މެޑްރިޑް (މެއި 25) - ޔޫރަޕްގެ އެހެން ލީގުތަކާ އަޅާކިޔާއިރު އެންމެ ވަރުގަދަކޮށް އޮތީ އިނގިރޭސި ޕްރިމިއާ ލީގު ކަމަށް ދާދި ފަހުން އެތުލެޓިކޯ މެޑްރިޑަށް ސްޕެނިޝް ލީގުގެ ޗެމްޕިއަންކަން ހޯދައިދިން ކޯޗު ޑިއޭގޯ ސިމިއޯނީ ބުނެފި އެވެ.
ސިމިއޯނީ އެތުލެޓިކޯގެ ކޯޗުކަމާ ހަވާލުވީ 2011 ވަނަ އަހަރު އެވެ. އެ ފަހުން އެ ޓީމަށް ވަނީ ނުވަ ތަށި ހޯދައިދީފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު އަދި ޔޫރޮޕާ ލީގު ދެ ފަހަރު ހިމެނެ އެވެ. އެތުލެޓިކޯ އިން މި ފަހަރު ލީގު ޗެމްޕިއަންކަން ހޯދީ ހަތް އަހަރު ފަހުންނެވެ.
ސްޕެނިޝް ލީގުގައި މި ފަހަރު އެތުލެޓިކޯގެ ރެކޯޑް ރަނގަޅު ނަމަވެސް ޗެމްޕިއަންސް ލީގުގެ ނޮކައުޓް ފުރަަތަމަ ބުރުގައި ދެ މެޗުގައި ވެސް ޗެލްސީ އަތުން ބަލިވެ ކެޓީ އެވެ.
މި ފަހަރުގެ ޗެމްޕިއަންސް ލީގު ފައިނަލުގައި އިންގްލެންޑްގެ ދެ ޓީމު ކަމަށްވާ ޗެލްސީ އާއި މެންޗެސްޓާ ސިޓީ ވާދަކުރާތީ އެކަމަށް އިޝާރާތްކޮށް ސިމިއޯނީ ބުނީ ޔޫރަޕްގައި އިނގިރޭސި ލީގު ވަރުގެ ވާދަވެރި ލީގެއް ނެތް ކަމަށެވެ.
"އަހަރެން ގަބޫލުކުރަނީ އެ ގޮތަށް. އެންމެ ވަރުގަދަކޮށް އޮތީ އިނގިރޭސި ޕްރިމިއާ ލީގު. ފުރަތަމަ ކަމަަށް މާލީ ގޮތުން ބަލާއިރު ވެސް އިނގިރޭސި ޕްރިމިއާ ލީގު ވަރުގަދަވީމަ ކޮންމެ ޓީމަކަށް ވެސް ރަނގަޅަށް އިންވެސްޓް ކުރެވޭނެ. ރަނގަޅަށް އިންވެސްޓްކޮށް ކުޅުންތެރިން ގަންނަންޏާ ވަރަށް އެއްވަރުކޮށް ވަރުގަދަވެފައި އެ ލީގުގެ ޓީމުތައް އޮންނާނީ،" އީއެސްޕީއެން އަށް ސިމިއޯނީ ބުންޏެވެ.
"އެހެން ލީގުތަކުގައި އޮންނަނީ އެއް ޓީމެއް ނޫނީ ދެ ޓީމެއް އެހެން. ޕެރިސް (ޕީއެސްޖީ) އާއި ބަޔާން ދެން ބާސެލޯނާ އާއި ރެއާލް މެޑްރިޑަށް މުޅި ލީގުގެ ޗެލެންޖެއް ނޯންނާނެ. އެކަމަކު އިނގިރޭސި ޕްރިމިއާ ލީގުގައި މެންޗެސްޓާ ސިޓީ، ލިވަޕޫލް ދެން ޗެލްސީ، ޔުނައިޓެޑް ކަހަލަ ޓީމުތަކަށް އެއްވެސް މެޗެއް ފަސޭހަކަމަކަށް ނުފެނޭ،"
އެހެން ލީގުތަކާ އަޅާކިޔާއިރު ޕްރިމިއާ ލީގަށް އޮތް އެންމެ ބޮޑު އެޑްވާންޓޭޖަކީ ޓީވީ ރައިޓްސް ޑީލްގެ ތެރެއިން ލިބޭ ފައިސާ އާއި މަގާމުތަކުގައި ނިންމައިގެން ލިބޭ ފައިސާގެ އިނާމް ވެސް އެހެން ލީގުތަކަށް ވުރެ އެތައް ގުނައެއް ބޮޑުވުމެވެ. ކޮވިޑް-19ގެ ސަބަބުން ގިނަ ގައުމުތަކުގެ ލީގުތަކުގެ ޓީވީ ރައިޓްސް ޑީލްގެ އަގުތަކަށް ބަދަލުގެނައި ނަމަވެސް ޕްރިމިއާ ލީގުން ވަނީ އެކަށީގެންވާ އުސޫލެއްގެ ތެރެއިން އަގުތައް ކޮންޓްރޯލް ކޮށްފަ އެވެ. އެއީ ސަޕޯޓަރުން ނުވައްދައި މެޗުތައް ކުޅެން ޖެހުމުން މާލީ ގޮތުން ކްލަބްތަކަށް ލިބޭ ގެއްލުން ކުޑަ ކުރުމުގެ ގޮތުންނެވެ.
ޔޫރަޕްގެ ގިނަ ގައުމުތަކުގެ ލީގު ޗެމްޕިއަނުންނަށް ވުރެ ގިނައިން ޕްރިމިއާ ލީގުގެ ގަދަ 10 ތެރޭގައި ހިމެނޭ ޓީމުތަކަށް އާމްދަނީ ލިބެ އެވެ. އަދި ބައެއް ލީގުތަކުގެ ގަދަ 10 ގައި ނިންމާ ޓީމުތަކަށް ވުރެ ޕްރިމިއާ ލީގުން ރެލިގޭޓްވާ ޓީމުތަކުގެ އިނާމް ފައިސާ އާއި ޓީވީ ރައިޓްސް އިން ޖުމްލަ އެއްކޮށް ލިބޭ އާމްދަނީ ގިނަ އެވެ. ޕްރިމިއާ ލީގުގެ ގަދަ 10 ގައި ނިންމާ ޓީމުތަކުގެ އާމްދަނީ އެވްރެޖްކޮށް އުޅޭނީ 25 މިލިއަން ޑޮލަރާއި 50 މިލިއަން ޑޮލަރާ ދެމެދުގަ އެވެ. ރެލިގޭޓްވާ ޓީމުތަކަށް ވެސް އާންމު ގޮތެއްގައި ފަސް މިލިއަން ޑޮލަރާއި 10 މިލިއަން ޑޮލަރާ ދެމެދުގެ އާމްދަނީ އެއް ޖުމްލަ އެއްކޮށް ލިބެ އެވެ.
