ހައްދުފަހަނައަޅާދިއުމުގެ ވިސްނުން ފަތުރައި، ޓެރަރިސްޓް ޖަމާއަތްތަކަށް ތާއިދުކުރާ ކަމުގެ ތުހުމަތަށް އިތުރު ތިން މީހަކު ހައްޔަރުކޮށްފި އެވެ.
މި ތިން މީހުން ހައްޔަރުކޮށްފައިވަނީ ހުޅުމާލޭގައި، އިއްޔެ ހަވީރުން ފެށިގެން ރޭ ދަންވަރާ ހަމައަށް ގެންދިޔަ ހާއްސަ އޮޕަރޭޝަނެއްގަ އެވެ.
އެނގިފައިވާ ގޮތުގައި، ތިން މީހުންގެ ތެރެއިން އެކަކީ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅުން އޮތް މީހެކެވެ.
ނަމަވެސް، މިކަމާ ގުޅޭ ގޮތުން ފުލުހުން އަދި މައުލޫމާތެއް ނުދެ އެވެ.
ހައްޔަރުކުރި މީހުންގެ މައްޗަށް ކުރާ ތުހުމަތުތައް
ހަރުކަށި ފިކުރު ކުރިއެރުވުމަށްޓަކައި މާލޭ ސިޓީ ސަރަހައްދުގައި ވަކިން ޖަމާއަތް ހަދައިގެން ނަމާދު ކުރުން
- އިސްލާމްދީނުގެ ނަމުގައި ހަރުކަށިފިކުރު ފެތުރުމަށް ހިތްވަރުދޭ ކްލާސްތައް ބޭއްވުން
- ދީނީ އެއްބައިވަންތަކަން ނަގާލަން މަސައްކަތްކުރުން
- ޓެރަރިސްޓް ޖަމާއަތްތަކަށް ތާއިދުކުރުން
- ޖިހާދުގެ ނަމުގައި ރާއްޖެއިން ބޭރުގެ އެކިއެކި ގައުމުތަކުގައި ހިންގާ ދާހިލީ ހަނގުރާމަތަކަކީ ސަބަބުވެރި އަމަލެއް ކަމުގައި ދައްކުވައި ޖިހާދަށް މީހުން ފޮނުވުން
- ޖިހާދަށް މީހުން ރެކްރޫޓްކުރުން
- ރާއްޖޭގައި ހަރަކާތްތެރިވާ ހަރުކަށި ފިކުރުގެ ފަރާތްތަކުން ޓެރަރިޒަމްގެ ހަމަލާއެއް ރާވަމުންދާ ކަމުގެ ތުހުމަތު
ރައީސް ނަޝީދަށް ދިން ހަމަލާއާ ސީދާ ގޮތުން ގުޅުން އޮތް ކަމުގެ ތުހުމަތަށް މިހާތަނަށް ހައްޔަރުކޮށްފައިވަނީ ހަތަރު މީހެކެވެ. އެއީ، އަދުހަމް އަހުމަދާއި މުޖާޒް އަހްމަދާއި ތަހުމީން އަހްމަދާއި އަހްމަދު ފާތިހެވެ.
ޓެރަރިސްޓް ހަމަލާއަށްފަހު ފުލުހުން ގެންދަނީ ހަރުކަށި ފިކުރާ ދެކޮޅަށް ބޮޑު އޮޕަރޭޝަނެއް ވެސް ހިންގަމުންނެވެ. އެގޮތުން އެ އޮޕަރޭޝަނުގައި މާލޭންނާއި ހުޅުމާލޭން ހައްދުހަނައެޅުމުގެ ބޮޑުން ކަމަށް ބެލެވޭ ދެ މީހަކު މީގެކުރިން ހައްޔަރުކޮށްފައިވެ އެވެ.
އެއީ، އަބްދުﷲ އަލީ މަނިކާއި މުހައްމަދު ނާޒިމެވެ. އެ ދެ މީހުން ވެސް ތިބީ 15 ދުވަހުގެ ޖަލު ބަންދެއްގަ އެވެ. އޮޕަރޭޝަންގެ ތެރެއިން އައްޑޫ ސިޓީން އައިއެސްއަށް ތާއިދުކުރާ ނުވަ މީހަކު ވެސް ހައްޔަރުކޮށް ބަންދުކޮށްފައިވެ އެވެ.
ބޮމުގެ ހަމަލާގައި ރައީސް ނަޝީދު ރަށް ބޮޑަށް އަނިޔާވެވަޑައިގެންނެވި އެވެ. ގާތްގަނޑަކަށް 16 ވަރަކަށް ގަޑިއިރުގެ އޮޕަރޭޝަނަކަށްފަހު ނަޝީދުގެ ހަށިކޮޅުން 10 ރޭޒަރު ފުއް ޑޮކްޓަރުން ނެގި އެވެ. އަދި ހަށިކޮޅުގައި ބޮން ހަރުކޮށްފައި ހުރި ސައިކަލުގެ ޕުލާސްޓިކު ކޮޅެއް ވެސް ތާށިވެފައި އޮތެވެ.
އިތުރު ފަރުވާއަށް ނަޝީދު މިވަގުތު ހުންނެވީ ޖަރުމަނުގަ އެވެ.
ކޮމިޝަނާ އޮފް ޕޮލިސް މުހައްމަދު ހަމީދު ވަނީ ރައީސް ނަޝީދުގެ ހަމަލާއާ ގުޅުން އޮތް އެންމެ ހައްޔަރުކޮށް، އެކަމަށް ފަންޑުކުރި މީހުންނާއި އަޑީގައި ތިބި މީހުން ވެސް ހޯދައި، އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ދެއްވާފަ އެވެ.
