ފަލަސްތީނާއި އިޒްރޭލުގައި ހިންގާފައިވާ ކަމަށް ބެލެވޭ ހަނގުރާމައިގެ ޖަރީމާ ތަހުގީގު ކުރަން އދ. ގެ އިންސާނީ ހައްގުތަކާ ބެހޭ ކައުންސިލުން ނިންމުމުން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ފާޑުވިދާޅުވެއްޖެ އެވެ.
އދ. ގެ ނިންމުމަކީ "ލަދުވެތި" ނިންމުމެއްގެ ގޮތުގައި ސިފަކުރައްވަމުން ނަތަންޔާހޫ ވިދާޅުވީ އދ. އިން އުޅެނީ އިޒްރޭލާ ހެދި "މޮޔަވެގެން" ކަމަށެވެ. އަދި އދ. އިން ގެންގުޅެނީ އިޒްރޭލާ ދެކޮޅު ވިސްނުން ކަމަށް ތުހުމަތު ކުރެއްވި އެވެ.
"މި ނިންމުމަކީ ބައިނަލްއަގްވާމީ ގާނޫނަށް ޖޯކު ޖަހައި، ދުނިޔޭގެ އެތަން މިތަނުގައި އުޅޭ ޓެރަރިސްޓުންނަށް ހިތްވަރުދޭ ނިންމުމެއް،" އޭނާ ވިދާޅުވި އެވެ.
އިޒްރޭލުން އދ. ގެ ނިންމުމަށް ފާޑުކިޔާފައި ވާއިރު ފަލަސްތީނުން ވަނީ އެކަމަށް މަރުހަބާ ކިޔާފަ އެވެ. އެ ނިންމުމަކީ ފަލަސްތީނުގެ ރައްޔިތުންނާ މެދު އިޒްރޭލުން ހިންގާ ޖަރީމާތަކާ ދެކޮޅަށް އދ. އިން ނިންމި ނިންމުމެއްގެ ގޮތުގައި ސިފަކުރި އެވެ.
"ފަލަސްތީނު މީހުންނާ ދެކޮޅަށް ގެންގުޅޭ ތަފާތު ކުރުމާއި ލާއިންސާނީ އަމަލުތަކާ މެދު ފިޔަވަޅު ނާޅާ އޮތް އޮތުމަކީ ހަގީގަތެއް ކަމަށް ގަބޫލުކޮށްފައި ވާއިރު، އެކަމާ މެދު އަޅާ ނުލާ ނުތިބެވޭނެކަން މި ވަނީ ހާމަވެފައި،" ފަލަސްތީނުން ބުންޏެވެ.
އިޒްރޭލާއި ގާޒާ ކޮންޓްރޯލް ކުރާ ހަމާސް ޖަމާއަތާ ދެމެދު ބަދަލު ކުރި ހަމަލާތަކުގައި ހަނގުރާމައިގެ ޖަރީމާ ހިންގި ކަމަށް ބެލެވޭތީ އެކަން ތަހުގީގު ކުރަން އދ. ގެ އިންސާނީ ހައްގުތަކާ ބެހޭ ކައުންސިލުން ނިންމީ މެމްބަރު 47 ގައުމުގެ ތެރެއިން 24 ގައުމުގެ ވޯޓާ އެކު އެވެ.
އިޒްރޭލުން ހަނގުރާމައިގެ ޖަރީމާ ހިންގާ ކަމަށް ބެލެވިދާނެ: އދ
އިޒްރޭލުން ގާޒާއަށް ހަމަލާ ދިނީ ހާލަތާ ނުބައްދަލު މިންވަރަށް ކަމަށް ދައްކައިފި ނަމަ އެއީ ހަނގުރާމައިގެ ޖަރީމާގެ ގޮތުގައި ބެލެވިދާނެ ކަމަށް އދ. ގެ އިންސާނީ ހައްގުތަކާ ބެހޭ އެންމެ އިސްވެރިޔާ މިޝޭލް ބެޝެލެޓް އެ ކައުންސިލްގެ ބައްދަލުވުން ފަށަމުން ރޭ ވިދާޅުވި އެވެ.
ބައްދަލުވުން ފެށުމުގެ ގޮތުން ވާހަކަދައްކަވަމުން ބެޝެލެޓް ވިދާޅުވީ އިޒްރޭލުން ހަމަލާ ދިން ގާޒާގެ އާއްމުން ދިރިއުޅޭ އިމާރަތްތަކަކީ އަސްކަރީ އެއްވެސް ކަމަކާ ގުޅުމެއް އޮތް އިމާރާތެއް ކަމަށް ދޭހަވާ އެއްވެސް ހެއްކެއް މިހާތަނަށް ނެތް ކަމަށެވެ.
"ހާލަތާ ނުބައްދަލު ކަމަށް ކަނޑައަޅައިފި ނަމަ، މިފަދަ ހަމަލާތަކަކީ ހަނގުރާމައިގެ ޖަރީމާގެ ގޮތުގައި ބެލެވޭނެ،" 47 މެމްބަރު ގައުމާއެކު ސްވިޓްޒަލޭންޑުގެ ޖެނީވާގައި ބޭއްވި ބައްދަލުވުމުގައި އޭނާ ވިދާޅުވި އެވެ.
އޭގެ އިތުރުން ގާޒާ ކޮންޓްރޯލް ކުރާ ހަމާސް ގްރޫޕުން ވެސް ބެލުމެއް ނެތި އިޒްރޭލަށް ރޮކެޓު ހަމަލާ ފޮނުވުން ހުއްޓާލުމަށް ބެޝެލެޓް ގޮވާލެއްވި އެވެ.
މޭ 10 ވަނަ ދުވަހުން ފެށިގެން 11 ދުވަސް ވަންދެން އިޒްރޭލާއި ހަމާސްއާ ދެމެދު ހަމަލާ ބަދަލު ކުރުމުގެ ސަބަބުން ފަލަސްތީނުގެ 66 ކުދިންނާއެކު 253 މީހުން މަރުވެ، 1،900 އަށް ވުރެ ގިނަ މީހުން ޒަހަމްވި ކަމަށް ގާޒާގެ ހެލްތު މިނިސްޓްރީން ބުނެ އެވެ.
ހަމާސްއިން ފޮނުވި ރޮކެޓު ހަމަލާތަކުގައި އިޒްރޭލުން މަރުވީ 12 މީހުންނެވެ. އެއީ ތިން ބިދޭސީ މަސައްކަތްތެރިންނާއި ދެ ކުދިން ހިމެނޭ ގޮތަށެވެ.
