މެޑްރިޑް (މެއި 25) - ކުރިއަށް އޮތް ޓްރާންސްފާ މާކެޓްގައި ރެއާލް މެޑްރިޑް ދޫކޮށްލަން ޖެހިއްޖެނަަމަ އެޑެން ހަޒާޑް ބޭނުންވަނީ އޭނާ ކުރިން ކުޅުނު ޗެލްސީއާ ގުޅެން ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ.
ޗެލްސީ ދޫކޮށް ހަޒާޑް ރެއާލަށް ބަދަލުވީ 2019 ވަނަ އަހަރު 100 މިލިއަން ޔޫރޯ އަށެވެ. ހަޒާޑް ރެއާލްގައި ދައްކާ ކުޅުމަށް ބަލައި އިތުރު 40 މިލިއަން ޔޫރޯ ދޭ ގޮތަށް އެ އެއްބަސްވުމުގައި ހިމަނާފައިވެ އެވެ. އެކަމަކު މިހާތަނަށް ހަޒާޑް ރެއާލަށް ކުޅެދިން 43 މެޗުން ޖެހުނީ ފަސް ގޯލެވެ. ދެ ސީޒަނު ރެއާލްގައި ހޭދަކުރިއިރު ހަޒާޑަށް އަނިޔާގެ ގިނަ މައްސަލަތަކެއް ވަނީ ކުރިމަތިވެފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން އުމުރުން 30 އަހަރުގެ ހަޒާޑް މި ފަހަރުގެ ޓްރާންސްފާ މާކެޓްގައި ރެއާލް ދޫކޮށްލުމުގެ ފުރުސަތު ބޮޑެވެ. އެއީ ރެއާލުން ޕީއެސްޖީގެ ތަރި ކީލިއަން އެމްބާޕޭ ހޯދަން ކުރާ މަސައްކަތަށް ފަންޑް ހޯދުމަށެވެ.
ހަޒާޑްގެ އިތުރުން ރެއާލުން ގެރެތު ބޭލް ވެސް ދޫކޮށްލާނެ އެވެ. ރެއާލުން ހަޒާޑް ދޫކޮށްލަން ނިންމައިފިނަމަ އޭނާ އެދޭނީ އެހެން ކްލަބްތަކާ މަޝްވަރާ ނުކޮށް ޗެލްސީ އަށް ބަދަލުވާށެވެ. އެކަމަކު ޗެލްސީން ހަޒާޑް އަލުން ގެންދިއުމާ މެދު ގޮތެއް ނިންމާނީ އެ ކްލަބްގެ ބޯޑުންނެވެ. މީގެ ކުރިން ޗެލްސީ އަށް ކުޅެފައި އެ ޓީމު ދޫކޮށްލި ބައެއް ކުޅުންތެރިން ވަނީ އަލުން އެ ޓީމާ ގުޅިފަ އެވެ.
ރެއާލަށް ބަދަލުވުމަށް ފަހު ބެލްޖިއަމްގެ ނޫހަކަށް ދިން އިންޓަވިއުއެއްގައި ހަޒާޑް ވަނީ ފުޓްބޯޅަ ކެރިއަރު ނިންމާލުމުގެ ކުރިން އަދި އެއް ފަހަރު ޗެލްސީ އަށް ކުޅެން ބޭނުންވާ ކަމަށް ބުނެފަ އެވެ. އަދި ކެރިއަރުގެ ގިނަ ކަންކަން ހާސިލްވީ ޗެލްސީގައި ހުރެ ކަމަށްވާތީ އަދި އެއް ފަަހަރު އެ ޓީމަށް ކޮންމެވެސް ހިދުމަތެއް ކޮށްދިނުމަކީ އަމާޒެއް ކަމަށް ހަޒާޑް ބުންޏެެވެ.
ފްރާންސްގެ ލިލް އިން ވިދާލި ހަޒާޑް ޗެލްސީއާ ގުޅުނީ 2012 ވަނަ އަހަރު 40 މިލިއަން ޔޫރޯ އަށެވެ. ހަޒާޑް ވަނީ ޗެލްސީ އަށް ކުޅެމުން އިނގިރޭސި ޕްރިމިއާ ލީގު ދެ ފަހަރާއި ޔޫރޮޕާ ލީގު ދެ ފަހަރު އެފްއޭ ކަޕާއި ލީގު ކަޕް ކާމިޔާބުކޮށްފަ އެވެ. ޕްރިމިއާ ލީގުގެ މޮޅު ކުޅުންތެރިޔާގެ މަގާމު އެއް ފަހަރު ހޯދިއިރު، ޗެލްސީގެ މޮޅު ކުޅުންތެރިއަކަށް ދެ ފަހަރު ހޮވުނެވެ.
