ގަޑާންސްކް، ޕޮލެންޑް (މެއި 26) - މެންޗެސްޓާ ޔުނައިޓެޑަކީ ތަށި ހޯދަން ޖެހޭ ޓީމެއް ކަމަށާއި ޔޫރޮޕާ ލީގުގެ ފައިނަލުގައި މިރޭ ވިޔަރެއާލާ ދެކޮޅަށް ނުކުންނައިރު، މިއީ އޭނާގެ ކޯޗިން ކެރިއަރުގައި ޔުނައިޓެޑް ގޮވައިގެން އެއް ހަރުފަތް މައްޗަށް ޖެހިލަން ލިބޭ ފުރުސަތެއް ކަމަށް އެ ޓީމުގެ ކޯޗު އޮލެ ގުނަ ސޯލްޝެއާ ބުނެފި އެވެ.
ޔުނައިޓެޑާ 2018 ވަނަ އަހަރު ޑިސެމްބަރު މަހު ހަވާލުވި ފަހުން ސޯލްޝެއާގެ ކޯޗުކަމުގައި ޔުނައިޓެޑް ވަނީ ހަތަރު ސެމީ ފައިނަލުގައި ކުޅެ ބަލިވެފަ އެވެ. މިރޭ އެ ޓީމު ނުކުންނާނީ ހަތަރު ވަރަކަށް އަހަރު ތެރޭ ފުރަތަމަ ފައިނަލަށެވެ. ޔުނައިޓެޑުން އެންމެ ފަހުން ކާމިޔާބުކުރީ 2017 ވަނަ އަހަރުގެ ޔޫރޮޕާ ލީގެވެ. އޭރު ކޯޗަކީ ހޯސޭ މޮރީނިއޯ އެވެ.
އޭގެ ފަހުން މި ނިމުނު ތިން ސީޒަން ވެސް ޔުނައިޓެޑުން ނިންމާލީ ހުސްއަތާ އެވެ. ޔުނައިޓެޑުން އެންމެ ފަހުން ތަށްޓެއް ނުހޯދައި ހަތަރު ސީޒަން ނިންމާލަން ޖެހުނީ 1980ގެ އަހަރުތަކުގަ އެވެ. އޭރު އެ ޓީމުގެ ކޯޗަކަށް ހުރީ ޔުނައިޓެޑްގެ ތާރީހުގައި އެންމެ ކާމިޔާބު ކޯޗު އެލެކްސް ފާގަސަން އެވެ. މިރޭ ޔޫރޮޕާ ލީގު ފައިނަލަށް ދަތުރުކުރި ޔުނައިޓެޑް ޓީމާ އެކު ހާއްސަ މެމްބަރެއްގެ ގޮތުގައި ފާގަސަން ވެސް ބައިވެރިވި އެވެ.
"މިއީ އަހަރެމެން މިދިޔަ އަހަރުތަކުގައި ބިނާކުރަމުން އައި ޓީމެއް. މި ފަހަރު (ޔޫރޮޕާ ލީގުގެ ފައިނަލް) ގައި މި އޮތީ އެއް ފިޔަވަޅު މައްޗަށް ޖެހިލައި އަހަރެމެން ޓީމެއްގެ ގޮތުގައި ކުރިއަރަން ފުރުސަތު ލިބިފައި،" ފައިނަލުގެ ކުރިން ބޭއްވި ނޫސްވެރިންގެ ބައްދަލުވުމުގައި ސޯލްޝެއާ ބުންޏެވެ.
"ޔުނައިޓެޑަކީ ތަށި ހޯދަންޖެހޭ ޓީމެއް. ދުނިޔޭގެ އެންމެ ބޮޑު ޓީމެއްގެ ގޮތުގައި ޔުނައިޓެޑް ބާއްވަން ކުރަން ޖެހޭނެ ކަމަކީ ވެސް ތަށި ހޯދުން. އެހެންވީމަ މި ކްލަބަށް ކޯޗަކު އަޔަސް ކުޅުންތެރިއަކު ކުޅުނަސް އެ ޕްރެޝަރު އޮންނާނެ،"
ޔުނައިޓެޑުން މިިދިޔަ އަހަރުގެ ޔޫރޮޕާ ލީގުގެ ސެމީ ފައިނަލްގައި ބަލިވީ ސްޕެއިނުގެ ސެވިއްޔާ އަތުންނެވެ. ސޯލްޝެއާ ބުނީ އެ މެޗުން ކަންތައްތަކެއް ދަސްވެފައިވާ ކަމަށާއި އެކަމަކު ސެވިއްޔާއާ އަޅާކިޔާއިރު، ވިޔަރެއާލް ތަފާތު ކަމަށެވެ.
"ގަބޫލުކުރަން ޖެހެނީ މީގެ ފައިނަލެއްގައި ކޮންމެ ޓީމަކަށް ވެސް އޮންނާނީ ހަމަހަމަ ފުރުސަތެއް. އަހަރެން ދެކެނީ 50-50 ކޮށް އޮތް މެޗެއް ކަމަށް. ފުރަތަމަ ގޯލު ޖެހުމަކީ މޮޅުވާނެކަން ޔަގީންވުމެއް ނޫން،" ސޯލްޝެއާ ބުންޏެވެ.
ޔުނައިޓެޑާ އެކު ފައިނަލް މެޗަށް ޕޮލެންޑަށް ދަތުރުކުރި ސްކޮޑުގައި އެ ޓީމުގެ ކެޕްޓަން ހެރީ މެގުއާ ހިމެނެ އެވެ. އަނިޔާއަކަށް ފަރުވާ ހޯދަމުން އަންނަ މެގުއާ މި މެޗުގައި ކުޅުމުގެ ފުރުސަތު ވަރަށް ކުޑަ އެވެ. އިއްޔެ ޔުނައިޓެޑުން ބޭއްވި އެންމެ ފަހުގެ ޓްރެއިނިން ސެޝަންގައި މެގުއާ ފުރިހަމަ އަށް ބައިވެރިނުވެ އެވެ. އަނިޔާގެ ސަބަބުން ޔުނައިޓެޑްގެ ފްރާންސް ފޯވާޑް އެންތަނީ މާޝިއަލް ޓީމާ އެކު ދަތުރުނުކުރެ އެވެ.
މީގެ 22 އަހަރު ކުރިން ޗެމްޕިއަންސް ލީގުގެ ފައިނަލުގައި ޔުނައިޓެޑުން ފަހު ވަގުތު ދެ ގޯލު ޖަހައިގެން މުބާރާތް ކާމިޔާބުކުރިއިރު, މޮޅުވި ގޯލު ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ސޯލްޝެއާ އެވެ.
ސޯލްޝެއާ ބުނީ މިރޭގެ ފައިނަލުގައި ވެސް ބަދަލު ކުޅުންތެރިއެއްގެ ގޮތުގައި އަރަން ތިބޭ ކުޅުންތެރިންނަށް އެ ފަދަ ވާހަކަތައް ހިއްސާކުރާނެ ކަމަށާއި ކޮންމެ ކުޅުންތެރިއަކަށް ކޮންމެ ވަގުތެއްގައި ވެސް ޓީމަށް އެހީތެރިވެވިދާނެ ކަމަށެވެ.
"އަހަރެން ހަވާލުވި ފަހުން ވެސް ގިނަ މެޗުތަކެއްގައި ބަދަލު ކުޅުންތެރިން އަރައި ތަފާތު ދައްކާފައި އެބަހުރި. އެހެންވީމަ މި ޓީމުގައި ތިބި ކުޅުންތެރިންނަށް ވެސް ކޮންމެ ވަގުތެއްގައި ޓީމަށް އެހީވެވިދާނެ ކަން އެބަ އެނގޭ،" ސޯލްޝެއާ ބުންޏެވެ.
މިއީ ޔުނައިޓެޑުން ޔޫރަޕްގައި ކުޅޭނެ އަށް ވަނަ ފައިނަލެވެ. މީގެ ކުރިން ވިޔަރެއާލާ ދެކޮޅަށް ޔޫރޮޕްގައި ޔުނައިޓެޑުން ކުޅުނު ހަތަރު މެޗު ވެސް ނިމުނީ ދެ ޓީމަށް ވެސް ލަނޑެއް ނުޖެހި އެއްވަރުވެގެންނެވެ. އެއީ ޗެމްޕިއަންސް ލީގުގައި ކުޅުނު މެޗުތަކެވެ.
ޔުނައިޓެޑާއި ވިޔަރެއާލް ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
