ކާފިއު ގަޑީގައި ވަޒީފާއަށް ދިއުމަށް ފުލުހުންގެ ޕޯޓަލް މެދުވެރިކޮށް މިހާރު ދޫކުރަމުން އަންނަ "ޑިޔުޓީ ޕާމިޓް" މާދަމާއިން ފެށިގެން ދޫކުރުން ހުއްޓާލާނެ ކަމަށް ފުލުހުން މިއަދު ބުނެފި އެވެ.

މާދަމާއިން ފެށިގެން ކޮންމެ ދުވަހެއްގެ ހަވީރު 4:00 އިން ހެނދުނު 8:00 އަށް ކާފިއު ހިންގަން ވަނީ ނިންމައިފަ އެވެ. ކާފިއު ނޫން ގަޑިތަކުގައި ވެސް ގެއިން ބޭރަށް ނުކުމެވޭނީ ކޮންމެ ގެއަކަށް ދޫކޮށްފައިވާ ދެ ފާހުގެ ތެރެއިން ފާހެއް ހިފައިގެންނެވެ.

ކޮވިޑްގެ ހާލަތު ގޯސްވުމާއެކު ސަރުކާރުގެ އޮފީސްތައް ބަންދުކޮށް ގޭގައި ތިބެގެން މަސައްކަތް ކުރާ ގޮތަށް ވަނީ ހަމަޖައްސައިފަ އެވެ. އަދި އަމިއްލަ އޮފީސްތައް ވެސް ގޭގައި ތިބެގެން ހިންގުމަށް ސަރުކާރުން ވަނީ އަންގައިފަ އެވެ.

ފުލުހުންގެ ޕާޓިޓް ސެންޓަރާ ހަވާލުވެ ހުންނެވި އިންފެކްސްޕެކްޓާ އޮފް ޕޮލިސް ޝިފާން ރަޝީދު، "އަދަދު" އަށް ވިދާޅުވީ އަމިއްލަ އޮފީސްތަކުގައި މަސައްކަތް ކުރާ މުވައްޒަފުން މާދަމާއިން ފެށިގެން ކޮންމެހެން ޑިޔުޓީތަކަށް ދާން ޖެހޭނަމަ ޖެހޭނީ އިކޮނޮމިކް މިނިސްޓްރީން ދޫކުރާ ފާހެއް ހޯދުމަށް ކަމަށެވެ.

"މިހާރު ޑިޔުޓީތަކަށް ދާން ޕޯޓަލްއިން މި ދޫކުރާ ޑިޔުޓީ ޕާމިޓް މާދަމާއިން ފެށިގެން ދުލެއް ނުކުރާނެ. ޑިޔުޓީތަކަށް ދާ މުވައްޒަފުން ޖެހޭނީ މިނިސްޓްރީން ފާސް ހައްދަން،" ޝިފާން ވިދާޅުވި އެވެ.

ޒަރޫރީ ހިދުމަތް ދެމުން އަންނަ ސަރުކާރުގެ ކުންފުނިތަކުގެ މުވައްޒަފުންނަށް އެ ކުންފުންޏެއްގެ ޔުނީފޯމާއެކު އޮފީސް ކާޑް ދެއްކުމުން ޑިޔުޓީއަށް ދެވޭނެ ކަމަށް ވެސް ޝިފާން ވިދާޅުވި އެވެ.

ހޮސްޕިޓަލްތަކަށް ދިއުމަށާއި ޑިޔުޓީތަކަށް މީހުން ލައިދޭންށާއި ބަލައި ދިއުމަށް ވަކި ހުއްދައެއް ފުލުހުންގެ ޕޯޓަލް މެދުވެރިކޮށް މާދަމާއިން ފެށިގެން ދޫކުރާނެ ކަމަށް ޝިފާން ވިދާޅުވި އެވެ.

މާދަމާ އިން ފެށިގެން ހަރުކަށި ކުރާ ފިޔަވަޅުތައް

• ހަވީރު 4:00 އިން ހެނދުނު 8:00 އަށް ކާފިއު.
• ކާފިއު ނޫން ގަޑިތަކުގައި ވެސް ބޭރަށް ނުކުމެވޭނީ ފާސް އޮންނަ މީހުން.
• ކޮންމެ ގޭބީސީއަކަށް ދޫކުރެވޭނީ ދެ ދަންފަޅިއަކަށް ބަހާލައިގެން ދެ ފާސް.
• ކާފިއު ގަޑިތަކުގައި ޑެލިވަރީ ފިޔަވައި އެހެން ހިދުމަތެއް ދިނުން މަނާ.
• ޑެލިވަރީ ހިދުމަތް ދެވޭނީ ހެނދުނު 6:00 އިން ދަންވަރު 12:00 އަށް
• ކޮންސްޓްރަކްޝަން ސައިޓުތަކުގައި މަސައްކަތް ކުރުން ދެ ހަފްތާއަށް ހުއްޓާލުން.
• ފާސް ނެތް މީހަކަށް ކަސްރަތު ކުރަން ބޭރަށް ނުކުތުން މަނާ.
• ހުއްދަ ދޭ އަމިއްލަ އޮފީސްތައް ފިޔަވައި އެހެން ތަންތަން ބަންދުކުރުން.

އަދި ގޭގޭގައި ތިބި ބަލި މީހުންނަށް އެހީތެރިވުމަށް އެހެން ގޭގެއިން ދާ މީހުންނަށް ވެސް ވަކި ހުއްދައެއް ޕޯޓަލްއިން ދޫކުރާނެ ކަމަށް އޭނާ ވިދާޅުވި އެވެ.

ފިހާރަތަކާއި ކެއިންބުއިމުގެ ހިދުމަތްދޭ ތަންތަނުން ވެސް ޑެލިވަރީގެ ހިދުމަތް އެކަނި ދޭގޮތަށް ވަނީ ބަދަލުކޮށްފަ އެވެ. ޑެލިވަރީ ކުރުމަށާއި އެތަންތަނުގެ ވަޒީފާއަށް ދާ މީހުންނަށް ވަކި ފާސްތަކެއް ފުލުހުން ވަނީ ދޫކޮށްފަ އެވެ.

ހަރުކަށި ފިޔަވަޅުތަކެއް އަޅާފައިވާއިރު މާލެ ސަރަހައްދުގައި ކޮވިޑް ފެތުރުން އިންތިހާއަށް އިތުރުވެ ބަލީގައި ގިނަ ބަޔަކު ދަނީ މަރުވަމުންނެވެ.