ސަސްޕެންޑްކޮށްފަ އެވެ.
ޑިސިޕްލިނަރީ ކޮމިޓީން ވަނީ އެއްވެސް ކުޅުންތެރިއެއްގެ މައްސަލަ ނުބަލަން ނިންމައިފަ އެވެ.
އިންޓަ މިއާމީގެ ކޯޗަކީ މެންޗެސްޓާ ޔުނައިޓެޑާއި އެވަޓަން އަދި އިންގްލްންޑް ގައުމީ ޓީމުގެ ކުރީގެ ކުޅުންތެރިޔާ ފިލިޕް ނެވިލް އެވެ. ފިލިޕް ނެވިލް އެންމެ ފަހުން ހަވާލުވެ ހުރީ އިންގްލެންޑްގެ އަންހެން ޓީމާ އެވެ.
