މާލެ ސަރަހައްދުގައި މާދަމާ އިން ފެށިގެން ހަރުކަށި ފިޔަވަޅުތައް ތަންފީޒުކުރަން ފަށާއިރު ދުވާލުގެ ކާފިއު ނޫން ވަގުތުތަކުގައި ހުރިހާ ޓެކްސީތަކަށް ދަތުރު ކުރުމުގެ ހުއްދަ ދޭން ފުލުހުން ނިންމައިފި އެވެ.
މާދަމާއިން ފެށިގެން ކޮންމެ ދުވަހެއްގެ ހަވީރު 4:00 އިން ހެނދުނު 8:00 އަށް ކާފިއު ހިންގަން ވަނީ ނިންމައިފަ އެވެ. ކާފިއު ނޫން ގަޑިތަކުގައި ވެސް ގެއިން ބޭރަށް ނުކުމެވޭނީ ކޮންމެ ގެއަކަށް ދޫކޮށްފައިވާ ދެ ފާހުގެ ތެރެއިން ފާހެއް ހިފައިގެންނެވެ.
ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވީ ހެނދުނު 8:00 އިން ހަވީރު 4:00 އާ ހަމައަށް ހުރިހާ ޓެކްސީތަކަކަށް ވެސް ނުކުމެ ދަތުރުކުރުމުގެ ހުއްދަ ދޭން ނިންމާފައިވާ ކަމަށެވެ. ނަމަވެސް ކާފިއު ވަގުތު ކުރީގެ ލޮކްޑައުންއެކޭ އެއްގޮތަށް ޓެކްސީ ކުރެވޭނީ ކޮންމެ ސެންޓަރަކުން ވެސް 10 ކާރަށް ކަމަށް އޭނާ ވިދާޅުވި އެވެ.
މާލޭގައި ޓެކްސީ ކާރު އަށް ސެންޓަރު ހިންގާއިރު ޕިކަޕުގެ ހިދުމަތްދޭ ތިން ވަރަކަށް ސެންޓަރު ހުރެ އެވެ. އަދި މަދުން ނަމަވެސް ސައިކަލް ޓެކްސީ ވެސް ކުރެ އެވެ.
ހުއްދަ ނެތި ބޭރުގައި އުޅުން މާދަމާއިން ފެށިގެން މަނާ ކުރާއިރު ގްރޭޓާ މާލޭ ޓްރާންސްޕޯޓް ލިންކުން މާލެ ސަރަހައްދުގައި ދެމުން އަންނަ ބަސް ދަތުރުތައް ވަގުތީ ގޮތުން ހުއްޓާލަން ވަނީ ނިންމައިފަ އެވެ.
މާދަމާ އިން ފެށިގެން ހަރުކަށި ކުރާ ފިޔަވަޅުތައް
- ހަވީރު 4:00 އިން ހެނދުނު 8:00 އަށް ކާފިއު.
- ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ ފާސް އޮންނަ މީހުން.
- ކޮންމެ ގޭބީސީއަކަށް ދޫކުރެވޭނީ ދެ ދަންފަޅިއަކަށް ބަހާލައިގެން ދެ ފާސް.
- ކާފިއު ގަޑިތަކުގައި ޑެލިވަރީ ފިޔަވައި އެހެން ހިދުމަތެއް ދިނުން މަނާ.
- ޑެލިވަރީ ހިދުމަތް ދެވޭނީ ހެނދުނު 6:00 އިން ދަންވަރު 12:00 އަށް
- ކޮންސްޓްރަކްޝަން ސައިޓުތަކުގައި މަސައްކަތް ކުރުން ދެ ހަފްތާއަށް ހުއްޓާލުން.
- ފާސް ނެތް މީހަކަށް ކަސްރަތު ކުރަން ބޭރަށް ނުކުތުން މަނާ.
- ހުއްދަ ދޭ އަމިއްލަ އޮފީސްތައް ފިޔަވައި އެހެން ތަންތަން ބަންދުކުރުން.
