އިޒްރޭލާއި ހަމާސް ގްރޫޕުން ހަމަލާ ބަދަލު ކުރުން ހުއްޓާލަން އެކުލަވާލި އެއްބަސްވުމަށް އިތުރު ބާރެއް ދިނުމުގެ ގޮތުން ގާޒާގެ ސަރަހައްދުތައް އަލުން ބިނާ ކުރަން އެމެރިކާއިން އެހީ ވާން ނިންމައިފި އެވެ.
އެކަން އިއުލާން ކުރެއްވީ އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫއާ ބައްދަލުކުރެއްވުމަށް ފަހު އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އެވެ. އޭނާ ވިދާޅުވި އަލުން ހަމަނުޖެހުން ފެށުމަށް އޮތް ފުރުސަތު ކުޑަ ކުރުމުގެ ގޮތުން އިންސާނީ އެހީ ދިނުން މުހިއްމު ކަމަށެވެ.
ނަމަވެސް އެމެރިކާގެ އެހީގެ ސަބަބުން ގާޒާ ކޮންޓްރޯލް ކުރާ ހަމާސް ގްރޫޕަށް އެއްވެސް ފައިދާއެއް ނުލިބޭނެކަން ކަށަވަރު ކުރާނެ ކަމަށް ބްލިންކެން ވިދާޅުވި އެވެ.
އޭގެ އިތުރުން އަމިއްލަ ދިފާއުގައި ހަމަލާ ދިނުމުގެ ހައްގު އިޒްރޭލަށް އޮންނާނެ ކަމަށް އެމެރިކާއިން ބުނާ ވާހަކަ އަނެއްކާވެސް އޭނާ ތަކުރާރު ކުރެއްވި އެވެ.
މި އަހަރުގެ ރޯދަ މަހުގެ ފަހު ދިހައެއްގެ ތެރޭގައި ހަމާސް އާއި އިޒްރޭލާ ދެމެދު ހަމަލާ ބަދަލު ކުރަން ފެށުމުން 250 އަށް ވުރެ ގިނަ މީހުން މަރުވި އެވެ. އެއީ ފަލަސްތީނުން 140 މީހުންނާއި އިޒްރޭލުން 12 މީހުންނެވެ. އެގާރަ ދުވަހަށް ފަހު މިދިޔަ ހުކުރު ދުވަހު ހަމަލާތައް ހުއްޓާލީ މިސްރު މެދުވެރިވެގެން އެކުލަވާލި އެއްބަސްވުމެއްގެ ދަށުންނެވެ.
ގާޒާ އާއި އިޒްރޭލާ ދެމެދު ހަމަލާ ބަދަލު ކުރަން ފެށީ ރޯދަ މަހު އަގްސާ މިސްކިތުގައި ނަމާދު ކުރަން ހުރި ހުރަސްތަކާ ގުޅިގެން ހަމަނުޖެހުން ބޮޑުވެފައި ވަނިކޮށެވެ. އޭގެ އިތުރުން ހުޅަނގު އައްސޭރީގެ ޝެއިހް ޖައްރާ ހިސާބުގައި އުޅޭ ފަލަސްތީނު މީހުން ގެތަކުން ނެރެން އުޅޭ މައްސަލަ ވެސް އޮތީ ބޮޑުވެފަ އެވެ.
