ރާއްޖޭގެ ރެޕް ކިންގުގެ ދަރަޖަ ދީފައިވާ، އިސްމާއީލް އިފްހާމް މުހައްމަދު (ޕެސްޓު)ގެ ވަކީލް، ބަންދު މަޖިލީހުގައި މިއަދު ފާހަގަކުރީ އޭނާގެ "ސަކްސެސް ސްޓޯރީ"ގެ ވާހަކަ އެވެ. އެކަމުން އޭނާ ހޯދި "ރެޕިއުޓޭޝަނަށް" ދައުވާކޮށް ބަންދުކޮށްގެން ގެންގުޅޭތީ، ލިބެމުންދާ ގެއްލުންތަކުގެ ވާހަކަ އެވެ. އެކަމަކު، އެ ވާހަކަތަކަށް ރައްދުދީ، ޕެސްޓް ބަންދުގައި ބަހައްޓަން ދައުލަތުން ކިޔައިދިނީ، ޕެސްޓްގެ "ޑްރަގް ސްޓޯރީ" އެވެ.
މިދިޔަ ފެބުރުއަރީ 13 ގައި ހައްޔަރުކޮށް، ފަސް ދައުވާއެއް އުފުލާފައިވާ ސިންބޮލިކް ރެކޯޑްސްގެ ރެޕް އާޓިސްޓު ޕެސްޓް ހުރީ، މީގެކުރިން ވެސް ޝަރީއަތް ނިމެންދެން ބަންދުކޮށްފަ އެވެ. މިއަދު އޮތީ އެ ބަންދު ރިވިއު ކުރުމުގެ އަޑު އެހުމެވެ.
އެ އަޑުއެހުމުގައި ވެސް ޕްރޮސިކިއުޓާ ޖެނަރަލްގެ އޮފީހުން އެދުނީ ޕެސްޓަށް ލުޔެއް ނުދިނުމަށެވެ. ޝަރީއަތް ނިމެންދެން ބަންދުކުރުމުގެ އަމުރު ދަމަހައްޓައިދިނުމަށެވެ. އެގޮތަށް އެދެނީ އެކަށީގެންވާ ހެކި ހުރުމާއި ޕެސްޓުގެ ސަބަބުން މުޖުތަމައުއަށް ނުރައްކާވާ ހާލަތު އޮތް ކަމަށް ދައުލަތުން ގަބޫލުކުރާތީ އެވެ.
ދައުލަތުގެ ވަކީލް ވިދާޅުވި ގޮތުގައި، ތުހުމަތު ކުރެވޭ މިންވަރަށް އެކަށީގެންވާ ހެކި ޕެސްޓްއާ ދެކޮޅަށް އެބަހުއްޓެވެ. އެއް ކަމަކަށް ދެއްކީ މަސްތުވާތަކެތީގެ މައްސަލަތަކުގައި ޕެސްޓަށް ފުލުހުން ކުރާ ތުހުމަތެވެ.
ދައުލަތުގެ ވަކީލް ވިދާޅުވި ގޮތުގައި އޭނާއަކީ އިމްތިޒާމްވެގެން ރަށްރަށަށް މަސްތުވާތަކެތި ފޯރުކޮށްދިނުމުގައި މަސައްކަތް ކުރާ ފަރާތެއްކަން ހެކިތަކުން އެނގެ އެވެ. ބޯޓަކަށް އަރުވަން ޕެސްޓް ހިފައިގެން ދިޔަ ފަންކާއެއް ފުލުހުން ބެލިއިރު އޭގެން މަސްތުވާތަކެތި ފެނިފައިވާ ކަމާއި އެ ފަންކާ ހިފައިގެން އުޅޭ މަންޒަރު ސީސީޓީވީއަށް ވެސް އަރާފައިވާ ކަަމަށް ވަކީލް ވިދާޅުވި އެވެ.
ބޯޓަށް ފަންކާ ގެންދިޔަ ޕިކަޕްގެ ޑްރައިވަރު ވެސް ވަނީ ޕެސްޓް އައިޑެންޓިފައިކޮށްފައިކަން ވަކީލް ފާހަގަކުރެއްވި އެވެ.
މިއަދުގެ އަޑުއެހުމުގައި އޮންލައިންކޮށް ޕެސްޓް ބައިވެރިވަނީ
ދެން ވަކީލް ދެއްކެވީ އޭނާ ގޮސް އުޅޭ މަންޒަރު ފެންނަ، ރިހިވެލިގޭގެ ލޮކަރުން ޓްރެފިކިންގެ މިންގަނޑަށް ފެތޭ މިންވަރަށް މަސްތުވާތެކަތި ފެނިފައިވާ ކަމާއި، އެ ގެއިން ޕެސްޓްގެ އިނގިލީގެ ނިޝާން ވެސް ފެނިފައިވާ ކަމެވެ. އަދި، އެ ގެއަށް ވަދެ ނުކުމެ އުޅޭ މަންޒަރު ސީސީޓީވީ ފްޓޭޖަށް އަރާފައިވާ ކަން ވަކީލް ފާހަގަކުރެއްވި އެވެ.
ނަމަވެސް އެ ވީޑިއޯ މިހާތަނަށް ޝަރީއަތަށް ހުށައެއްނާޅަ އެވެ.
ވަކީލް ވިދާޅުވި ގޮތުގައި ވީޑިއޯ އެނާލިސިސް ރިޕޯޓާއި ޑީއެންއޭ ރިޕޯޓް ފުލުހުން ދަނީ ތައްޔާރުކުރަމުންނެވެ. އެހެންވެ، ވީޑިއޯތައް ހުށަހަޅާނީ އެ ރިޕޯޓާ އެކު ކަމަށް ވިދާޅުވި އެވެ.
ޕެސްޓްގެ ވަކީލް އަބްދުﷲ ޝާއިރު ވިދާޅުވި ގޮތުގައި ހުށަހަޅާފައި ނެތް އެއްޗަކަށް ރިއާޔަތްކޮށް ބަންދުގައި ބެހެއްޓޭނެ ގޮތެއް ނޯންނާނެ އެވެ.
ޝާއިރު ވިދާޅުވީ ހެކިތަކާ ވެސް ޕެސްޓާ ގުޅުވޭނެ ވަރެއް ނުވާނެ ކަމަށާއި އެގޮތުން، ރިހިވެލި ގޭގެ ވެރިފަރާތުން އޭނާއަކީ އެ ގެއަށްދާ މީހެއް ނޫން ކަމަށް ބުނެފައިވާ ކަމަށެވެ. އަދި، އިނގިލީގެ ނިޝާން ފެނުނު ކަމަށް ބުނާއިރު އެއީ ހަމައެކަނި ވާތުގައި ބޮޑުވާ އިނގިލި ކަމަށެވެ.
ޕެސްޓު އާއްމުކޮށް އެ ގެއަށް ގޮސް އުޅޭ ނަމަ، ފެންނާނީ އެންމެ އިނގިއްޔެއްގެ ނިޝާންތޯ ޝާއިރު ސުވާލު އުފެއްދެވި އެވެ. އަދި މަސްތުވާތަކެތީގެ ލޮކަރުން ވެސް އިނގިލީގެ ނިޝާން ފެނިފައި ނެތްކަން ފާހަގަ ކުރެއްވި އެވެ.
ވަކީލް އިތުރަށް ވިދާޅުވި ގޮތުގައި، އެ ގެއަކީ ތަޅުލާފައި ހުރި ގެއަކަށްވާއިރު އެ ގޭގެ ތެރެއިން ފެނުނު އެއްޗެއް ޒިންމާ، ގެއާ ގުޅުން ނެތް ޕެސްޓް އުފުލަން ނުޖެހޭނެ ކަމަށެވެ. އެ ގޭގެ ތަޅުދަނޑި ވެސް ޕެސްޓްގެ އަތުން ފެނިފައިނުވާއިރު ލޮކަރުގެ ތަޅުދަނޑި ވެސް ފުލުހުން ހޯދީ އެނދުމަތިންނެވެ.
"އެހެންވީމަ މިއީ އިފްހާމްގެ ހިޔާޒަތުގެ ދަށަށް ވަންނާނެ އެއްޗެއް ނޫން،" ވަކީލް ވިދާޅުވި އެވެ.
ވަކީލް ވިދާޅުވީ، ޕެސްޓުއަކީ އާމްދަނީ ހޯދަން މަސައްކަތް ކުރާ، ތަފާތު ހުނަރެއް ބޭނުންކުރާ ފަންނާނަކަށްވާއިރު މުޖުތަމައުއަށް އޭނާއަކީ ބޭނުންތެރި މީހެކެވެ. އެހެންކަމުން އޭނާގެ ބަންދުގައި އިތުރަށް ބަހައްޓާނެ ތަނެއް އޮތް ކަމަށް ގަބޫލު ނުކުރައްވާ ކަމަށް ވިދާޅުވި އެވެ.
ޕެސްޓްގެ އަނެއް ވަކީލް ޔާމީން ވެސް ވިދާޅުވި ގޮތުގައި މައްސަލާގައި ޕެސްޓްގެ އަބުރަށް ވަނީ ވަރަށް ބޮޑަށް ގެއްލުންވެފަ އެވެ.
މި މަރުހަލާއަކީ ހަމައެކަނި ތުހުމަތުތަކެއް ކުރެވޭ މިންވަރަށް ހެކި ބޭނުންވާ މަރުހަލާއެއް ނޫން ކަމާއި ދައުވާއެއް ކޮށްފައި އޮތުމުން އެކަށީގެންވާ ހެކި، ބަންދު ކުރާ ނަމަ ހުންނަން ޖެހޭނެ ކަމަށް އޭނާ ވެސް ވިދާޅުވި އެވެ.
ނަމަވެސް، މައްސަލަ ބައްލަވާ ގާޒީ ނިންމެވީ މައްސަލާގައި ހިމެނޭ ބައެއް ހެކިތައް ޝަރީއަތަށް ހުށަހަޅާނެ ކަމަށް ދައުލަތުން ބުނެފައިވާތީ މި ހާލަތަކީ ބަންދު ދޫކުރެވޭނެ ހާލަތެއް ނޫން ކަމަށެވެ. އެހެންވެ، އިތުރު 30 ދުވަހަށް ވަނީ ބަންދު އިތުރުކޮށްފަ އެވެ.
އަނެއްކާވެސް 30 ދުވަސްވުމުން ބަންދު އަލުން ރިވިއު ކުރާނެ އެވެ.
ޕެސްޓްއާ އެކު، މައްސަލާގައި ދެން ދައުވާ ލިބޭ ލ. ގަން-ތުނޑި، އަބަދަށްއުފާ، މުހައްމަދު ސުއައިދުގެ ބަންދަށް ވެސް ޕެސްޓްގެ މައްސަލާގައި ފާހަގަކުރި ކަންކަމަށް ރިއާޔަތްކޮށް ވަނީ 30 ދުވަސް މިއަދު އިތުރުކޮށްފަ އެވެ.
މައްސަލާގައި ދެން ދައުވާ ލިބޭ ލ. ގަން-ތުނޑި، ހަނދުވަރީހިޔާ، އަހުމަދު ޝަމްއޫން މިހާރު ހުރީ ބަންދުން ދޫކޮށްލައިފަ އެވެ.
އޭނާ އާއި ޕެސްޓް އަދި ސުއައިދުގެ މައްޗަށް ކުރާ ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާގެ ޝަރީއަތުގެ އަޑުއެހުމެއް މިއަދު ކުރިއަށްގެންދިޔަ އެވެ. ނަމަވެސް، ބައެއް ލިޔުންތައް އަދި ދައުވާ ލިބޭ ފަރާތްތަކަށް ލިބިފައިނުވާތީ އިބްތިދާއީ އެ އަޑުއެހުން ކުރިއަށް ނުގެންދެވުނެވެ.
މައްސަލާގައި ދެން ހިމެނޭ، މ. އަސަރީހަދާން، އާއިޝަތު ހަސްނާ ނާހިދު ވެސް ބަންދުން ދޫކޮށްފައިހުރިއިރު، ދައުވާ ލިބޭ ލ. ގަން-ތުނޑި، ރޯޝަންހިޔާ، އަހުމަދު ހުސާމް ހުރީ ބަންދުގަ އެވެ. އެއް މައްސަލާގައި ދައުވާ ލިބޭ މީހުންގެ ބަންދާ މެދު ހަމަހަމަ އުސޫލެއް ނެތް ކަމުގެ ކަންބޮޑުވުން ވެސް މިއަދު ކޯޓުގައި ވަކީލުން ފާޅުކުރެއްވި އެވެ. ނަމަވެސް، ގާޒީ ގޮތް ކަނޑައެޅުއްވީ އެކަމަށް ރިއާޔަތް ނުކުރައްވަ އެވެ.
