ކޮވިޑުގެ ސަބަބުން މާލޭގެ ހާލަތު ގޯސްވެފައިވާތީ އަންނަ މަހުގެ އަށް ވަނަ ދުވަހާ ހަމައަށް ސަރުކާރުގެ އޮފީސްތައް ބަންދުކޮށް ގޭގައި މަސައްކަތްކުރާ ގޮތަށް ހަމަޖައްސައިފި އެވެ.
ކޮންޓްރޯލް ނުވެ ބަލި ފެތުރެމުންދާތީ މިހާރު ވެސް އޮފީސްތައް ހުޅުވައިގެން މަސައްކަތެެއް ނުކުރެ އެވެ.
ރައީސް އިބްރާހިމް މުހައްމަދު ސޯލިހް މިއަދު ނެރުއްވި ދެންނެވުމެއްގައި ވިދާޅުވީ ހާލަތު ރަނގަޅު ނުވާތީ އަންނަ މަހުގެ އަށަކާ ހަމައަށް ވެސް، މުވައްޒަފުން ގޭގައި ތިބެގެން ކުރެވެން ހުރި މަސައްކަތްތައް ކުރަން ޖެހޭނީ ގޭގައި ކަމަށެވެ. އަދި ސަރުކާރުގެ އިދާރާތަކުން އޮންލައިންކޮށް ދެއްވެން ހުރި ހުރިހައިި ހިދުމަތްތަކެއް އޮންލައިންކޮށް ދެއްވަމުން ގެންދެވުމަށް ރައީސް ވަނީ އަންގަވައިފަ އެވެ.
އެކަމަކު އިދާރާއަކުން ދޭ އަސާސީ ހިދުމަތެއް ދޭން ކޮންމެހެން އޮފީސް ހުޅުވަން ޖެހިއްޖެ ނަމަ އެ އިދާރާއެއްގެ އިސްވެރިޔާ އަންގާ ގޮތެއްގެ މަތިން އަމަލުކުރެވިދާނެ ކަމަށް ދެންނެވުމުގައިވެ އެވެ.
މިގޮތަށް މަސައްކަތް ކުރާ އިރު ބަލިން ރައްކާތެރިވުމަށް އެޗްޕީއޭ އިން އާއްމުކޮށްފައި އުސޫލްތަކަށް ތަބާވާން ރައީސް އިލްތިމާސްރެއްވި އެވެ.
މާދަމާއިން ފެށިގެން ކޮންމެ ދުވަހެއްގެ ހަވީރު 4:00 އިން ހެނދުނު 8:00 އަށް ކާފިއު ހިންގަން ވަނީ ނިންމައިފަ އެވެ. ކާފިއު ނޫން ގަޑިތަކުގައި ވެސް ގެއިން ބޭރަށް ނުކުމެވޭނީ ކޮންމެ ގެއަކަށް ދޫކޮށްފައިވާ ދެ ފާހުގެ ތެރެއިން ފާހެއް ހިފައިގެންނެވެ.
މާދަމާ އިން ފެށިގެން ހަރުކަށި ކުރާ ފިޔަވަޅުތައް
- ހަވީރު 4:00 އިން ހެނދުނު 8:00 އަށް ކާފިއު.
- ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ ފާސް އޮންނަ މީހުން.
- ކޮންމެ ގޭބީސީއަކަށް ދޫކުރެވޭނީ ދެ ދަންފަޅިއަކަށް ބަހާލައިގެން ދެ ފާސް.
- ކާފިއު ގަޑިތަކުގައި ޑެލިވަރީ ފިޔަވައި އެހެން ހިދުމަތެއް ދިނުން މަނާ.
- ޑެލިވަރީ ހިދުމަތް ދެވޭނީ ހެނދުނު 6:00 އިން ދަންވަރު 12:00 އަށް
- ކޮންސްޓްރަކްޝަން ސައިޓުތަކުގައި މަސައްކަތް ކުރުން ދެ ހަފްތާއަށް ހުއްޓާލުން.
- ފާސް ނެތް މީހަކަށް ކަސްރަތު ކުރަން ބޭރަށް ނުކުތުން މަނާ.
- ހުއްދަ ދޭ އަމިއްލަ އޮފީސްތައް ފިޔަވައި އެހެން ތަންތަން ބަންދުކުރުން.
ކާފިއު ގަޑިތަކުގައި އަމިއްލެ ކުންފުނިތަކުގައި މަސައްކަތް ކުރާ މުވައްޒަފުން ވެސް ބޭރަށް ދާން ހުއްދަ ލިބެނީ އިކޮނޮމިކް މިނިސްޓްރީން ދޫކުރާ ފާހެއް ލިބުމުންނެވެ.
ހަރުކަށި ފިޔަވަޅުތަކެއް އަޅާފައިވާއިރު މާލެ ސަރަހައްދުގައި ކޮވިޑް ފެތުރުން އިންތިހާއަށް އިތުރުވެ ބަލީގައި ގިނަ ބަޔަކު ދަނީ މަރުވަމުންނެވެ.
