ކޮވިޑުން ދިފާއުވުމުގެ ވެކްސިންގެ އެންމެ ޑޯޒެއް ވެސް އަދި ނުޖަހާ ގައުމުތައް ހުރިއިރު، އާބާދީގެ ބޮޑު ބަޔަކަށް ފުރަތަމަ ޑޯޒު ނިންމައި ރާއްޖެ ހިމެނެނީ ވެކްސިން ޖެހުމުގެ ކުރީ ސަފުގައި ކަމަށް ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.
ކޮވިޑުގެ ގޯސްވެފައިވާ ހާލަތާ ގުޅޭ ގޮތުން ރައީސް އޮފީހުގައި މިރޭ ބޭއްވި ނޫސްވެރިންގެ ބައްދަލުވުމުގައި ގިނަ ސުވާލުތައް އަމާޒުވީ ރާއްޖޭގައި މިދިޔަ ފެބުރުއަރީ މަހުގެ ތެރޭގައި ފެށި ވެކްސިނޭޝަން ޕްރޮގްރާމް މެދުކެނޑިފައި އޮތް ސަބަބާ ގުޅޭ ގޮތުންނެވެ. އާއްމުކޮށް ޖެހި ކޮވިޝީލްޑް ހުސްވެ ރާއްޖެ އިން ގަތް ވެކްސިން ވެސް މިހާތަނަށް ނުލިބި ލަސްވާތީ މިހާރު ދެމުން އަންނަނީ ޗައިނާގެ ސިނޯފާމް އެކަންޏެވެ.
އާބާދީގެ ބޮޑު ބަޔަކަށް ދެ ޑޯޒު ފުރިހަމަ ކުރެވޭ ވަރަށް ރާއްޖެ އަށް ވެކްސިން ޔަގީންވާނެ ކަމުގެ ވާހަކަތަކާ އެކު ފެށި ވެކްސިނޭޝަން ޕްރޮގްރާމް މެދުކެނޑުނު ސަބަބާ ގުޅޭ ގޮތުން ސުވާލުކުރުމުން ރައީސް ވިދާޅުވީ އެހެން ގައުމުތަކާ އަޅާބަލާއިރު ރާއްޖެ އަދިވެސް އޮތީ ކުރީގައި ކަމަށެވެ. އާބާދީގެ ބޮޑު ބައަކަށް ފުރަތަމަ ޑޯޒު ދީފައިވާ ކަން ފާހަގަކުރެއްވި އެވެ.
ރައީސް ވިދާޅުވި ގޮތުގައި ރާއްޖެއަށް ވެކްސިން ހޯދަން އުޅުނުއިރު ލަފާ ލިބުނީ އެންމެ އަވަހަށް ލިބުނު ވެކްސިނުން އެއް ޑޯޒު ނަމަވެސް ވީހާވެސް ގިނަ ރައްޔިތުންނަށް ދެވޭތޯ ބެލުމެވެ. ފުރަތަމަ ޑޯޒު 69 ޕަސެންޓަށް ޖެހިއިރު ދެވަނަ ޑޯޒު 35 ޕަސެންޓުގެ މީހުންނަށް ޖަހާފައިވާ ކަމަށް ވިދާޅުވި އެވެ.
ނޫސްވެރިންގެ ބައްދަލުވުމުގައި ރައީސް ވާހަކަ ދައްކަވަނީ: ކޮވިޑް ވެކްސިން ރާއްޖެއަށް ހޯދުމަށް މަސައްކަތް ކުރަމުން އަންނަ ކަމަށް ވިދާޅުވި. -- ފޮޓޯ/ ރައީސް އޮފީސް
"ތި ހުރިހާ ބޭފުޅުން ވެސް ގަބޫލުކުރައްވަންވީ އެއް ކަމަކީ ދުނިޔޭގައި އަދިވެސް ގިނައީ އެންމެ ޑޯޒެއް ވެސް ނުލިބޭ ގައުމުތައް. އިރާދަކުރެއްވިއްޔާ އަޅުގަނޑުމެންގެ އާބާދީގެ 69 ޕަސެންޓަށް ފުރަތަމަ ޑޯޒު ޖަހާ ނިމިގެން މި ތިބީ،" ރައީސް ވިދާޅުވި އެވެ.
"ވަރަށް ބޮޑު އަދަދެއް އެއީ، އޭގެ ސަބަބުން ވެސް ރާއްޖެ އަށް ވެކްސިން ފޯރުކޮށްދިނުމުގައި މަޑުޖެހުމެއް އެބައާދޭ."
ރައީސް ވިދާޅުވީ ވެކްސިން ހޯދުމަށް އެކުވެރި ގިނަ ގައުމުތަކާ އެކުގައި މަސައްކަތް ކޮށްފައިވާ ކަމަށެވެ. އޭގެ އިތުރުން އެމެރިކާ އާއި ކެނެޑާ އާއި މަޝްވަރާކޮށް އޮސްޓްރޭލިއާ ވެސް ވާހަކަ ދައްކަމުން އަންނަ ކަމަށާއި މިހާތަނަށް ލިބުނު ޖަވާބަކީ އެއް ގައުމުން އަނެއް ގައުމަށް ވެކްސިން ދޭން މިހާތަނަށް ނިންމާފައި ނުވުން ކަމަށް ރައީސް ވިދާޅުވި އެވެ.
އެ ގައުމުތަކުން ވެކްސިން ފޯރުކޮށްދޭން ނިންމާފައި އޮތީ ޑަބްލިއުއެޗްއޯ އަށެވެ.
ސަރުކާރުން މިހާރު މަސައްކަތް ކުރަމުން އަންނަނީ ރަޝިއާގެ ވެކްސިންގެ 200،000 ޑޯޒް ގަތުމަށެވެ. އެ ގައުމުން ސްޕަޓްނިކް ވީ ހޯދަން ވަގުތުން މަސައްކަތް ޖެހިފައި ވަނީ އެ ވެކްސިން ވެސް ނުލިބިދާނެ ކަަމުގެ ބިރަށް ކަމަށް ރައީސް ވިދާޅުވި އެވެ.
ރާއްޖޭގެ ވެކްސިނޭޝަން ޕްރޮގްރާމް މިދިޔަ ފެބުރުއަރީގައި ފެށީ އިންޑިއާއިން ރާއްޖެ އަށް ހަދިޔާކުރީ 200،000 ޑޯޒުންނެވެ. ޗައިނާ އިން ވެސް 200،000 ޑޯޒާއި ހެޔޮއެދޭ އެހެން ފަރާތްތަކުން ވެސް ވެކްސިން ލިބުނެވެ. އޭގެ އިތުރަށް ރާއްޖެ އިން ވަނީ ޖުމްލަ 1،000،000 ޑޯޒަށް ފައިސާ ދައްކައިފަ އެވެ. އެއީ ސިންގަޕޫރުގެ އެސްޓްރާ ޒެނިކާ އަށް 700،000 ޑޯޒާއި އިންޑިއާގެ ސިރަމް އިންސްޓިޓިއުޓަށް 300،000 ޑޯޒަށެވެ.
މީގެ ތެރެއިން ރާއްޖެއަށް ލިބުނީ އިންޑިއާއަށް ފައިސާ ދެއްކި ވެކްސިންގެ ތެރެއިން 100،000 ޑޯޒެވެ. ބާކީ 200،000 އިންޑިއާ އިން ވެސް ލިބޭނެ ދުވަހެއް ނޭނގެ އެވެ.
ހެލްތު މިނިސްޓަރު ނަސީމް ވިދާޅުވީ އެސްޓްރާޒެނިކާގެ ވެކްސިން އަންނަ މަހުގެ ތެރޭގައި ލިބޭނެ ކަަމަށެވެ. އެކަމަކު ސީދާ ތާރީހެއް ވިދާޅެއް ނުވެ އެވެ.
ސަރުކާރުން އުއްމީދުކުރި ގޮތަށް ވެކްސިން ލިބުމުގައި ތާށިވީ، އިންޑިއާއަށް ކޮވިޑްގެ ދެވަނަ ރާޅެއް އަރައި ހާލަތު ވަރަށް ބޮޑަށް ގޯސްވުމާއެކު އެހެން ގައުމުތަކަށް އިންޑިއާއިން ވެކްސިން ފޯރުކޮށްދިނުމަށް ނުކުޅެދުމުންނެވެ.
