އިޒްރޭލުން ގާޒާއަށް ހަމަލާ ދިނީ ހާލަތާ ނުބައްދަލު މިންވަރަށް ކަމަށް ދައްކައިފި ނަމަ އެއީ ހަނގުރާމައިގެ ޖަރީމާގެ ގޮތުގައި ބެލެވިދާނެ ކަމަށް އދ. ގެ އިންސާނީ ހައްގުތަކާ ބެހޭ އެންމެ އިސްވެރިޔާ މިޝޭލް ބެޝެލެޓް ވިދާޅުވެއްޖެ އެވެ.
އދ. އިންސާނީ ހައްގުތަކާ ބެހޭ ކައުންސިލުން މިއަދު ވަނީ ޕާކިސްތާނާއި ފަލަސްތީނުގެ އެދުމުގެ މަތިން ހާއްސަ ބައްދަލުވުމެއް ފަށާފަ އެވެ. އެ ކައުންސިލުގެ ބައްދަލުވުމެއް ބާއްވައި ދިނުމަށް އެދުނީ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ރުހުމާ އެކު އެވެ.
ބައްދަލުވުން ފެށުމުގެ ގޮތުން ވާހަކަދައްކަވަމުން ބެޝެލެޓް ވިދާޅުވީ އިޒްރޭލުން ހަމަލާ ދިން ގާޒާގެ އާއްމުން ދިރިއުޅޭ އިމާރަތްތަކަކީ އަސްކަރީ އެއްވެސް ކަމަކާ ގުޅުމެއް އޮތް އިމާރާތެއް ކަމަށް ދޭހަވާ އެއްވެސް ހެއްކެއް މިހާތަނަށް ނެތް ކަމަށެވެ.
"ހާލަތާ ނުބައްދަލު ކަމަށް ކަނޑައަޅައިފި ނަމަ، މިފަދަ ހަމަލާތަކަކީ ހަނގުރާމައިގެ ޖަރީމާގެ ގޮތުގައި ބެލެވޭނެ،" 47 މެމްބަރު ގައުމާއެކު ސްވިޓްޒަލޭންޑުގެ ޖެނީވާގައި ބޭއްވި ބައްދަލުވުމުގައި އޭނާ ވިދާޅުވި އެވެ.
އޭގެ އިތުރުން ގާޒާ ކޮންޓްރޯލް ކުރާ ހަމާސް ގްރޫޕުން ވެސް ބެލުމެއް ނެތި އިޒްރޭލަށް ރޮކެޓު ހަމަލާ ފޮނުވުން ހުއްޓާލުމަށް ބެޝެލެޓް ގޮވާލެއްވި އެވެ.
މޭ 10 ވަނަ ދުވަހުން ފެށިގެން 11 ދުވަސް ވަންދެން އިޒްރޭލާއި ހަމާސްއާ ދެމެދު ހަމަލާ ބަދަލު ކުރުމުގެ ސަބަބުން ފަލަސްތީނުގެ 66 ކުދިންނާއެކު 253 މީހުން މަރުވެ، 1،900 އަށް ވުރެ ގިނަ މީހުން ޒަހަމްވި ކަމަށް ގާޒާގެ ހެލްތު މިނިސްޓްރީން ބުނެ އެވެ.
ހަމާސްއިން ފޮނުވި ރޮކެޓު ހަމަލާތަކުގައި އިޒްރޭލުން މަރުވީ 12 މީހުންނެވެ. އެއީ ތިން ބިދޭސީ މަސައްކަތްތެރިންނާއި ދެ ކުދިން ހިމެނޭ ގޮތަށެވެ.
އޯއައިސީން ބާރު އަޅައިގެން އދ. އިންސާނީ ހައްގުތަކާ ބެހޭ ކައުންސިލުގެ ހާއްސަ ޖަލްސާއެއް ފެށީ ގާޒާއަށް އަމާޒުކޮށް ދެމުންދާ ހަމަލާތަކާއި، ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ އަމަލުތަކާ ގުޅޭ ބައިނަލްއަގްވާމީ ތަހުގީގެއް ހިންގުމަށް ގޮވާލާ ގަރާރެއްގެ ބަހުސް ކުރުމަށެވެ.
