ލަންޑަން (މެއި 27) - ގޮލްފް ކުޅެން ހާއްސަވުމުގެ ގޮތުން ވޭލްސްގެ ފުޓްބޯޅަ ތަރި ގެރެތު ބޭލް މި ފަހަރުގެ ޔޫރޯ ފުޓްބޯޅަ މުބާރާތަށް ފަހު ރިޓަޔާކުރަން ނިންމާފައިވާ ކަމަށް ދެކެވޭ ވާހަކަ އަކީ ދޮގެއް ކަމަށް ބޭލްގެ އޭޖެންޓް ޖޮނަތަން ބާނެޓް ބުނެފި އެވެ.
މީޑިއާ ރިޕޯޓްތައް ބުނާގޮތުން މި ފަހަރުގެ ޔޫރޯ އަށް ފަހު އުމުރުން 31 އަހަރުގެ ބޭލް ފުޓްބޯޅަ ކުޅުން ހުއްޓާލައި ޕްރޮފެޝަނަލްކޮށް ގޮލްފް ކުޅެން ހުސްވާނެ އެވެ. އަދި އެ ގޮތަށް ބޭލް ކަންތައް ކުރާނީ ރެއާލް މެޑްރިޑާ އެކު ބޭލް ހަދާފައިވާ އެއްބަސްވުމުގައި ބާކީ އެއް އަަހަރު އޮއްވައި އެ ކޮންޓްރެކްޓް ކެންސަލްކުރުމަށް ފަހު ކަމަށް ވެސް ރިޕޯޓްކޮށްފައިވެ އެވެ.
ޓޯކްސްޕޯޓްސްގެ ފުޓްބޯޅަ ޝޯ އަށް ދިން އިންޓަވިއުއެއްގައި ބާނެޓް ބުނީ ބޭލް އަދިވެސް ހުރީ ފުޓްބޯޅައިން ކުރިއަށްދާން ކަމަށާއި މީޑިއާގައި ބޭލްއާ ބެހޭގޮތުން އަބަދު ވެސް އެކި ގޮތްގޮތަށް ވާހަކަ ދެކެވޭ ކަމަށެވެ.
"ބައެއް މީހުންނަށް މީޑިއާގައި ބޭލްގެ ވާހަކަ ދައްކާލުން މާ ބޮޑަށް ފަސޭހަވެފައި އޮތީ. ބޭލް ފުޓްބޯޅައިން ރިޓަޔާކުރާނެ އިރެއް ނުނިންމާ،" ބާނެޓް ބުންޏެވެ.
ޓޮޓެންހަމް ދޫކޮށް 2013 ވަނަ އަހަރު އޭރު ދުނިޔޭގެ ރެކޯޑް އަގެއް ކަމަށްވާ 86 މިލިއަން ޕައުންޑަށް ރެއާލަށް ބަދަލުވުމަށް ފަހު ބޭލް ވަނީ އެ ޓީމާ އެކު ހަތަރު ޗެމްޕިއަންސް ލީގާއި ދެ ލަލީގާ ކާމިޔާބުކޮށްފަ އެވެ. އެއް އަހަރުގެ ލޯން އެއްބަސްވުމެއްގެ ދަށުން ބޭލް މި ސީޒަނުގައި ޓޮޓެންހަމަށް ކުޅެ މުހިއްމު ގޯލުތަކެއް ޖެހި އެވެ.
ޓޮޓެންހަމްގައި ލޯން އެއްބަސްވުމުގެ ދަށުން ކުޅުނު ނަމަވެސް ބޭލްގެ އަހަރެއްގެ މުސާރައިގެ ދެބައިކުޅަ އެއްބައި ދިނީ ރެއާލުންނެވެ. ބޭލް އަށް އަހަރަކު މުސާރައިގެ ގޮތުގައި 30 މިލިއަން ޔޫރޯ ލިބެ އެވެ. ބޭލް ރެއާލާ އެކު ހަދާފައިވާ އެއްބަސްވުމުގައި ބާކީ އެއް އަހަރު އެބައޮތެވެ.
މި ސީޒަނުގައި ޓޮޓެންހަަމަށް ގޯލެއް ޖަހައިދިނުމަށް ފަހު ބޭލް އުފާފާޅުކުރަނީ.
ދާދި ފަހުން ބޭލް ވަނީ އަންނަ ސީޒަނުގައި ކުޅޭނެ ތަނެއް ނިންމާފައިވާ ކަމަށް ވެސް ބުނެފަ އެވެ. އިތުރު އަހަރަކަށް ލޯން އެއްބަސްވުމެއްގެ ދަށުން ބޭލް ގެންނަން ޓޮޓެންހަމް އިން ޝައުގުވެރިވެ އެވެ. އެކަަމަކު އެއީ މި ސީޒަނުގައި ކުޅުނު ވަރަށް ވުރެ ކުޑަ މުސާރަ އަކަށެވެ.
ރެއާލްގައި ބޭލް ހޭދަކުރި ފަހު ސީޒަންތަކުގައި އެ ކްލަބްގެ ކޯޗު ޒިނެދިން ޒިދާން އާއި ބޭލްގެ ގުޅުން އެންމެ ރަނގަޅެއް ނޫނެވެ. އަދި ރެއާލް ސަޕޯޓަރުންގެ މެދުގައި ވެސް ބޭލްއާ މެދު ހިތްހަމަނުޖެހުން ބޮޑެވެ. އެއީ ވޭލްސް އަށް ކުޅުނު މެޗެއްގެ ތެރޭގައި ބޭލް ގެންގުޅުނު ބެނާއެއްގައި ޖަހާފައިވާ ލިޔުމެއްގެ ސަބަބުންނެވެ.
ޔޫރޯ ކޮލިފައިންގައި 2019 ވަނަ އަހަރު ބޭލް ހިފައިގެން ހުރި އެ ދިދައިގައި ޖަހާފައިވަނީ "ވޭލްސް. ގޮލްފް، މެޑްރިޑް. އިން ދެޓް އޯޑާ" މިހެންނެވެ. ބޭލް އަކީ ހުސް ވަގުތުތަކުގައި ގޮލްފް ކުޅެން ފޯރި ހުންނަ ކުޅުންތެރިއެކެވެ.
ބޭލް ހޯދަން އެކި ކްލަބްތަކުން މީގެ ކުރިން ރެއާލަށް ވަނީ ބިޑްތަކެއް ކޮށްފަ އެވެ. ގިނަ ކްލަބްތަކަށް ނޫނެކޭ ބުނީ ބޭލް އެވެ. ބޭލް، ރެއާލް ދޫކޮށް ޗައިނާގެ ކްލަބަކާ ގުޅުމާ ގާތަށް 2019 ވަަނަ އަހަރު ޖުލައި މަހު ޖެހިލި އެވެ. އެ ފަހަރު މުސާރައިގެ ގޮތުގައި ހަފުތާ އަކު އެއް މިލިއަން ޕައުންޑް (1.1 މިލިއަން ޑޮލަރު) ލިބޭ ގޮތަށް ޗައިނާގެ ޖިއާންސޫ ސަނިން އަށް ބޭލް ސޮއިކުރަން ހުރިހާ ކަމެއް ނިމިފައި އޮއްވައި ފަހު ވަގުތު ރެއާލިުން އެ ޑީލް ހުއްޓުވީ އޭރު އެ ކްލަބްގެ ގިނަ ކުޅުންތެރިންތަކަކަށް ސީރިއަސް އަނިޔާތަކެއްވެފައި ވުމުންނެވެ.
